Azaya 31 - Ạḍinya Iigbia

Ẹnaan keeko ni Jeruselem

¹ Moruule bụphe ọghi bọ Ijipt ọwa ọloghonaan ạḍighaagh! Bịdi roḍuom ghan ologhi esi iboom ịikpo ạbuo ẹgham Ijipt — ạrusu, arughuugh-ude, awe ẹgham. Kụ ọlo bịdi úḍuom ologhi Ọmoogh-we Ẹnaan, Iigbia phọ Ịzirel mọ opuru ọdi ọloghonaan ạḍighaagh.

² Ọdi alegheri ni ịpe ọdi raḍighi bọ! Ọdi rạkiom ghan muphe. Ọdi raḍighi ghan kamitiom ịlo ọdi ạpaar ọlhiom ạbukaraph awe rꞌạbuphe rooko ghan bọ bịdi.

³ Awe Ijipt phọ kạ́rumugh — bịdi awe ni bịn. Ạrusu ạbidi káruwaloor. Mem dị Ọmoogh-we phọ kụ raḍighi, eelhe ịikpo phọ kemeel li kụ eedugha eelhe lọ ọdi ạloghonaan ḍịghaagh kemeel kẹn ni. Ịyal phọ areelhe phọ kopiemi ni.

⁴ Ọmoogh-we phọ ụḅeni ịmi mọ, “Tọrobo ịlo abukoriom iyool-ịga ọlooghi ọḅile omoogha, bịdi kótue oporogh ạnam-dịka mọ ạwile ẹnam dị ọdi maghiigh; kụ iḍighi ịdi ịyaar ílho dị kikikima ịmi Ogbogh Ọmoogh-we phọ ophogh Eegum ạZayon.

⁵ Ọkaraghi ịdipho ẹnun rekori ghan bọ otu ọdi ịlo ophogh ạnmuny phọ, ịduon phọ kụ mị Ogbogh Ọmoogh-we phọ kaako ni Jeruselem kụ abianan nyọdi.”

⁶ Ọmoogh-we phọ ạḅem mọ, “We phọ Ịzirel, nyina meḍighi ịkaraph esi ạmi kụ ịmi ị́naghanan. Kụ nyịidipho, itu eḅula esi ạmi.

⁷ Amem retu ni dị oomo anyina ketoḅologhi nmụny aghuḍuul ịkaraph phọ nyina ẹkaam bọ silva rꞌagol.

⁸ Asiria kopiemi ni ẹgham, kụ kóḍighinom ịikpo oye. Bụo Asiria kokiil ọḍua erugh ẹgham mọ, kụ ọsighe ugheel ạnmuny ạbidi oḍighi rẹbene.

⁹ Ogbogh ọdaam mọ ạbidi kakiilom eepuph ạḍua, kụ ạbuo ịtooghi phọ kokiilaan ni iboom dị bịdi kọbile sịlagba ẹgham mọ ạbidi ọḍuaghu.” Ọmoogh-we phọ mạghaaph — Ọmoogh-we phọ ọpo rooseeny ghan bọ sịphe Jeruselem, ọpo ạnian ạrikia phọ ọdi reemor ghan bọ ni sịphe.