Azaya 3 - Ạḍinya Iigbia

Ịgbagara edi ni Jeruselem

¹ Nyịidipho Ọmoogh-we oomo ịikpo phọ, Ogbogh Ọmoogh-we phọ, rạnya ghan ọsighiogh ọḍuanam oomo ạraraar rꞌoomo ạbudi awe ọkpasi oḍuom ologhi sịphe Jeruselem rꞌaJuda. Ọdi kạsighe ni eḍien rꞌạmuum ạbidi,

² rephelegbe rꞌạbuo ẹgham ạbidi, buugboom ịiruen ạbidi rꞌariil ạbidi, bụo ịmiin ạbidi rꞌiphigh awe ạbidi,

³ buḍiemiom ẹgham ạbidi rꞌabuḍiemiom ịtooghi ạbidi, bụo ẹmaar ịtooghi ophoghom awe rꞌoomo ạbulo rọsighe ghan ịiḍaany kọphamam riisi.

⁴ Ọmoogh-we phọ kameera ni mọ ugheel ạnmuny dị ịyaar kőlhegheri kụ kọtooghi ghan rạraar ọngo we phọ.

⁵ Oniin kạgbiphoghom ghan nyoniin. Ugheel ạnmuny rꞌarisina kọ́logh eegu ikumoor awe ạbidi, kụ ighiil awe kókueni bugey ạbulo opu bịdi.

⁶ Amem ketu ni dị ạbuo ọto kọsaḅar oniin ọnyo ạbidi kụ ọḅeni mọ, “Edi ni rꞌabin nạ ạmoogh ni oonmenemineen. Esi ịduon, ḍighi oḍiemiom ayoor sịen ịiḅaghami phọ.”

⁷ Kụ oḍi kạpagharanaan mọ, “Kạ́mi! Mị inyina kị́lhoghonaan ḍịghaagh. Mị kẹn ụ́moogh eḍien mꞌarukpe. Kíḍighi ịmi oḍiemiom anyina!”

⁸ Agey ni, moruule Jeruselem! AJuda rameel! Tọrobo ịyaar dị bịdi ọḅem kụ oḍighi ị́ḅophan Ọmoogh-we phọ; bịdi omite obalelhe otonyon Ẹnaan rꞌaloor.

⁹ Ịkaraph ịitughian ạbidi kọḅam rụmhu ạbidi. Bịdi ọpioghom obalelhe ịdipho awe ạSodom oḍighi ghan bọ. Moruule bịdi, kụ bịdi mọsighe ịphen phọ ọḅama rụmhu ạbidi.

¹⁰ Awe aruukuan kobo ni, kụ ạraraar kẹnighenaan ni bịdi. Bịdi kotue ni olhe ịpe bịdi moḍighi bọ.

¹¹ Kụ ọlo, moruule we ạsipioghom mọ; mẹteeny koḍighi aani bịdi ịpe bịdi oḍighi bọ bụnon awe phọ.

¹² Abuteniom ịimugh ikpoki rọgbiphoghom we ạmi, kụ ạbuphe rọboole ghan bọ roogbegheḍiom ghan bịdi. We ạmi, abuḍiemiom mọ anyina rirelhiom inyina ẹkaraph eten; esi ịduon nyina ílegheri ịlo ọmighaan.

Ọmoogh-we phọ asophonaan ọoruen we ọdi

¹³ Ọmoogh-we phọ aakolobian ni ọgba akeel ọdi; rosophonaan ọoruen we phọ ọdi.

¹⁴ Ọmoogh-we phọ ạsighe ni ikumoor awe phọ rꞌabuḍiemiom awe phọ ọdi rasoorom erugh. Ọdi asiph bịdi ologh phọ ọphon: “Nyina mẹsighe iizo iimuma avain, kụ ạraraar dị nyina mezirion ạanyi rukulom mọ emuza sịphe aruutu phọ anyina.

¹⁵ Nyina ị́moogh elhiom ọogbighiḍi awe ạmi rꞌogbipoghom arukulom mọ. Mị Uwo ẹmhu ịtooghi Ọmoogh-we oomo ịikpo phọ kụ mạḅem.”

Ọphur ạruru nmạriir phọ aJeruselem

¹⁶ Ọmoogh-we phọ ạḅem mọ, “Ịmiin ịdi ạnmariir aJeruselem ophoophe aloor! Bịdi ropogh ghan we kosooromi. Ẹḅeeraan bịdi olhe ẹmha oomo amem. Rọgbarion ghan rạda ạbidi lẹeph lẹeph, kụ ạrala ḍi ọlogha rạghaagh ạbidi rẹnmenem ghan.

¹⁷ Kụ ọlo mị kạliom ni bịdi — mị kạboor ri rụmhu ạbidi kụ ekula yogh.”

¹⁸ Aḍio retu ni dị Ọmoogh-we phọ kạsighiogh oomo ạraraar phọ ạnmariir phọ aJeruselem roobagaam bọ — ịma ạraraar iḅo phọ bịdi rọlogha ghan bọ rịikpigh aruwol ạbidi rꞌạrumhu ạbidi rꞌirum ạbidi,

¹⁹ rꞌạraghaagh ạbidi. Ọdi kạsighiogh ạnmana phọ ạbidi

²⁰ rꞌaroghoony ạbidi; ạrugba ịiḍaany ạraghaagh, rꞌarisin phọ ạbidi;

²¹ sigulu phọ bịdi ọlogha yogh bọ sịphe ạsunugh rꞌizon ạbidi;

²² oomo ịma ibura rꞌạrusuoma ịlo ologhi rꞌạnyu rꞌinyoraam, rꞌarukuru ikpoki;

²³ igbogh ạrusuoma dị rẹnmana loor ạbidi, rꞌarakaghaam, rꞌịidoony ạnmana dị rozua ghan rụmhu ạbidi.

²⁴ Kpạripe dị bịdi kogbula asimeri ịma eḍu, bịdi kopur ẹḅoria eḍu; kpạripe rꞌịma arukuughaam, bịdi komuunaam iburabura iḍigh; kpạripe dị bịdi kọmoogh ịma ạsilaal, ạrumhu ạbidi kekula yogh ni; kpạripe rꞌịma arukpe, bịdi koonmenan ịghelhe; ẹnighe phọ ạbidi kẹngo bịdi umugholoor.

²⁵ Weye ẹmha phọ, agey ni, ghạlamo rꞌạbuphe ọmoogh bọ ịikpo phọ bịn kọze ni ẹgham.

²⁶ Ạrunhu-aḍibuo ẹmha phọ kẹto ni kụ emoghi, kụ ẹmha phọ rꞌaloor kẹkigh ịdipho ạnir dị odi ẹdaḅa kụ ạrol oopho ude.