Azaya 29 - Ạḍinya Iigbia

Ịpe kemitenaan bọ Jeruselem

¹ Moruule enmeny phọ Ẹnaan, ḅịle rꞌaJeruselem rꞌaloor! Moruule ẹmha phọ ẹpe aDevid arugh ghan bọ! Meera ạḍinon ạlha mꞌịyal ạsia eru eten rꞌasimale rꞌạrayaal phọ ạbidi

² kụ Ẹnaan ẹsighe etu ekperenom muphe sịphe ẹmha phọ oghol bọ mọ “Enmeny Ẹnaan”. Emoghi rꞌọto kẹtol li, kụ oomo ẹmha phọ kẹkigh ịdipho enmeny dị ịḅaal ezuughiom.

³ Ẹnaan kezuom ni ẹmha phọ ẹgham, ekoonyom ẹsighe, kụ ẹkpar epu nyọdi.

⁴ AJeruselem kạkigh ni ịdipho ọkpolopioph dị rạkparagha ghan ọrol ologhi ude phọ ọḅa, kụ ẹḍogh phọ iigholaany sịphe ophugh phọ.

⁵ Nạ aJeruselem, kopula ni ọsighe ịdipho ophugh, oomo aruuruen phọ ozuom bọ nyịna ẹgham mọ, kụ awe eegu ẹgham ạbidi kọpeeph ọḍua ịdipho ịgharaghar ikpo ịbiakpa. Egina amem dị ologhi úseere,

⁶ Ọmoogh-we Oomo Ịikpo phọ katom ọomaany ḅịle rꞌophighemi ade phọ kụ ịtagharan inyina. Ọdi katom oghim rꞌọnuza.

⁷ Pọ kụ amem dị oomo ạbuo ẹgham areelhe phọ rozuom ghan bọ ẹgham ẹmha Enmeny phọ Ẹnaan, oomo ịinya rꞌạreenema phọ ạbidi, oomo phọ ịdi, kepe ịdipho ạmalha, ịdipho ịyaar dị ọotughian ḍughul.

⁸ Oomo areelhe phọ eekpomoghan bọ ịlo ozuom ẹgham Jeruselem kọkigh ịdipho oye dị ọkoony rakiigh kụ rạmalha ghan mọ ọno rale ni kụ ạsumanam ni ọkoony phọ, mꞌịdipho oye dị ẹpughol ạmuum rekiigh kụ rạmalha ghan mọ ọno rạpughol li kụ ạsumanam ẹgharaghar ẹḍogh.

Ọpurogh ạruru dị ọḅitonaan

⁹ Ịpam ni elologhi phọ! Ịpam ni ikpom ariḍien phọ! Amiim dị ụ́pughol ịze ni inyina! Ịbelebele dị rꞌẹnum ụ́nam!

¹⁰ Ọmoogh-we phọ maḍighi dị nyina reduga, ọbo nyina ẹkuami rạlha ẹnaani. Ariil phọ kụ ụkpe oḍighi ariḍien awe phọ, kụ ọlo Ẹnaan mepuughi riḍien ạbidi.

¹¹ Kạaghinaan ni inyina ẹmhu ạtorobo ịmiin ariil phọ. Ẹmhu phọ kẹkigh ni ịdipho ạḍinya dị okpooghi ọlogh elegh. Eḍighi mạar dị nyina ẹsighe ḍịnya phọ ẹghiom oye dị ạmaar ạal kụ ẹḅeni mọ ọdi ạal ọḅeni anyina, ọdi kạḅem mọ ọno kátue ịdi eḍighi bọ okpooghi ni.

¹² Eḍighi mạar dị nyina ẹngo oye lọ ụ́maar ạal kụ ẹḅeni mọ ọdi ạal ịḅeni inyina, ọdi kạpagharanaan mọ ọno ólhegheri ịlo ạal.

¹³ Ọmoogh-we phọ ạḅem mọ, “Awe phọ ạbuen okophora mọ ạbuno ruuseeny ghan ịmi, kụ ikpo ọnhu ạbidi ẹmhu ílho kụ iloghi ạbidi edi ni kịro ekpisi. Esi ạbidi ịyaar dị eḍighi ephigh, ọotughian oomo ịtooghi awe kụ ooko ghan eḍighinom ạraraar phọ ịpe awe ooko ghan bọ kꞌamem dị ebia.

¹⁴ Esi ịduon phọ mị kạdeghom bịdi eḍighieny etum eḍighieny. Bụphe olegheri bọ ịyaar koten rolologhi, kụ oomo olegheri ịyaar phọ ạbidi oopho ni bịn.”

Oḍuom ologhi odi ni ghisigh

¹⁵ Moruule bụphe ọwa bọ ạaghi igbiighi ạbidi esi Ọmoogh-we phọ! Bịdi oḍighi ịpe bịdi mogbiighi bọ esi ịbooghian kụ ọotughian mọ oye kạ́miin mꞌolegheri ịpe roḍighi bọ.

¹⁶ Bịdi okiton tọrobo ịyaar eḅugheeny. Ọghen kụ ạkaraghi ạman mạar sịphe ọlemom aroko rꞌạḅay phọ? Ịyaar dị oye mạlhem ketue ni ẹḅeni oye phọ mọ, “Nạ kụ ịmi ụ́lem,” ḍụghum? Mꞌịyaar kẹḅeni ni oye mọ, “Nạ ólhegheri ịpe nạ raḍighi bọ” ḍụghum?

¹⁷ Esi ạḍughum ọnhu mọ, mem dị kẹ́kel, kọkpoghoron ẹekpua eḍighi de oḅeph ozo, kụ ade oḅeph ozo ẹkpo eḍighi ẹekpua.

¹⁸ Mem dị aḍio phọ ạḍiphe ẹteeny, ọpo ạḅaaghaph bọ ạnaghan ḍịnya dị ạal omitiom, kụ ạbuo ikpom ariḍien phọ, odi ghan bọ dọl ufiri phọ, kọḅarion ni riḍien ạbidi ọmiin eten.

¹⁹ Arukulom rꞌawe dị osooromi loor kọḅile ni ọmoogh ọḅaal ologhi phọ ọpo Ọmoogh-we Oye Aghuḍuul phọ Ịzirel rạngo ghan bọ.

²⁰ Ịphen keḍighi ni eekuna ạbuphe ọgbilighiom bọ bụnon kụ ọḅitonaan ghan bọ Ẹnaan. Tọrobo oḍighinom ịkaraph kopiemi ni.

²¹ Ẹnaan kepiemi ni bụo ịkaraph ạsiagba phọ, bụphe rokikima bọ mọ ọliom bụo ạsipioghom mọ, rꞌạbuphe rọgba ghan bọ ọkpe ịlo ọpharanaan igey awe akeel phọ ạbidi.

²² Esi ịduon phọ nyịidipho Ọmoogh-we Ẹnaan phọ Ịzirel, ọpo ạtagharan bọ Ebraham ạsighe esi ịiḅaghami phọ rạḅem ghan mọ, “We ạmi, inyina kíifolomi mun risigh, kụ asighisigh anyina kékpaghagha mun rꞌumugholoor.

²³ Mem dị nyina kẹmiin bọ nmụny phọ mị kịngo bọ inyina, kụ ẹdi nyina kelegheri mọ mị kụ Ẹnaan Oye Aghuḍuul phọ Ịzirel. Nyina kighueni ni ịmi eegu ẹḅaram oghiilaan.

²⁴ Awe elologhi kọwa ni ọnaghan ạḍughum, kụ bụphe odi ghan bọ ịnun oomo amem mọ kọḅaal li ologhi mọ ọtughemi bụno.”