Azaya 27 - Ạḍinya Iigbia

¹ Ḍio phọ ạḍiphe Ọmoogh-we phọ kạsighe ni eeropha elhool ẹgham mọ ọdi dị ẹmoogh ịikpo ạlhiomom ạbakaaba, nonom mọ ọpo raḅerenu ghan bọ kakironaan, ạghigh bọ nonom dị odi ghan ọphiiny phọ.

² Ḍio phọ ạḍiphe Ọmoogh-we phọ kạkaaph ni ịlo ịma ozo avain phọ ọdi mọ,

³ “Mị ụkaraghi ni akori ghan ozo phọ ạmi kụ aaḍuom ghan mụum ịizupha phọ ịbadi amem. Mị aphogh ghan ḍughul rꞌootaany ọbo oye kạpue ịyaar.

⁴ Mị rạ́kagham mun ologhi ozo iimuma avain phọ. Eru mạar dị iitoor rꞌaruuḅurom bịn kụ ẹrol sịphe eenan, pọ mị muguom bịdi nịan ạmadan.

⁵ Kụ eru mạar dị ạbumulogh-ḍien awe phọ ạmi rọwa mọ mị uuko bụno, pọ bịdi oru ụphomoghian ịmi yoor ọrol dọl ẹepho. Ii, bịdi oru ụphomoghiom ịmi yoor ọrol dọl ẹepho.”

⁶ Riiḍio dị ketu, awe phọ Ịzirel, ẹemara ẹemara phọ ạJekob, kọmoogh sịni ịdipho oreeny, kụ bịdi koonmenan kụ opoola. Iimuma ạbidi kụ kemuza de phọ.

⁷ Ọmoogh-we phọ kọ̋lhiom Ịzirel ịdi ẹman ịpe ạbumulogh-ḍien phọ ọdi. Aḍuugh awe ọdi kőleeny ịdipho.

⁸ Ọmoogh-we phọ ạliom we phọ ọdi ịdipho bịdi ọrol bọ ikoli ẹgham iiruen ạramha phọ. Ọdi ạsighenom bịdi ọkaraph ookuugh dị aghugh ẹpe erumuḍio phọ remite ghan bọ kụ aru.

⁹ Kụ kọsar ọbilenaan ịkaraph phọ Ịzirel bịn mem dị mọgbe iiḅoghoḍi asighiigh arenmeny aruru ạbidi ịdipho ameleph, kụ mem dị arenmeny ịnsens rꞌelegh igbudu um-ạke Asera ílho mun.

¹⁰ Ẹmha phọ ẹmoogh bọ riisi ẹkpar phọ meḍighi ịzeghe. Awe mọḍuaghu ẹmha phọ ẹkigh oopho ẹdala. Ọdi maḍighi de ạroogho ạsinam ẹḅal ghan, esi dị bịdi kepooghian ẹḅile ẹḅal.

¹¹ Ịla ireeny phọ mẹgharaghar kụ eḅonyonu, kụ ạnmariir ọso eḍighi ịpe ạnian. Loor esi dị awe phọ ịyaar kőlhegheri bọ, Ẹnaan Ọlemia phọ ạbidi kạ́nma bịdi ighirigiir ḅịle kạ́seenyaan bịdi.

¹² Ḍio phọ ạḍiphe, emiigh Ọphiiny aYufratis kụ esi ọku Ijipt, Ọmoogh-we phọ kaakpomoghi ni we phọ ọdi oniin atum oniin, ịdipho oye dị rạponyon ikpo kạwile riiti.

¹³ Mem dị ẹteeny ḍio phọ ạḍiphe, kopula ni ọkuodu ọmagham mọ origheel oomo ạbuo Ịzirel phọ odi bọ dọl iiruen kꞌẹpe Asiria rꞌIjipt. Bịdi kotu ni ooseeny Ọmoogh-we phọ sịphe Jeruselem ạnyu ẹeḅaraph iigbia phọ ọdi.