Azaya 24 - Ạḍinya Iigbia

Ọmoogh-we phọ kạliom ni de phọ

¹ Ọmoogh-we phọ kaagulemi ni de phọ kụ atene ọkpagha. Ọdi kakpululumi ni ạnyu ade phọ kụ ạwalawalami we phọ.

² Tọrobo oye kazuan ni eniin phọ elhor phọ — riil ạrikia phọ rꞌawe phọ, rẹbene rꞌạburude otu, bụo ogho rꞌạbuo aal, buteneghiom ịimugh rꞌạbuboole, rạalha rꞌarukulom.

³ Ade phọ kẹegbighiḍian eḍighi ịzeghe. Ọmoogh-we phọ mạghaaph kụ kaḍighi ni.

⁴ Ade phọ ẹkara kụ ẹgbaal, oomo aḅirini phọ ạkporokporo, ade rꞌokuaḍio phọ ẹḅor.

⁵ Awe phọ mọopu de phọ loor ọkaaghi iilogh phọ Ẹnaan, mꞌoghonyonaan ịyo phọ ọdi aghiran bọ mọ ẹrol kꞌagee-pọ phọ.

⁶ Esi ịduon phọ Ẹnaan mesu ọnhu de phọ. Awe phọ ọdi rọmoogh ịikpia esi ịpe bịdi moḍighi bọ. Iikoma ni bịn kụ odi eye.

⁷ Ịizupha avain phọ rẹgbaal, kụ amiim raku. Tọrobo oye dị ologhi ạḅaal ghan, nyịidipho makururu,

⁸ kụ ạri ephegh ọḅaal ologhi ạrene rꞌạrakama mesophoghian.

⁹ Ạsuor ọḅaal ologhi esi amiim ílho mun meten; amiim oye óten mun ọphughol.

¹⁰ Sịphe ẹmha phọ ịgbaragbara bịn kụ edi, kụ awe ọkasiom siloor ạbidi iloghi aruutu ịlo ọphelaam ẹmhu ạbidi.

¹¹ Awe rọlooghi ghan sịphe areten phọ ịdi eḍighi bọ amiim mamineen. Ọḅaal ologhi magheel kꞌagee-pọ; moroph nyọdi ogbeph sịphe ade phọ.

¹² Ẹmha phọ meḍighi ịzeghe, kụ ọpueghi rụnhu-aḍibuo phọ ọdi onyuughi olereghi.

¹³ Ịphen kụ ịdi kemite tọrobo eelhe sịen oomo aḅirini phọ. Kẹkigh ni ịdipho eekuna ibugha, mem dị mọgurogh ireeny ọliv oroph tọrobo eghuuny, ọku rughuuny avain ọsighe sịphe ạtorobo oreeny-amiim.

¹⁴ Bụphe okpetenaan bọ kọmoor sụor iboh. Bụphe odi bọ ẹpe erumuḍio phọ remeel ghan bọ kọkaaph ịdi Ọmoogh-we phọ ạbugh,

¹⁵ kụ bụphe ẹpe erumuḍio phọ remite ghan bọ koboom nyọdi. Awe phọ bụphe orugh bọ ọgbal ọphiiny phọ koboom Ọmoogh-we Ẹnaan phọ Ịzirel.

¹⁶ Kꞌẹpe ạriikpigh aḅirini phọ ẹkaraghi bọ ẹkel iboom yira kọnaghan sụor oboomiom Ịzirel, eelhe aruukuan phọ. Kụ oḍuom ologhi ịmi úlhoonaan! Mị rape kamuneen! Awe iḅoroghom odianaan ọgbaaghiom ạmi, kụ ịkalaghian ạbidi rꞌamem ídugh.

¹⁷ Oomo awe, ịnaghanan ịmi! Ọko enu, asighini rꞌasiphil edi ni rikori inyina.

¹⁸ Tọrobo ọlo ạwa okpetenaan ọḍua ịsiphe ikpereghaan phọ kameel asuma ghini, kụ tọrobo oye lọ akpetenaan bọ ghini phọ aḍiphil kụ kesiph. Ọlophia oghim kạḍua ni ẹpe okuaḍio phọ ạlophom, kụ ephighiom ade phọ kepiigha ni.

¹⁹ Ade phọ ketuphughu ni ediighian eḅomoghian kụ etuphaan ekpegherenu.

²⁰ Ade phọ rꞌaloor kẹbelebele ni ịdipho oye dị amiim rakiigh kụ enagh ịdipho ogbogo mem oghim. Ẹemor adool ịkaraph awe phọ mẹnin aḅirini phọ; ọdi kamuzaan ni ḍuugh bịn amugh.

²¹ Amem retu ni dị Ọmoogh-we phọ kạliom ịikpo phọ edi bọ kꞌạke rꞌạbudaam ade phọ.

²² Ẹnaan keekpomoghi ni bụdaam mọ atirighi egina esi ịdipho ạbuo ikoli ologhi aghini. Ọdi kạkasaghiom bịdi otu ikoli tụtu amem ọliom ạbidi ẹteeny.

²³ Ụnwanyu phọ kaḍighi ufiri, kụ erumuḍio phọ kémite mun, ịdi eḍighi bọ Ọmoogh-we Oomo Ịikpo phọ kụ kaḍighi ọdaam. Ọdi kạda ạnyu Jeruselem ẹpe Eegum ạZayon, kụ abuḍiemiom awe phọ kọmiin ni eegu ọdi.