Azaya 23 - Ạḍinya Iigbia

Adom ḍịo aFinisia

¹ Ḍịen adom ḍịo aTaya. Imoghi ẹlhooghi, nyina ạbuzoghiom mọ edi bọ otu-ḅualhe phọ! Ephunom esiḍia aTaya ẹmha anyina mophiemi; ruutu rꞌariisi osul ạrunwunyaru phọ mọphueghi. Ịdipho ạrunwunyaru phọ anyina kẹḍua bọ Sạipros retigheel, bịn nyina kẹnaghan ni ọghaaph phọ.

² Imoghi ẹlhooghi, nyina abumuul ḍighi ephur phọ aSaidon. Nyina irom ni we

³ mọ ọḅeeny ọphiiny phọ omuul ḍighi ịbiakpa phọ Ijipt ḅịle rꞌooḍikuan oomo areelhe phọ ọwa ikpoki.

⁴ Ẹmha aSaidon, moofolomi nyịna! Ọphiiny phọ rꞌigbogh asigher otu-ḅualhe phọ mẹpharanaan nyịna kụ ẹḅem mọ, “Mị kọ̋mar ghan rꞌoniin ọony. Mị kőokonom ghan lephiri mꞌạnmanyaan.”

⁵ Ghạlamo ạbuo Ijipt bịn kokperaan ni kụ eḍighi iikia mem dị bịdi ọnaghan mọ mophiemi Taya.

⁶ Imoghi ẹkananaam, nyina awe phọ aFinisia. Ịkpar osuma ogheel aSpen.

⁷ Ẹphen phọ ni kụ ẹmha ọḍe phọ aTaya ọke bọ ni kꞌamem dị mebia? Ẹphen phọ ni kụ ẹmha phọ orom bọ bụdi ọḅeeny ọphiiny phọ ọkpaariom we mọ ọrol eeḍian ạbuno?

⁸ Ạnhian kụ agbiighi bọ mọ oḍighi ịphen phọ Taya, ẹmha phọ ọdaam mọ ẹpe, ạḅaram ophogh ịnon areelhe, ẹpe ịkpana ạbudaam abumuul ḍighi ephur phọ ọdi oghueni bọ opu bụnon awe sịen aḅirini phọ?

⁹ Ọmoogh-we Oomo Ịikpo phọ kụ agbiighi ịdipho. Ọdi ạwa ni ophiemi ạbidi loor ophoophe aloor ạbidi ịlo ịpe bịdi moḍighi bọ, ḅịle rꞌoofolomi ikpolom awe phọ ạbidi.

¹⁰ Ịki eḅephogh iizo phọ, nyina areelhe phọ edi bọ eeḍian aSpen! Oye ólho dị kạḅile ighoph inyina.

¹¹ Ọmoogh-we phọ mạgbuton ḍịghaagh ọdi ạnyu ọphiiny phọ kụ alereghi rạmar. Ọdi mạto mọ ophiemi riisi asiḍighi ephur phọ aFinisia.

¹² Ẹmha phọ aSaidon, ọḅaal ologhi phọ ạna mamuneen, kụ rọkpilighiom we phọ ạna. Ghạlamo bịdi usuma ni ogheel Sạipros, bịn kókpetenaan.

¹³ (Awe ạBabilon, kạ́buo Asiria kụ umeera bọ mọ ịnam eḍum mọ ẹka Taya. Awe ạBabilon kụ udoghoḍi bọ iiphopha aruutu oghoonyom, onyuughi olhereghi riisi ẹkpar phọ aTaya, kụ otene ẹmha phọ ịzeghe.)

¹⁴ Imoghi ẹkananaam rꞌamukum ologhi, nyina ạbuzoghiom ạrunwunyaru dị edi sịphe otu-ḅualhe phọ! Ẹmha phọ nyina eḍuom bọ ologhi phọ mophiemi.

¹⁵ Amem retu ni dị kobula Taya oḍualdi ạsia, sịa aghuḍum ọdaam. Reten sịa phọ ịpe kụ aTaya ạkigh ịdipho oliom-ẹmha sịphe ạḍuor phọ:

¹⁶ Sịghe ọne ạna arelhe akitonom ẹmha phọ, nạ oghiil oliom-ẹmha dị mowula! Ti ạḅile ạmoor sụor ạna ọḅile ọsighe awe oḅulemi.

¹⁷ Mem dị oḍualdi ạsia phọ meten, Ọmoogh-we phọ kameera ni aTaya aḅula ḍigbaany ẹwaam ikpoki phọ ọdi, kụ ọdi ạkuom loor ọdi oḍighi ọngo ọmar kịrokiro aḅirini phọ.

¹⁸ Ikpoki phọ ọdi kagboom bọ omuul aḍighi phọ kọḅogh ni ọngo Ọmoogh-we phọ. Ọdi káako ghan bịn aseerian, bụphe rooseeny bọ Ọmoogh-we phọ kụ kọsighe ghan ikpoki phọ okoom eḍien rꞌarukpe lọ bịdi rọwa.