Azaya 2 - Ạḍinya Iigbia

Ẹepho kꞌagee-pọ

¹ Ḍịen kụ adom mọ Ẹnaan erom bọ Azaya ọony phọ Amoz ịlo aJuda rꞌaJeruselem:

² Riiḍio dị ketu eegum mọ ẹpe Otu Ịiḅereghi phọ ạmeera bọ kụ keḍighi esi dị ephoph epu oomo ịpheri phọ, dị ephoph epeleghom oomo aroogbolom mọ.

³ Ịbadibadi areelhe kokiil li otu ookpomoghan sịphe, kụ awe ạbidi kọḅem mọ, “Itu ọghi eegbolom Ọmoogh-we phọ oḍigh Otu Ịiḅereghi Ẹnaan phọ Ịzirel. Ọdi kụtughemi ni iyira ịpe ọdi rạwa bọ dị yira koḍighi; yira kotelhe sịphe areten phọ ọdi mạsaḅar bọ. Ịyaar phọ eḍighi bọ ịtughemi Ọmoogh-we phọ rẹḍua ghan Jeruselem kụ keru; ịsiphe Zạyon kụ ẹdi ọdi rạtol ghan kạḅaanaan weye ọdi.”

⁴ Ọdi kakunughi ịgbaragbara igbo igbogh areelhe. Bịdi kọgurogh rolhool ẹgham ạbidi otene rụsua, rọosoph ạbidi otene rolhool ọsam. Areelhe rꞌamem kóbe mun ẹgham, kóokolobian mun eeghi ẹgham.

⁵ Nyịidipho, ẹemara etum ẹemara phọ ạJekob, itu orelhe sịphe ạḍiḅaal phọ ḍịphe Ọmoogh-we phọ rụngo ghan bọ iyira!

Ophoophe aloor kopiemi ni

⁶ Ẹnaan, nạ mạḅitonaan we phọ ạna, ẹemara ẹemara phọ ạJekob! Oḍighi yogh ịiḍaany dị rẹḍua ẹpe erumuḍio phọ remite ghan bọ rꞌẹpe aFilistia kụ keru memuza de phọ. Awe phọ rọdaph ghan eeruen eḍighinom ạraraar.

⁷ Asilva rꞌagol kụ imuza sịphe ade phọ ạbidi, kụ eekuna ẹelha ạbidi ílho. Ịnam-ạsu kụ imuza sịphe ade phọ ạbidi, kụ eekuna arughuugh-ude ạbidi ílhoonaan.

⁸ Ịkaaghineen ạrumugh kụ imuza sịphe ade phọ ạbidi, kụ bịdi rooseeny ghan rạraar dị bịdi kụ oḍighinom rạghaagh ạbidi.

⁹ Tọrobo oye koofolomi ni kụ osiphe umugholoor. Kạ́sar ạbilenaan bịdi, Ọmoogh-we.

¹⁰ Bịdi kọbooghian ni ologhi aropogh ude asighiigh aruugum mọ mꞌoguph aropogh sịphe ude phọ ịlo okpetenaan esi ọghagh ologhi Ọmoogh-we phọ ḅịle rꞌịlo ạaghian ọḍua esi ịikpo rꞌeegu phọ ọdi!

¹¹ Aḍio retu dị ophoophe aloor oye kasi eekuna ọḅile opiemi oobaga oye, kụ Ọmoogh-we phọ bịn kụ ọdi kokueni ḍio phọ ạḍiphe.

¹² Ḍio phọ ạḍiphe Ọmoogh-we oomo ịikpo phọ kasooromi ni loor ạtorobo ọlo ạmoogh ịikpo, rꞌạtorobo ọlo aphoophe loor kụ ragbi ghan mọ ọno ạpughan.

¹³ Ọdi kapiemi ni iiphopha ireeny ọsaga phọ ạLebanon rꞌoomo ạḍiogh ade phọ ạBasan.

¹⁴ Ọdi kạawalami iiphopha aruugum mọ rꞌạraaḅaraph phọ,

¹⁵ oomo aruutu ẹedaneen oghoph phọ rꞌiikpe oomo ariisi ẹkpar phọ.

¹⁶ Ọdi kaḅiemi ni ghạlamo ạrunwunyaru dị ẹbugh ẹḅile ẹnighe iboom.

^17-18 Ophoophe aloor oye kasi ni eekuna kụ opiemi oobaga oye. Ịkaaghineen ạrumugh kepe ni emuneen, kụ Ọmoogh-we phọ bịn kụ ọdi kokueni ḍio phọ ạḍiphe.

¹⁹ Awe kọbooghian ni ologhi aropogh ude asighiigh aruugum mꞌoguph aropogh sịphe ude phọ ịlo okpetenaan esi ọghagh ologhi Ọmoogh-we phọ ḅịle rꞌịlo ạaghian esi ịikpo rꞌeegu ọdi mem dị ọdi aru ophighemi ade phọ.

²⁰ Mem dị ẹteeny ḍio phọ ạḍiphe, bịdi kotoph ni ịkaaghineen ạrumugh agol rꞌasilva phọ bịdi mọkaaghi bọ kụ ọbilenaan bịdi eepi iwo phọ rꞌarugbom mọ.

²¹ Mem dị Ọmoogh-we phọ aru ophighemi ade phọ, awe kọbooghian ni ologhi aropogh ude asighiigh aruugum mọ rꞌịsiphe ude phọ ịlo okpetenaan esi ọghagh ologhi Ọmoogh-we phọ ḅịle rꞌịlo ạaghian esi ịikpo rꞌeegu phọ ọdi.

²² Kẹ́kpasi mun oḍuom ologhi esi awe dị komugh ni. Bịdi ọman eeghe?