Azaya 19 - Ạḍinya Iigbia

Ẹnaan kẹliom ni Ijipt

¹ Ḍịen kụ adom ḍịo Ijipt. Ọmoogh-we phọ agburugburu ni ologhi ọotu ratu Ijipt. Ịkaaghineen ạrumugh phọ Ijipt reekpeka esomanan ọdi, kụ awe phọ Ijipt moroph ạkpo ologhi ạbidi.

² Ọmoogh-we phọ ạḅem mọ, “Mị katuphe ẹgham sịphe oomo ade phọ Ijipt kụ umor asoman umor kụ amatuman asoman amatuman. Ạramha dị reepikian eniin kebeanan ni nyeniin, kụ ạbudaam dị ropikian komirighan ni ịikpo.

³ Mị kạpue ni igbiighi ạbuo Ijipt phọ kụ asooromi igey ịitughian ạbidi. Bịdi kọlom ịkaaghineen ạrumugh ạbidi ọloghonaan ạbidi ḍịghaagh, kụ bịdi kọki ghan idike kụ opuru ghan ruwaloor iḍim oroma.

⁴ Mị kạḅogh ni bụo Ijipt ạlogh ḍịghaagh ọgbagara oye ọdaam dị eeph, dị kapogh bịdi. Mị Ọmoogh-we Oomo Ịikpo phọ mạḅem.”

⁵ Ạmuum ọphiiny phọ aNail kasoorom ni kụ amiigha amoopha ạman.

⁶ Asikol ọphiiny phọ kepur ri ẹḅoria eḍu ịdipho ạmuum mọ ramoopha bọ. Ikpu rꞌọota phọ kayoro ni,

⁷ kụ oomo ịizupha phọ ọzuph bọ ọgbal Ọphiiny aNail kẹkaraghar kụ ookuugh akughom.

⁸ Tọrobo ọlo aḍigbo ọdi edi esi ạkoni Ọphiiny aNail kạtol ikuph rꞌemoghi; ạsibaph rꞌịzuguru ạbidi oopho ni bịn.

⁹ Bụphe roḍighi ghan bọ ịyegheyeghe arukpe komeelom ni ọto;

¹⁰ bụo oloogh ạraraar rꞌạbuo ẹmaar ọdo kịrokiro iiḍighi kokporoghaan ni okururu.

¹¹ Abuḍiemiom ẹmha phọ aZoan awe elologhi! Awe ọkaraghi olegheri-ịyaar phọ Ijipt rotoma ghan oroma elologhi. Bịdi oḅom ẹmhu rọḅeni ghan ọdaam mọ mọ bịdi ulhe erua ạbuo ịtuugha rꞌạbudaam ageedi phọ?

¹² Nạ ọdaam mọ Ijipt, odi ẹghen bụo olegheri ịyaar oroma ạna? Ịduon sịen bịdi kọḅeni ni nyịna ọdo igbiighi dị Ọmoogh-we phọ Oomo Ịikpo phọ ạmoogh ịlo Ijipt.

¹³ Iloghi ílho buḍiemiom mọ aZoan rꞌaMemfis. Bịdi kụ muḍiemiom reelhe phọ, kụ bịdi mọpiom eten.

¹⁴ Ọmoogh-we phọ maḍighi ịdi bịdi ọngo oroma ịgbaragbara. Esi ịduon phọ, Ijipt raḍighi ghan ịdipho tọrobo ịyaar kạpioman kụ rạbelebele ịdipho oye dị amiim rakiigh kụ raakila ạnyu izuughi ọdi.

¹⁵ Oye ólho sịphe Ijipt, mꞌọolha mꞌuwekulom, mꞌogbogh mꞌọbam, dị kạngo ọlogh ạḍighaagh.

Ijipt kaaseeny Ọmoogh-we phọ

¹⁶ Amem retu ni dị awe phọ Ijipt konakara ịdipho ạnir-ephoph. Bịdi kookpeka loor eegu aḍuugh mem dị bịdi ọmiin mọ Ọmoogh-we Oomo Ịikpo phọ mạgbuton ḍịghaagh ọlhiom ạbidi.

¹⁷ Awe phọ Ijipt kokpereghaan ni esi aJuda tọrobo amem dị ọghiom bịdi ologhi ịkaraph dị Ọmoogh-we Oomo Ịikpo phọ maakolobian bọ oḍighi ạbidi.

¹⁸ Amem mọ ạmuphe phọ ẹteeny, kọḅa ni ọnhu aHibru phọ sịphe oogh ạramha phọ Ijipt. Awe phọ ạbidi kokunyaam ghan ḍien Ọmoogh-we Oomo ịikpo. Nyeniin ẹmha phọ kokol mọ, “Ẹmha Erumuḍio phọ.”

¹⁹ Amem mọ ạmuphe phọ ẹteeny enmeny kọkananaan ni Ọmoogh-we phọ sịphe ade phọ Ijipt, ọḅile ogim ẹko asighiigh dị kọḅogh ọngo nyọdi ẹpe ọku phọ Ijipt.

²⁰ Ạraraar phọ ịphen keḍighi ni eḍeenaan mọ Ọmoogh-we Oomo Ịikpo odi ni sịphe Ijipt. Mem lọ rọgbiphoghom we phọ kụ ọlho ọmagh Ọmoogh-we phọ mọ ạlogh ạḍighaagh, ọdi katom ni oye mọ ạghi ạtagharan bịdi.

²¹ Ọmoogh-we phọ kagananami ni loor ọdi esi awe phọ Ijipt, kụ eru eten bịdi komeeraam ni ooseeny ghan nyọdi, kụ ọsighe ghan ịinua ạrikia rꞌaruunmo ọkiom nyọdi. Bịdi kokunya ruguanaan ọkiom nyọdi kụ oḍighi ịpe bịdi oguanaan bọ.

²² Ọmoogh-we phọ kạliom ni Ijipt kụ agbi ookonom ạbidi. Bịdi kokiton ni otu esi ọdi, kụ ọdi kạnaghan ni ịiḅereghi phọ ạbidi kụ aakonom bịdi.

²³ Amem mọ ạmuphe phọ ẹteeny, oboom oḅodo kạtol li ẹpe igbo Ijipt rꞌAsiria. Awe ịyal areelhe phọ ẹpe, kotelhe ni ọki otelhe oḅula igbo ạbidi, kụ ịyal areelhe phọ kọḅophoghan ni ooseeny phọ Ẹnaan.

²⁴ Amem mọ ạmuphe phọ ẹteeny, Ịzirel kaalenyan ni Ijipt rꞌAsiria, kụ ịraar areelhe phọ ịphen keḍighi ni ḍịseph ẹngo oomo aḅirini phọ.

²⁵ Ọmoogh-we Oomo Ịikpo phọ kạseph ni bịdi kụ ạḅem mọ, “Mị kạseph ni nyịna Ijipt awe phọ ạmi rꞌạna Asiria ọpo mị ạlhem bọ, ḅịle rꞌạna Ịzirel we phọ ạmi mị ạsaḅar bọ.”