Azaya 18 - Ạḍinya Iigbia

Ẹnaan kẹliom ni Sụdan

¹ Ẹḅeenyom ạriphiiny phọ ạSudan, ade edi ni dị rọnaghan ghan oghur araphaaph.

² Ạruukpaany dị ọḍua ẹpe ade phọ ạḍiphe rotu oḍiku rughuugh dị oḍighinom ikpu kụ ọzoghi Ọphiiny aNail otu. Nyina igburugburu ạruukpaany, iḅula ologhi otu. Ịpam dom ẹghiom de anyina dị ạriphiiny ẹgbiran, ẹghiom eelhe anyina dị ẹmoogh ịikpo rꞌịnyaam, ẹghiom we anyina dị ophophogh rꞌaḍizu dị rẹmogh, bụphe oomo aḅirini phọ rokiilaan ghan bọ.

³ Iler rụru ẹnaghan, oomo phọ anyina orugh bọ sịen aḅirini phọ. Ịmaar ephogh ọmiin ạlagba eḍeenaan dị kogim ạnyu aruugum mọ! Ikori mem dị kopula ọkuodu phọ!

⁴ Ọmoogh-we phọ ụḅeni ni ịmi mọ, “Mị kạtol kꞌạke aḅoorian kụ apogh ude ịdipho ọotu phọ aḅoorian bọ aakpomoghan sịphe asiḍughul-otu ẹghologhol amem ibugha phọ, ịdipho erumuḍio phọ eḅoorian bọ rẹmu ghan mem ẹghologhol ootaany phọ.

⁵ Tụtu kookpomoghi rughuuny avain phọ, mem dị oomo ipoola mẹghar arughuuny phọ rẹkpo, ẹpomoghian phọ kopiemi ni Sụdan ịdipho edughanaan bọ ni oye ọsighe elhool ọkoyom ịla iizin avain.

⁶ Ruzu ạbuo ẹgham mọ omuughu bọ kọbilenaan ephoghoghoony ịnun rꞌilhom ịnam mọ. Mem aghozogh ịnun phọ kẹḅa ghan bịdi, kụ ịnam mọ ẹḅa ghan mem arunu.”

⁷ Amem retu ni dị Ọmoogh-we Oomo Ịikpo phọ kạboor ri ruunmo ade phọ ạḍien ạriphiiny phọ ẹgbiran bọ, esi eelhe ịikpo rꞌịnyaam mọ ẹphen, esi awe phọ ạbuen ophophogh bọ rꞌaḍizu rẹmogh bọ, bụphe oomo aḅirini phọ rokiilaan ghan bọ. Bịdi kotu osi Eegum mọ ạZayon, ẹpe rooseeny ghan bọ Ọmoogh-we Oomo Ịikpo phọ.