Azaya 15 - Ạḍinya Iigbia

Ẹnaan kepiemi ni Mọab

¹ Ḍịen kụ adom ḍio ạMoab. Rạmha phọ Ar rꞌaKir kopiemi ḍiniin aḍughul, bịn ẹḍogh ạMoab kọ́naghan mun.

² Awe phọ aDibon ọkiighi otu ịiḅereghi ạbidi ọrol ịpa ẹphan phọ omoghi, kụ ạMoab omoghinaan rạmha aNebo rꞌaMedeba; oomo ạrumhu mẹḅaalogh rꞌịleem okula yogh rꞌamukum ologhi.

³ Aweye aroḅodo phọ oonmenan iinmenan ọto; sịphe igbogh arurugh ạramha phọ rꞌạnyu aruutu phọ awe odimom ọto rꞌemoghi.

⁴ Awe phọ aHesbon rꞌEliale omoghi ọlooghi dị emoghi phọ ạbidi kọnaghan ni kꞌẹpe Jahaz. Ghạlamo ạbuo ẹgham mọ bịn rookpeka ni; ạkpo ologhi ạbidi mạḍua.

⁵ Ologhi ạmi ramoghinaan ni Mọab! Awe phọ mosumughu ọki ẹmha phọ aZoar, rꞌẹpe Eglat Selisiya. Buniin ọpam rꞌemoghi onyeeniom eten aLuhit, romoghi ịduon bịdi rọki bọ; buniin osuma rọki Horonaim, rꞌọto rꞌịlooghi.

⁶ Ọodu phọ aNimrim mamooph, ạroogho phọ manyororo ạkaraghar sịphe iigbom mọ, kụ ịyaar dị eemanam ísugha mun.

⁷ Awe phọ mọḅeeny Eḍiiny Ireeny ọgbal ạmuum, rọkparagha ghan osumanam oomo adool ạbidi.

⁸ Ẹḍogh emoghi bịn kụ edi rọnaghan ghan oomo ạruuku ade phọ ạMoab. Rọnaghan kẹn ni ẹpe rạmha phọ Eglaim rꞌaBeer Ẹlim.

⁹ Ẹpe ẹmha phọ aDibon ọphiiny phọ ạtoghom ịḅaal, kụ ịdi Ẹnaan eseere emitenaan ạbidi ebeeph epu. Agey ni, kozu ni ịḅaal ạtorobo oye lọ asugha sịphe Mọab.