Azaya 14 - Ạḍinya Iigbia

Ịzirel katigheel ikoli ẹgham mọ

¹ Amem kẹḅile ni etu dị Ọmoogh-we phọ kạnma ighirigiir we phọ Ịzirel kụ ạḅile ạsaḅar bịdi mọ ạbuo ọno. Ọdi kameera ni bịdi ọḅile orugh sịphe ade phọ ạbidi, kụ aruuruen kotu ni otughan rꞌạbidi.

² Ịbadi areelhe kọloghonaan ni ḍịghaagh we phọ Ịzirel origheel ẹpe ade phọ Ọmoogh-we phọ ạngo bọ bịdi, kụ areelhe phọ kokumu ni Ịzirel ịdipho ạrebene. Bụphe osiphi bọ Ịzirel, nyịidipho Ịzirel kosiphi aani bịdi, kụ awe phọ Ịzirel kụ kọda ni bụphe ọgbiphoghom ghan bọ bịdi.

Ọdaam mọ ạBabilon ẹpe ọmar iḍim

³ Ọmoogh-we phọ kạngo we phọ Ịzirel ọlogh ạḍighaagh ọḍua esi ḍiphin rꞌịminimiin ạbidi rꞌesi ọokpara oḍighi ẹ́miin eelhe phọ ạbidi ọkpaariom bọ bịdi oḍighi.

⁴ Mem dị ọdi aḍighi ịphen, bịdi kọnmoghoghoom ni ọdaam mọ ạBabilon kụ ọḅem ghan mọ: “Ọdaam igbagbaar phọ mameel! Ọdi kạ́miine mun rꞌoniin oye.

⁵ Ọmoogh-we phọ makureri ịikpo ạbukaraph ạbudaam mọ,

⁶ bụphe rꞌọghagh ologhi ọmiine bọ we phọ kụ rꞌamem úsoph bọ ọgbiphoghom areelhe phọ bịdi mọkpar bọ opu.

⁷ Sịen ekureriom mọ, oomo aḅirini phọ roboom dọl ẹboroph rꞌẹepho kụ tọrobo oye rạmoor sụor iboh.

⁸ Ireeny ạḍiipioph rꞌọsaga phọ ạLebanon rebo ni esi emeel ọdaam mọ, ịdi eḍighi bọ ọlo olher ạbidi ólho mun, sịen ọdi magheel bọ!

⁹ “Ọmar iḍim raakolobian ghan ọḅeni ọdaam mọ ạBabilon mọ nạ masi. Aruwaloor phọ ạbuo ịikpo ịsien phọ reeghiraan ni bịn. Aruwaloor ạbudaam mọ reḅerenu sịphe ạsigada ọdaam mọ ạbidi.

¹⁰ Oomo phọ ạbidi rọmagh ghan ọḅeniom mọ, ‘Nyịidipho nạ madugh aani ịduon yoor modugh bọ! Nạ oniin ọnyo ayoor!

¹¹ Nyịna ughueniom ghan rꞌephegh ạrene, kụ nyịidipho nạ odi sịen ọmar iḍim mọ. Nạ ạmina ẹmina ịsu kụ azua ukpe ạsileegbem.’

¹² “Ọdaam mọ ạBabilon, okoriom-ẹenaan ạḍiroor dị rẹmu, nạ mạḍua kꞌạke ameel! Mem dị eten nạ ụkpar apu reelhe, kụ nyịidipho molher nyịna ude.

¹³ Nạ ụkururu ni ọsiiny osi kꞌạke ịlo oseere ạgada ọdaam ẹmha ạna esi ḍi ephoph epeleghom opuemi rạanaan phọ ịpe ẹkel bọ sịphe iboom epu oomo ịpheri phọ. Nạ ụutughian mọ nạ kạtol ịdipho ọdaam ạnyu ẹeḅaraph phọ ẹpe ephunom mọ sịphe ạrumugh phọ reekpomoghan ghan bọ.

¹⁴ Nạ ụḅem mọ nạ kạsiiny kꞌẹpe aruukuna ạnyu arukuaḍio phọ kụ ạtol ịdipho Ọpo Oomo Ịikpo phọ.

¹⁵ Kụ kpạripe, mọsighe nyịna oseere ude ẹpe eekuna iloghi ọmar iḍim.

¹⁶ “Iḍim mọ kụ emaghagha ephogh ghan nyịna. Bịdi kepuru ni mọ, ‘Ọphon kụ oye phọ ọpo aphighemi bọ de phọ kụ aḍighi ịdi ọmar awe aakpeka?

¹⁷ Ọphon kụ oye phọ ọpo aphiemi yogh bọ rạmha phọ kụ akiton bọ aḅirini phọ aḍighi de ịisaar, úseere bọ ẹereegh bụo ikoli phọ ọdi, úmeera bọ bịdi ogheleghu rạmha ạbidi ḍụghum?’

¹⁸ Oomo ạbudaam areelhe phọ ọmina yogh ologhi ịma ariiḍi ạbidi,

¹⁹ kụ nạ ọ́moogh aani oḍi kụ ruzu ạna otebeeny oroph rꞌawe dị ọze ẹgham ologhi ooni asighiigh, kụ ọozeghi ọlogh ude.

²⁰ Loor esi dị nạ aagulemi bọ eelhe phọ ạziom we ạna, nyịna kóḍi ịdipho ạbunon ạbudaam. Rꞌoniin ọlo ẹkaraph eghun phọ ạna kásugha.

²¹ Mẹteeny omiigh ọzeeghi awe phọ! Ạnmuny ọdaam mọ ọphon komugh ni loor ẹmhu ịkaraph ạburude ạburude phọ ạbidi. Rꞌoniin ọnyo ạbidi kạ́tol kẹn oghunyon ạramha oleenye ade phọ.”

Ẹnaan kepiemi ni Bạbilon

²² Ọmoogh-we oomo ịikpo phọ ạḅem mọ, “Mị kazuom ni apiemi Bạbilon kụ atuom nyọdi muphe. Mị ịyaar kásugheeny — mọ ạnmuny, mọ bụdi okpetenaan rꞌoniin kásugha. Mị Ọmoogh-we phọ mạḅem.

²³ Mị kakiton Bạbilon atene ọposo, kụ aruukughum etugh sịphe. Mị kaḅeerom Bạbilon ọzani dị ịyaar kásugheeny. Mị Ogbogh Ọmoogh-we oomo ịikpo phọ mạḅem!”

Ẹnaan kepiemi ni Asiria

²⁴ Ọmoogh-we oomo ịikpo phọ maghunyian mọ: “Ịpe mị magbiighi bọ kemite ni. Ịpe mị mạnya bọ oḍighi phọ koḍighi ni.

²⁵ Mị kapiemi ni bụo Asiria sịphe ade phọ ạmi Ịzirel kụ ạazeghi bịdi ạnyu ạraaḅaraph phọ ạmi. Mị kạtagharan ni we phọ ạmi ạsighe esi ọfeguma Asiria phọ rꞌesi asidool phọ ọkpaariom bọ bịdi orool phọ.

²⁶ Ịphen kụ ịdi mị agbiighi ịlo aḅirini phọ, kụ mị mạgbuton ḍịghaagh ịlo ọlhiom areelhe phọ.”

²⁷ Ọmoogh-we oomo ịikpo phọ ạnya ni oḍighi ịphen phọ; ọdi mạgbuton ḍịghaagh ọdi ịlo ọlhiom, kụ rꞌoniin oye kásophoghom nyọdi.

Ẹnaan kepiemi ni bụo aFilistia

²⁸ Ḍịen kụ adom dị ogbeel lhạ phọ ạḍiphe Ehaz ọdaam mọ amugh bọ.

²⁹ Weye aFilistia, ịkpara phọ ịpe ịguroghom bọ inyina mewunughian, kụ ọlo nyina ị́moogh ẹmhu oboh. Mem dị eniin ẹkaraph-ịyaar emugh, ẹnon ẹdi ẹkamakama epu ẹsighe esi phọ ọdi. Eghelhe ẹkaraph-ịyaar reḅom ghan elhom eru dị rẹpeeph ghan.

³⁰ Ọmoogh-we phọ kaḍighi okoriom arukulom awe phọ ọdi, kụ kameera ni bịdi ọrol dọl ẹereegh. Kụ ọlo, ọdi kamitiom ilhom ịgbakuro esi anyina ạbuo aFilistia phọ dị késugheeny rꞌoniin ọnyo anyina.

³¹ Ịlooghi kụ emoghi ẹlhom ọloghonaan ạḍighaagh, oomo anyina ạramha aFilistia! Ịtol esi ekpereghaan, oomo anyina! Ọotu ophugh ạḍua ni ẹpe ephunom mọ ratu — aḍighi ḍita awe ẹgham dị ọlo eepuph úlho sịphe ạsiadam mọ ạbidi.

³² Yira kọpagharanaan ika rụukpaany phọ aFilistia oru bọ? Yira kọḅeni bịdi mọ Ọmoogh-we phọ mạkan rezen ạkparamiom Zạyon kụ mọ awe phọ ọdi rọmiinom bọ kọmoogh aani ẹereegh.