Ạsuor 99 - Ạḍinya Iigbia

Ẹnaan kụ Ogbogh Ọdaam

¹ Ọmoogh-we phọ kụ ọdaam; kụ awe phọ ophiigha. Ọtolomi nyọdi ạgada opeleghiom rụukpaany aghuḍuul phọ kụ ade phọ ephiigha.

² Ọmoogh-we phọ ạbugh ni ẹpe Zạyon. Ọdi ạbugh apu oomo aḅirini phọ.

³ Tọrobo oye kaaseeny ḍigbogh aḍien eegu phọ ọdi. Ọdi oye iigbia.

⁴ Ogbogh ọdaam, nạ ạpomoghian ịpe ẹnighe bọ; nạ maseere egeny eḍighinom ịyaar ẹpe Ịzirel. Nạ mạsighe atu dọl aruukuan rꞌegeny eḍighinom ịyaar.

⁵ Iboom Ẹnaan phọ ayira Ọmoogh-we phọ. Iiseeny egbodo ạgada phọ ọdi. Ọdi oye iigbia.

⁶ AMozis rꞌEeron kụ ariil ạrikia ọdi, kụ ạSamuel oniin ọdi ạaḅereghi ghan nyọdi. Bịdi ụmagh ni Ọmoogh-we phọ kụ ọdi ạnaghanan bịdi.

⁷ Ọdi ạrol ologhi eekpoogh ọotu kụ ạḅaanaan bịdi; bịdi uuko ni iilogh phọ rꞌịto phọ ọdi ạngo bọ bịdi.

⁸ Ẹnaan ạmi Ọmoogh-we, nạ ụnaghanan ni we phọ ạna; nạ uḍeenaan ni bịdi mọ nạ Ẹnaan dị rạsar ghan kạwilenaan, ghạlamo nạ ụliom bịdi loor ịkaraph phọ ạbidi.

⁹ Iboom Ẹnaan phọ ayira Ọmoogh-we phọ kụ eeseeny sịphe eegbolom iigbia phọ ọdi. Ẹnaan phọ ayira Ọmoogh-we phọ oye iigbia.