Ạsuor 98 - Ạḍinya Iigbia

Ẹnaan kụ Ọdaam Aḅirini Phọ

¹ Ịmooraan ḍimoom ạḍuor Ọmoogh-we phọ. Ọdi maḍighi rạraar ịiḍaany, Esi ịikpo phọ ọdi rꞌịnyaam iigbia, ọdi mạkpar apu ẹpomoghian phọ.

² Ọmoogh-we phọ agbeelom ọkpar opu ọdi; ọdi aḍighi ịdi areelhe olegheri ịikpo ạpeleeny phọ ọdi.

³ Ọdi óbi ịpe ọdi aguanaan bọ we phọ Ịzirel, aḍeenaan bịdi omeelom rꞌẹphomoghian phọ ọdi rémuneen ghan bọ. Oomo awe tọrobo ekpisi mọmiin ọkpar opu Ẹnaan phọ ayira.

⁴ Ịyughuron rꞌibo eboom Ọmoogh-we phọ, weye oomo ade phọ. Ipoophe rọḍogh anyina ẹghiom ạnyu ẹmoor sụor.

⁵ Ịmoor eboom Ọmoogh-we phọ rꞌịma ẹḍogh loor ạrene.

⁶ Ipula ọkuodu rꞌaruuḍue; ịlooghi ḍịolho iboh ẹngo Ọmoogh-we phọ, ọdaam mọ ayira.

⁷ Mạphaan, nạ ọphiiny rꞌoomo ịlo edi loor ạna; nạ aḅirini phọ rꞌạbuphe orugh bọ pạ.

⁸ Ikpoolha rạghaagh anyina, nyina ạriphiiny phọ. Ịḅophoghan ẹmoor rꞌibo ẹngo Ọmoogh-we phọ, nyina aroogbolom mọ,

⁹ loor esi dị ọdi ratu ọda ade phọ. Ọdi kạda reelhe aḅirini phọ rꞌiiḅi ịiruen rꞌegeny ẹphamam.