Ạsuor 95 - Ạḍinya Iigbia

Ạḍuor oboomiom Ẹnaan

¹ Itu ọmoor sụor oboomiom Ọmoogh-we phọ, ọpo ruuko ghan bọ iyira kụ ạḅile bọ ụphel iyira atene.

² Ọpham ḍịseph oruom pạ aghisigh phọ ọdi, ọsighe sụor iboh ọmooraan nyọdi,

³ ịdi eḍighi bọ Ọmoogh-we phọ ogbogh ọdaam dị ạbugh ni iboom apu oomo ạrumugh.

⁴ Ọdi ạda oomo aḅirini phọ emiigh riḍiiny dị ẹkel ude kụ esi roogbolom dị ephophogh.

⁵ Ọdi ạda rịphiiny phọ, ịpe ọdi ạlhem bọ; rꞌạḍigharaghar ade phọ, ọdi rꞌaloor kụ ạlhem bọ.

⁶ Itu okpuḍian ọoḅereghi nyọdi, okpuḍian egbodo Ọmoogh-we phọ ọpo ụlhem bọ iyira.

⁷ Ọdi kụ Ẹnaan ayira; yira kụ awe ọdi; aḍita iyool-ịga dị ọdi rạngo ghan ịḅal. Iler rụru ẹnaghan ịpe ọdi ạḅem bọ:

⁸ “Kẹ́ḅaar mun ẹmhu, ịdipho ạburude phọ anyina ọḅaar bọ ẹpe Meriba, ịdipho bịdi ọrol bọ ḍio phọ ạḍiphe ẹpe Masa ẹpe ẹdala phọ.

⁹ Sịphe phọ bịdi ụdegh bọ ịmi ophogh, kụ ạri mọmiin ni ịpe mị aḍighinaan bọ bịdi.

¹⁰ Esi inyadi ạsia ịpher ịmi ọrolan rꞌawe phọ ạbuphe phọ. Mị ạḅem mọ, ‘Bụen phọ, pọ eeghe ọdo awe ọḅaar ẹmhu. Bịdi úmeera ụnaghanan iilogh phọ ạmi’

¹¹ Kụ ẹghagh ologhi ạmi kụ mị aghunya mọ, ‘Nyina kéḍigh de phọ, sịphe mị mụngo bọ inyina ophooghian.’”