Ạsuor 94 - Ạḍinya Iigbia

Ẹnaan kụ Oogboom Ịiruen oomo awe.

¹ Ọmoogh-we, nạ kụ Ẹnaan dị rạliom ghan we; ḍeenaan ophin ologhi phọ ạna.

² Nạ kụ oogboom ịiruen oomo awe; ḅetenu ạngo bụphe ophoophe bọ loor ịlo ẹkpianaan bịdi.

³ Kꞌạpur amem kụ ẹdi awe ẹkaraph eḍighinom kọmoogh ghan bọ ọḅaal ologhi? Kꞌạpur-aḍio, Ọmoogh-we?

⁴ Kꞌạpur amem kụ ẹdi awe ạsipioghom kọḅaar ghan bọ ẹmhu kụ oobagaam ịkaraph phọ ạbidi?

⁵ Bịdi ọozighiḍi weye phọ ạna, Ọmoogh-we; bịdi ọgbiphoghom we dị oḍighi bụo ạna.

⁶ Bịdi ọze rukpukele ạnmariir rꞌạbunyigo, kụ ọḅaram ruuruen dị odi sịphe ade phọ ayira.

⁷ Bịdi ọḅem mọ, “Ọmoogh-we phọ iyoor ụ́miin; Ẹnaan phọ Ịzirel ípogh ị́logh elegh.”

⁸ We ạmi, uḍighi ika kụ nyina eḍighi ighiil aruwelologhi? Kꞌạpur amem kụ nyina ẹtuugha?

⁹ Ẹnaan kụ ẹlhem reḅeri — ọdi kátue ạnaghan ḍụghum? Ọdi ạlhem riḍien ayira — ọdi kạ́miin ḍụghum?

¹⁰ Ọdi ạḅaaghiom reelhe — ọdi bịdi kạ́liom ḍụghum? Ọdi kụ ọtughemia oomo awe — ọdi mạar ólhegheri ḍụghum?

¹¹ Ọmoogh-we phọ alegheri ni ịlo bịdi rọotughian; ọdi alegheri ni rigbiom ạbidi mọ oopho ni bịn.

¹² Ọmoogh-we, ọpo eeghe ọḅaal ologhi dị odianaan oye dị nạ kụ aromoghiom, ọpo nạ ạtughemi bọ ologh phọ ạna.

¹³ Nạ ạngo nyọdi ophooghian esi ariiḍio ịiḅaghami tụtu oguph ooni osiphom awe ẹkaraph eḍighinom ịyaar.

¹⁴ Ọmoogh-we phọ kạ́ḅitonaan weye ọdi; ọdi kạ́bile ạ́ḍua we dị oḍighi bụo ọdi.

¹⁵ Iiḅi ịiruen phọ kẹḅile ẹtol sịphe aruutu ịiruen, ḅịle oomo awe aruukuan kọmeeraam ni.

¹⁶ Ạnhian kụ ụmeeraam ịmi mem mọ mị eenan bọ rꞌawe ẹkaraph eḍighinom ịyaar? Ạnhian kụ uḍighan ịmi mem mọ mị eenan bọ rꞌawe ạsipioghom mọ?

¹⁷ Mụghumo Ọmoogh-we phọ kụ ịmi ḍịghaagh ụ́loghonaan bọ, ọbo mị maagborion akeel de oḅoorian.

¹⁸ Mem dị mị ạḅem mọ owol ạmi rạkorom, ẹphomoghian phọ ạna rémuneen ghan bọ, Ọmoogh-we, kụ ịpham ịmi ẹmeremi.

¹⁹ Tọrobo amem lọ mị ạaḅaghamian loor ạḅile ạmoogh oḅio kaph-kaph, nạ ụudereghi ịmi ạḅile ụngo ịmi ọḅaal ologhi.

²⁰ Nạ ọ́moogh mụḅoph rꞌawe ịkaraph ịiruen dị rọmeremi ghan ịkaraph ịiruen,

²¹ we dị omite ịkaraph aruuzue ịlo ọphuenom abugey awe, kụ ọḅile ozu ịḅaal oye dị mạar ụ́piom.

²² Kụ ọlo Ọmoogh-we phọ rụgbaanaan ghan ni ịmi; Ẹnaan ạmi riikpereghi ghan ni ịmi.

²³ Ọdi kạliom ni bịdi loor ẹkaraph eḍighinom ịyaar phọ ạbidi kụ apiemi loor ạsipioghom mọ ạbidi; Ọmoogh-we Ẹnaan phọ ayira kapiemi ni bịdi.