Ạsuor 91 - Ạḍinya Iigbia

Ẹnaan Aḍibuo ayoor

¹ Tọrobo ọlo ạghi kꞌỌmoogh-we phọ oḍigh uba, tọrobo ọlo ạrolan rꞌeekpereghian Ọkaraghi Egbogh Ẹnaan phọ,

² katue ni ạḅeni nyọdi mọ, “Nạ kụ ọsuaram ạmi rꞌaḍibuo ạmi. Nạ kụ Ẹnaan ạmi, esi ạna kụ ẹdi mị ạkpasi emooph ạmi.”

³ Ọdi kạmaar ri ạpham nyịna esi oomo ịkaraph ạraraar lọ ạaghian rꞌesi oomo ịkaraph ạreezegh aḍuugh-aḍuugh.

⁴ Ọdi kaakpereghiom nyịna raphaaph ọdi; nạ kạmaar ri ạtol sịphe ẹphamam mọ ọdi; amabi-ólho phọ ọdi kaakpereghi ni nyịna ạḅile ạphel nyịna.

⁵ Nạ kákiilaan ịyaar aḍiigu ḍughul mꞌekperenom ozuom ootaany,

⁶ mꞌẹkaraph ẹzegh dị ẹḅukian pạ ufiri phọ, mꞌịkaraph dị ẹze ghan ootaany.

⁷ Oniin ọonir awe komeel li omugh ọogaany ạna, ḍioph ọonir okoom nyịna, kụ ịyaar nyịna kéḍighi.

⁸ Nạ kapogh kụ ạmiin ịdi kọliom we ẹkaraph eḍighinom ịyaar.

⁹ Nạ maḍighi Ọmoogh-we phọ ọsuaram ạna, Ọkaraghi Egbogh Ẹnaan phọ aḍibuo ạna.

¹⁰ Kụ iḍighi kụ ịyaar dị ị́nighe nyịna kẹ́gur, ịyaar ẹgham kétuman kꞌạna.

¹¹ Ẹnaan keseere rụukpaany phọ ọdi ephogh ghan nyịna ọphel ạna tọrobo ekpisi lọ nạ ạghi.

¹² Bịdi kokori okoph nyịna ọbo nạ kạnmighima ghan bọ owol loor aḍighiigh.

¹³ Nạ kạazeghi ạnam-dịka rꞌạrakaraph ạraraar, ạnam-dịka dị rẹlayaghuan rꞌạrakaraph ạraraar dị rẹze ghan we.

¹⁴ Ẹnaan ẹḅem mọ, “Mị kạpel li bụphe ụphomoghian bọ ịmi ạḅile aakpereghi bụphe mọlhogh bọ elegh mọ mị kụ Ọmoogh-we phọ.

¹⁵ Mem lọ bịdi ụmagh ịmi, mị kạnaghanan ni bịdi; mem lọ bịdi odi esi ịiḅaghami, mị kạtolan ni rꞌạbidi. Mị kạtagharan ni bịdi ạḅile akueni bịdi.

¹⁶ Mị kanmoom bịdi kụudoony aghuḍum; mị kạpel li bịdi.”