Ạsuor 9 - Ạḍinya Iigbia

Ọngo ạḍiseph Ẹnaan ịlo iiḅi ịiruen ọdi

¹ Ọmoogh-we, mị kaboom ni nyịna rꞌoomo ologhi ạmi, ạgbaaghiom ghan oomo iiḍighi aruugu phọ ạna.

² Rꞌọḅaal ologhi, mị kabo ghan iboh esi ạna, ạḅile kẹn ạmoor sụor aboomiom ḍien phọ ạna, Ọkaraghi Egbogh Ẹnaan.

³ Mem lọ nạ amite, ạbumulogh-ḍien phọ ạmi oḅula ọman bịn omeleghu ude omuughu.

⁴ Nạ kụ raagbo ghan bọ ịiruen dị esel. Nạ masoph erugh ugheelemi ịmi.

⁵ Nạ mạḅaam oomo areelhe phọ kụ apiemi bụo ạsipioghom mọ. Nạ magbuurogh siḍien ạbidi kꞌagee-pọ.

⁶ Ạbumulogh-ḍien phọ ayoor momuneen. Nạ maphiemi ni rạmha phọ ạbidi ạman dị kọ̋otughian ghan mun bịdi.

⁷ Ọmoogh-we phọ ọdaam eelhe kꞌagee-pọ. Ọdi maselemi ni ạgada ọdaam eelhe phọ ọdi ịlo oogbo ịiruen.

⁸ Ọdi kạsighe ruukuan kụ ạdaam aḅirini phọ, kụ aagbonaan we ịiruen dị eeleeny.

⁹ Ọmoogh-we phọ kụ oghoph ạbuphe rọmiine yogh bọ rꞌesi ạaghian mem ịiḅaghami.

¹⁰ Bụphe olegheri bọ ḍien phọ ạna oḍuom nyịna ologhi. Ọmoogh-we, nạ rámutonaan ghan bụlo oru esi ạna.

¹¹ Ịmoor ghan sụor eboomiom Ọmoogh-we phọ, nyọpo ạda bọ ẹpe Zạyon. Ịgbaaghi eḍighinom ạraraar phọ ọdi ẹḅeni yogh we aḅirini phọ.

¹² Ọdi rạliom ghan weye lọ oḍighi ịkaraph bụnon, ọdi rạatughian ghan bụphe rọmiinom bọ, ówula emoghi phọ ạbidi.

¹³ Ọmoogh-we, ụnma ịmi ighirigiir, tụutughian ịminimiin phọ ịpe mị ạmiinom bọ esi ạbuphe ụlhogh bọ ịmi ḍien, kụ uphoophe ịmi ạsighe ọnhu aḍuugh,

¹⁴ pịdi mị ạghaaph aabagaam nyịna pạ ogbo ạnmanyaan phọ aJeruselem, mị aboom kẹn pẹleeny phọ ạna.

¹⁵ Oomo areelhe phọ mosumughu ologhi ạghele phọ bịdi oguphogh bọ. Bịdi momeleghu ịseki phọ bịdi olhereghi bọ.

¹⁶ Ọmoogh-we phọ maḍighi ịdi molhegheri nyọdi loor iiḅi ịiruen phọ ọdi asoph bọ. Bụo ạsipioghom mọ momeleghu siphil phọ ịpe bịdi ọkpamaghi bọ.

¹⁷ Aḍuugh kụ ịikpia ạbuo ạsipioghom mọ rꞌoomo areelhe phọ ịpe owula bọ Ẹnaan.

¹⁸ Kóomo amem kụ ẹdi kobula uwekulom. Oḍuom-ologhi uwekulom kápe kꞌagee-pọ.

¹⁹ Ọmoogh-we, ḅetenu kámeera mun oye ạkpar apu nyịna. Kpookpomoghi oomo areelhe phọ aagbonaan bịdi ịiruen.

²⁰ Ọmoogh-we, lọgh eepuph loor ạbidi; pịdi oomo areelhe phọ olegheri mọ bụno oopho awe dị romugh ghan ni.