Ạsuor 89 - Ạḍinya Iigbia

Ạḍuor amem dị ịiḅaghami edi eelhe

¹ Ọmoogh-we, mị kạmoorom ghan sụor ịlo ẹphomoghian phọ ạna rémuneen ghan bọ mị kagbeelom ghan mabi-ólho phọ ạna kꞌagee-pọ.

² Mị alegheri ni mọ ẹphomoghian phọ ạna kẹtol oomo amem, mọ amabi-ólho phọ ạmeera bịn ịdipho okuaḍio.

³ Nạ ụḅem: “Mị maghiran ịyo rꞌoye phọ mị ạsaḅar bọ; mị maghunya ạngo otelhedom mọ ạmi Devid mọ,

⁴ ‘Ẹemara ẹemara ạna kụ keḍighi ghan ọdaam; mị kạmaar ri ạpam ẹemara ẹemara ạna kꞌagee-pọ.’”

⁵ Ạsike phọ rẹmoorom oḍighi ịiḍaany phọ nạ raḍighi bọ; rẹmoorom mabi-ólho phọ ạna, Ọmoogh-we.

⁶ Rꞌoniin ólho kꞌạke dị ạghigh nyịna, Ọmoogh-we; rꞌoniin sịphe ạruukpaany phọ odi bọ kꞌạke óoleeny nyịna.

⁷ Roghiilaan ni nyịna sịphe ookpomoghan ạbuo ạdol iigbia phọ; ḅịle oomo ạbidi ọlogh nyịna eghuan.

⁸ Ọmoogh-we Ẹnaan Oomo Ịikpo, oye ólho dị ạbugh aaleeny nyịna; esi oomo ạraraar nạ ọ́moogh mabi.

⁹ Nạ kụ ụda rịphiiny phọ ẹmoogh bọ ni ịnyaam; nạ kụ rạpoomi ghan mem lọ oologh ramite.

¹⁰ Nạ ạgur nonom mọ oghol bọ mọ Rehab aghiigh; rꞌiboom mọ ịikpo phọ ạna nạ ạkpar apu bụmulogh-ḍien ạna.

¹¹ Ạke phọ ọlo ạna, rꞌade phọ kẹn; nạ kụ ụlhem aḅirini phọ rꞌoomo ạraraar phọ edi bọ.

¹² Nạ kụ ụlhem ephunom rꞌesoorom; Eegum aTabor rꞌEegum ạHermon ẹmoor sụor iboh ịlo oboomiom ạna.

¹³ Nạ ạmoogh ni iboom ịikpo; ịikpo phọ ạna ẹbugh iboom.

¹⁴ Ọmar phọ ạna odimom ruukuan rꞌigey ịiruen; oomo ịlo nạ aḍighi reḍeenaan ghan ẹphomoghian rꞌébi ghan oguan.

¹⁵ Pọ eeghe ọḅaal ologhi dị odianaan we phọ rooseenyom ghan bọ nyịna rꞌạsuor, bụphe odimom bọ ḍịḅaal ọnma ighirigiir phọ ạna.

¹⁶ Loor ẹmhu ạna, bịdi rọmoogh ghan iboh oomo aḍio, ḅịle bịdi ooseeny nyịna esi ẹnighe phọ ạna.

¹⁷ Nạ kụ ụkparami iyoor; esi ẹphomoghian ạna kụ nạ ụngo iyoor ọkpar opu.

¹⁸ Nạ kụ ụsaḅar ọpelia ayoor, Ọmoogh-we; nạ kụ ụngo iyoor ọdaam, Oye Aghuḍuul phọ Ịzirel.

Oguanaan Ẹnaan esi aDevid

¹⁹ Esi uḍien mem dị eten nạ ụḅeni butelhedom mọ ạna ọmoogh bọ omeeraam mọ: “Mị mạlhoghonaan ḍịghaagh okakara ọnyo ẹgham; mị mạsaḅar nyoniin sịphe aḍita awe phọ ạtolomi ạgada ọdaam ẹmha.

²⁰ Mị maḍighi otelhedom mọ ạmi Devid ọdaam kụ ạsagharan ẹmhu ọdi mụnum iigbia.

²¹ Ịnyaam ạmi kẹtolan ni nyọdi oomo amem, ịnyaam mọ ạmi kẹngo nyọdi ịikpo.

²² Ạbumulogh-ḍien ọdi kótue ọkpar opu nyọdi; ạbukaraph awe kóbinighiom nyọdi.

²³ Mị kạze bụmulogh-ḍien ọdi, kụ akiigh tọrobo oye lọ ạlogh nyọdi ḍien.

²⁴ Mị kạpomoghian nyọdi kụ aḍighi ịpe mị aguanaan bọ nyọdi; mị kạngo nyọdi ọkpar opu oomo amem.

²⁵ Mị kạteghe ni eelhe phọ ọdi emiigh kꞌỌphiiny Meditarenian kụ esi Ọphiiny aYufratis.

²⁶ Ọdi kụḅeni ịmi: ‘Nạ kụ ọde ạmi rꞌẸnaan ạmi. Nạ kụ eekpereghiom ạmi rꞌọpelia ạmi.’

²⁷ Mị kaḍighi nyọdi ọkpana ọony ạmi, ọkar ogbogh esi oomo ạraalha.

²⁸ Mị kaḍighi ghan oguanaan lọ mị ạmoogh rꞌọdi amitiom, kụ ịyo phọ ạmi rꞌọdi kẹtol kꞌagee-pọ.

²⁹ Ẹemara ẹemara phọ ọdi kẹtol bịn ịdipho okuaḍio; ọnyo ẹemara ẹemara ọdi kụ kaḍighi ghan ọdaam eelhe.

³⁰ “Kụ ọlo eḍighi ịyaar dị ọony ọony ọdi kụ ụ́naghanan iilogh phọ ạmi ḅịle ụ́tolan ọdaphan ịto phọ ạmi,

³¹ Eḍighi ịyaar dị bịdi ọḅitonaan oromoghiom mọ ạmi ḅịle ụ́daph ịtooghi phọ ạmi,

³² pọ mị kạliom bịdi loor ịkaraph phọ ạbidi; mị kaḍighi ịdi bịdi kọmiinom esi ạsipioghom mọ ạbidi.

³³ Kụ ọlo mị kạ́bile ọphomoghian aDevid; kạ́bile oḍighi ịpe mị aguanaan bọ nyọdi.

³⁴ Mị káagbonyon ịyo phọ mị aghiran bọ rꞌọdi; mụghumo ọoḅemion oniin sịphe aruguanaan phọ ạmi esi ọdi.

³⁵ “Amem bịn kụ ẹdi mị maguanaan ghan rꞌaḍien iigbia phọ ạmi: mị kạ́gbaam ọkpe Devid.

³⁶ Ọdi kạmoogh ghan nmụny nmụny, ḅịle mị kạmaar ri apogh eelhe phọ ọdi ịduon phọ erumuḍio rẹmu bọ ni.

³⁷ Kẹtol bịn ịdipho ụnwanyu, ogey ọgbaanaan phọ ọpo odi bọ kꞌạke.”

Ọkunuma loor emeel ọdaam mọ

³⁸ Kụ ọlo nạ rapinom ologhi ọdaam mọ nạ ạsaḅar bọ; nạ masuma kụ akel nyọdi.

³⁹ Nạ maagbonyon ịyo phọ nạ aghiran bọ rꞌotelhedom mọ ạna kụ atoph eghoony ọdaam ẹmha phọ ọdi ologhi ọgbudu.

⁴⁰ Nạ malhereghi iikpe ẹmha phọ ọdi, ạḅile ạpueghi oghoony phọ.

⁴¹ Oomo abuteneneen romiighi ruphua phọ ọdi; oomo amatuman rọnughe ghan nyọdi ẹka.

⁴² Nạ mạngo ọkpar opu phọ bụmulogh-ḍien ọdi; nạ maḍighi ịdi ologhi ạbidi mạḅaal.

⁴³ Nạ madughe reenema ẹgham mọ ọdi bịn ị́moogh mun ịyaar oḍighinom ạḅile aḍighi ịdi mọkpar opu nyọdi risigh ẹgham.

⁴⁴ Nạ mạar nyọdi ḍughule ịikpo phọ ọdi, ạḅile agboton ạgada ọdaam ẹmha phọ ọdi alher ude.

⁴⁵ Nạ maḍighi ịdi ọdi mạkpo eloogh ạḅile aakpereghiom nyọdi umugholoor.

Ịiḅereghi ọtagharan

⁴⁶ Ọmoogh-we, nạ kạbooghi loor ạna kꞌagee-pọ ḍụghum? Ophin ologhi phọ kạtol ghan oomor ịdipho ạnian ḍụghum?

⁴⁷ Tụutughian ekulha amem mọ aghuḍum mọ ạmi kạtol bọ; tụutughian mọ nạ ạlemom we iphulupul dị kemugh ni.

⁴⁸ Ọghen oye kụ odi dị kámugh? Ika kụ ẹdi oye kaseere loor kụ akpetenaan ḍuugh rꞌoḍi?

⁴⁹ Ọmoogh-we, edi ẹghen ẹḅel eḍeenaan ẹphomoghian phọ ạna? Edi ẹghen aruguanaan phọ nạ aguanaan bọ Devid?

⁵⁰ Kábula ịpe mụgilaam bọ ịmi otelhedom mọ ạna, ịpe mị ạkparagham bọ itonyonaan ạbuphe Ẹnaan úlegheri bọ.

⁵¹ Ạbumulogh-ḍien ạna mọsinoghom ọdaam mọ nạ ạsaḅar bọ ịghor, Ọmoogh-we; bịdi ọsinoghom nyọdi ịghor tọrobo ekpisi lọ ọdi ạghi.

⁵² Iboom Ọmoogh-we phọ kꞌagee-pọ. Ẹrol li ịdipho! Ẹrol li ịdipho!