Ạsuor 86 - Ạḍinya Iigbia

Ịiḅereghi ọloghonaan ạḍighaagh

¹ Ụnaghanan ịmi, Ọmoogh-we, kụ ụphagharanaan ịmi, loor esi dị ọloghonaan ạḍighaagh ịmi úlho kụ mị madugh.

² Ụphel ịmi ạsighe esi aḍuugh, loor esi dị mị ameeraam ni nyịna; ụphel ịmi, loor esi dị mị otelhedom ạna kụ mị ạkpasi emooph ạmi esi ạna.

³ Nạ kụ Ẹnaan ạmi. Ụnma ịmi ighirigiir; mị ạaḅereghi nyịna oomo aḍio.

⁴ Ḅạalami ologhi otelhedom mọ ạna, Ọmoogh-we, loor esi dị ịiḅereghi phọ ạmi ẹki ni ạnyu ẹteeny nyịna.

⁵ Nạ ạnighe ni esi ayoor kụ ạsar ghan ịkaraph rạbilenaan; ẹphomoghian phọ ạna rémuneen ghan bọ emuzanaan bụlo rọoḅereghi ghan nyịna.

⁶ Nạghan, Ọmoogh-we, ịiḅereghi phọ ạmi; nạghanan emoghi ọloghonaan ạḍighaagh phọ ạmi.

⁷ Mị ạmagh nyịna mem ịiḅaghami loor esi dị nạ rạnaghan ghan ni ịiḅereghi ạmi.

⁸ Ẹnaan lọ ẹrol ịdipho ạna ílho, Ọmoogh-we; rꞌoniin kőḍighi ghan ịpe nạ maḍighi bọ.

⁹ Oomo areelhe phọ ịpe nạ mạlhem bọ kotu okpuḍughian risigh ạna; bịdi koboom igbogh phọ ạna.

¹⁰ Nạ ọkar ogbogh kụ raḍighi yogh ghan rạraar ịiḍaany; nạ bịn kụ Ẹnaan.

¹¹ Ụtughemi ịmi, Ọmoogh-we, ịlo nạ rạwa mọ mị uḍighi, bịn mị kạnaghanan ni agey; ụtughemi ịmi okumu ạna agey.

¹² Mị kaaseenyom nyịna rꞌoomo ologhi ạmi, Ọmoogh-we Ẹnaan ạmi. Mị kagbeelom ghan ni igbogh phọ ạna kꞌagee-pọ.

¹³ Ẹphomoghian phọ ạna rémuneen ghan bọ esi ạmi ẹbugh ni iboom. Nạ mụphel ịmi ạsighe loor aḍuugh rꞌoḍi phọ.

¹⁴ Awe ophoophe aloor rotu esi ạmi, Ẹnaan; aḍita awe asighiton rọwa oghiigh ạmi, awe dị ụ́maghami nyịna ịyaar.

¹⁵ Kụ ọlo nạ, Ọmoogh-we, nạ kụ Ẹnaan ọnma ighirigiir rꞌẹphomoghian, oomo amem rạkparam ghan, oomo amem rạmoogh ghan igbiririph, ọ́moogh mabi.

¹⁶ Kiton usoman ịmi ạḅile ụnma ịmi ighirigiir, ụkparami ịmi ạḅile ụphel ịmi, loor esi dị mị rakumu nyịna ịdipho onhiin ạmi akumu bọ.

¹⁷ Gananami ẹnighe phọ ạna uḍeenaan ịmi, Ọmoogh-we; umugholoor kasiph ni bụphe ụlogh bọ ịmi ḍien mem dị bịdi ọmiin mọ nạ mụngo ịmi ịidereghi rꞌạpeleeny!