Ạsuor 85 - Ạḍinya Iigbia

Ịiḅereghi ịma ạdol eelhe

¹ Ọmoogh-we, nạ mạnma ni ighirigiir de phọ ạna; nạ mạḅile ạngo Ịzirel ẹelha.

² Nạ mawula ịkaraph awe phọ ạna kụ ạsar ạbilenaan sịpioghom mọ ạbidi

³ Nạ ụwile ọghagham ạbidi ologhi ạḅile ạphamaghan ọghologhol ọghagh-ologhi phọ ạna.

⁴ Uḅulemi iyoor, Ẹnaan ọpelia ayoor, ạḅile ạwile ọmoogh aḍikia esi ayoor.

⁵ Nạ kụghagham iyoor ologhi kꞌagee-pọ ḍụghum? Ophin ologhi ạna kámuneen mun ḍụghum?

⁶ Ḅịle ụusa iyoor, bịn yoor, awe phọ ạna, koboom ni nyịna.

⁷ Uḍeenaan iyoor ẹphomoghian phọ ạna rémuneen ghan bọ, Ọmoogh-we, kụ ụngo iyoor pẹleeny phọ ạna.

⁸ Mị rạnaghan ni ịpe Ọmoogh-we Ẹnaan phọ rạḅem bọ; ọdi uguanaan iyoor awe phọ ọdi, ẹepho, eḍighi mạar lọ yoor úḅula mun reten élegheri-ịyaar phọ ayoor.

⁹ Ọkar agey ọdi ạnya ni ọphel ạbuphe ọlogh bọ nyọdi eghuan, ḅịle ạpeleeny phọ ọdi kạtol li sịen ade phọ ayoor.

¹⁰ Ẹphomoghian rꞌomeeraam kụ ẹḅophan; aruukuan rꞌẹepho keezuanaan ni.

¹¹ Ọḅogh aloor ọngo phọ oye kạḍua sịen ade asi kꞌạke; kụ aruukuan phọ Ẹnaan ẹḍua kꞌạke esoor sịen ade phọ.

¹² Ọmoogh-we phọ kạḅile ụngo iyoor ẹelha, kụ ade phọ emitiom igey ibugha.

¹³ Aruukuan keḍia risigh Ọmoogh-we phọ kụ eseleminaan eten nyọdi.