Ạsuor 83 - Ạḍinya Iigbia

Ịiḅereghi ọkpar opu ạbumulogh-ḍien Ịzirel

¹ Ẹnaan, káḅoorian, kạ́meera eniin esi bịn, kákpomori ọnhu.

² Mịin. Ạbumulogh-ḍien ạna mọnya ịkaraph, ḅịle bụphe ọlogh bọ nyịna ḍien phọ rọḅaar ẹmhu.

³ Bịdi romiteghunaan ịkaraph aruzue we phọ ạna; bịdi roopuruan oḍighi ịkaraph we phọ nạ aakpereghi bọ.

⁴ Bịdi ọḅem bọ, “Itu oḍighi ịdi yira kopiemi eelhe ạbidi, ọbo owula Ịzirel kꞌagee-pọ.”

⁵ Bịdi mọḅoph ọnhu ọḅoph ologhi ozuan ạna:

⁶ awe Idom rꞌawe Ịsmael; awe ạMoab rꞌawe aHegar;

⁷ awe aGebal rꞌAmon rꞌẠmalek; rꞌạbuo aFilistia rꞌaTaya.

⁸ Bụo Asiria mọdaphan bịdi; bịdi oḍighan agey weye Amon rꞌạMoab, nmụny ạnmuny phọ ạLot.

⁹ Ḍighi bịdi ịdipho nạ aḍighi bọ we ạMidian phọ, ḅịle rꞌịpe nạ aḍighi bọ Sisera rꞌaJabin sịphe Ọphiiny ạKison.

¹⁰ Nạ ụkpar apu bịdi ẹpe En Dor, kụ aḍizu ạbidi ẹḅoroghu sịphe ade phọ.

¹¹ Ḍighi buḍiemiom mọ ạbidi ịdipho nạ aḍighi bọ Oreb rꞌaZeeb; binighiom oomo awe phọ ạbidi ọdaaghi bọ ịdipho nạ aḍighi bọ Zeba rꞌaZalmuna,

¹² bụphe ọḅem bọ mọ, “Yoor kọsighenaan siloor ayoor de phọ eḍighi bọ de Ẹnaan.”

¹³ Wạawalami bịdi ịdipho ophugh, Ẹnaan, ịdipho ịpherepher dị ookuugh aphula aroḅologhi.

¹⁴ Ịdipho ạnian reemor ghan bọ eḍum, ịdipho anem ạnian rẹsu ghan bọ rạaḅaraph phọ,

¹⁵ poroghom bịdi ookuugh phọ ạna ạsighe, kụ ạsighe oghim mọ ạna aḍighinom ịlo aḍiigu kesiph bịdi.

¹⁶ Kpereghiom sighisigh ạbidi umugholoor, Ọmoogh-we, ạḅile aḍighi ịdi bịdi kologhoma ịikpo phọ ạna.

¹⁷ Owinighiom bịdi kụ aḍiigu esiph bịdi kꞌagee-pọ! Bịdi omughom rꞌaroofola dị eekuna ílho!

¹⁸ Bịdi olegheri mọ nạ bịn kụ Ọmoogh-we phọ, ọkar oye ịtooghi oomo ịsien ade phọ!