Ạsuor 80 - Ạḍinya Iigbia

Ịiḅereghi ịlo ọosa eelhe

¹ Ụnaghanan iyoor, nạ Okoriom awe phọ Ịzirel; nạghan ịlo yoor kọkaaph, nạ Oḍiemiom iyool-ịga phọ ạna, nạ ọpo phọ ạrolom bọ ạgada igbogh phọ ạna ạnyu ạruukpaany aghuḍuul phọ.

² Gananami loor ạna, uḍeenaan iyoor ạbuo arughunughun phọ Ifraim rꞌạBenjamin rꞌạManase. Ḍeenaan ịnyaam mọ ạna, tue ụphel iyoor.

³ Ụsighe iyoor aḅulemi, Ẹnaan, uḍeenaan iyoor ọnma ighirigiir phọ ạna, bịn yoor kọmoogh ni pẹleeny.

⁴ Kꞌạpur amem, Ọmoogh-we Ẹnaan Oomo Ịikpo, kụ ẹdi nạ kạkagham ologhi ịiḅereghi awe phọ ạna?

⁵ Nạ mụngo iyoor dọl ọto mọ eḍighi eḍien, ogbogh ọphaal izin mọ ọphughol.

⁶ Nạ ụngo ọgel kụ areelhe phọ ekoom bọ ọtuan de phọ ayoor kụ eeghian ẹgham; ạbumulogh-ḍien ayoor ụsinoghom iyoor ịghor.

⁷ Ụsighe iyoor aḅulemi, Ẹnaan Oomo Ịikpo, uḍeenaan iyoor ọnma ighirigiir phọ ạna, bịn yoor kọmoogh ni pẹleeny.

⁸ Nạ ụpham oozin agrep amitenom ẹpe Ijipt; nạ uphorogh ịnon areelhe kụ ạzuph oozin agrep phọ sịphe ade phọ.

⁹ Nạ useleminaan esi lọ kọzuph ạsini phọ eḍigh ude, kụ eleeny oomo ade phọ.

¹⁰ Ọdi aakpereghiom ruugum mọ oghoph ọdi; ịla phọ eekpereghiom igbogh ịsaga phọ.

¹¹ Ọdi ạḅeenye ịla phọ esi Ọphiiny aMediterenian, kụ ẹḅile kẹn ẹteeny Ọphiiny aYufratis.

¹² Uḍighi ika kụ nạ anyu bọ oghoony phọ akoom bọ alher? Nyịidipho tọrobo oye lọ raten katue ni ami rughuuny agrep phọ.

¹³ Arophoropo lọ retelhe ịlo ạteeny kẹezeghi ni, kụ ilhom ịnam eleeghi.

¹⁴ Kiton uphogh iyoor, Ẹnaan Oomo Ịikpo. Tọl ẹpe kꞌạke uphogh iyoor. Tue ạphel we phọ ạna.

¹⁵ Tue ạmaar aphogh oozin agrep phọ nạ ạzuph bọ, ẹnum oozin phọ nạ aḍighi bọ ịdi ạnuun aḍum.

¹⁶ Ạbumulogh-ḍien ayoor mọlhogh nịan kụ osoph oler ude; poghom bịdi rꞌophin ologhi kụ aphiemi bịdi.

¹⁷ Mạar ạpham kụ aakpereghi we phọ nạ mạsaḅar bọ, eelhe phọ nạ ạkparami bọ.

¹⁸ Yoor kọ́ḍua mun esi ạna; umoonomi iyoor, bịn yoor kooseeny ni nyịna.

¹⁹ Ụsighe iyoor aḅulemi, Ọmoogh-we Ẹnaan Oomo Ịikpo. Uḍeenaan iyoor ọnma ighirigiir phọ ạna bịn yoor kọmoogh ni pẹleeny.