Ạsuor 77 - Ạḍinya Iigbia

Ịidereghi mem ịiḅaghami

¹ Mị amoghi amitiom egbodo Ẹnaan; mị amoghi amitiom, kụ ọdi ụnaghanan ịmi.

² Ịbadi amem ịiḅaghami mị ạaḅereghi aphoghomiom Ọmoogh-we phọ; oomo aḍughul mị aphoophe rạghaagh ạmi ạghiom ạnyu esi ịiḅereghi, kụ ọlo mị ụ́miin ịidereghi.

³ Mem dị mị ạatughian Ẹnaan, mị ạḅiphaan; mem dị mị azumeri ẹmhu esi ịiḅereghi, oḅio ịmi úlho mun.

⁴ Ọdi aḍighi ịdi mị ạrol ẹ́naani oomo aḍughul phọ; mịiḅaghami ịmi iboom dị mị útue ụ́ḅa.

⁵ Mị ạatughian ịlo ariiḍio ageedi ạḅile ạatughian sịa phọ ịpe meten bọ.

⁶ Mị ạrol ḍughul phọ iboom ịitughian; mị azumeri ẹmhu, kụ ịphen kụ ịdi mị apuruan loor ạmi:

⁷ “Ọmoogh-we phọ kughel li iyira kꞌagee-pọ? Ọdi kạ́ḅatan mun ekpeḍien úphogh iyira ḍụghum?

⁸ Ọdi mạwile ọphomoghian ayira ḍụghum? Oguanaan phọ ọdi ólho mun ḍụghum?

⁹ Ẹnaan mewula ọnma ighirigiir phọ ḍụghum? Ophin ologhi mạsighe esi ọnma ighirigiir phọ ọdi ḍụghum?”

¹⁰ Kụ mị ạḅem, “Ịyaar dị ephin esi ạmi iboom ịduon — mọ Ẹnaan ị́moogh mun ịikpo.”

¹¹ Mị kạatughian ni igbogh iiḍighi phọ ạna, Ọmoogh-we; mị kạatughian ni ịiḍaany phọ nạ aḍighi bọ mem mọ meten bọ.

¹² Mị kạatughian ni ịlo oomo ịpe nạ maḍighi bọ; mị kazumeri ẹmhu kụ ạatughian oomo igbogh iiḍighi phọ ạna.

¹³ Tọrobo ịyaar lọ nạ aḍighi, Ẹnaan, ẹḅaram iigbia. Ẹkaaneen ịyaar ílho dị eeleeny nyịna.

¹⁴ Nạ kụ Ẹnaan phọ reḍighi yogh ghan bọ ịiḍaany; nạ aḍeenaan igbogh phọ ạna igbo areelhe phọ.

¹⁵ Ịikpo phọ ạna kụ ẹdi nạ ạphelom we phọ ạna, nmụny ạnmuny ạJekob rꞌạJosef.

¹⁶ Mem dị ạrumuum mọ ẹmiin nyịna, Ẹnaan, aruugu asiph bịdi, kụ ẹeḅaghami sigher phọ.

¹⁷ Kụ okuaḍio phọ aaku ọlophia, ọomaany ạraph ẹpe okuaḍio phọ, kụ aḍio phọ ẹmepheghian oomo arikpisi phọ.

¹⁸ Ẹḍogh ọomaany phọ ạna emite, kụ ọmepheghian phọ asoor aḅirini phọ ịdipho ọtozi; ade phọ ekpereghaan kụ ephiigha.

¹⁹ Nạ arelhe ạnyu ooloogh phọ; nạ ạḅeeny ọphiiny phọ ạkel bọ, kụ rạda aruwol ạna ụ́miin.

²⁰ Nạ aḍiemiom we ạna ịdipho okoriom iyool-ịga, kụ aMozis rꞌEeron kụ ophogh ghan.