Ạsuor 75 - Ạḍinya Iigbia

Ẹnaan oogboom ịiruen

¹ Yoor rọngo ghan nyịna ḍịseph, Ẹnaan. Yoor rọngo ghan nyịna ḍịseph. Yoor rogbeelom ni dọl igbogh phọ ạna ọḅile rọkaaph ghan ịlo iiḍighi ịiḍaany phọ ạna.

² “Mị maseere ni mem ịiruen,” Ẹnaan kụ ịḅem, “kụ mị kasoph ni ọoruen dị aaleeny.

³ Ghạlamo ịduon oomo ạraraar lọ edi eye repiigha bọ ni; ade phọ kẹn bịn rẹdegh bọ ni, ephighiom ade phọ kẹmeera zim.

⁴ Mị rạḅeni ghan weye ạsipioghom mọ mọ kúpoophe ghan loor.

⁵ Mị rạḅeni ghan bịdi mọ ọwile obaga ghan phọ.”

⁶ Ịiruen rẹ́ḍua ghan emitenom mụghumo emeelom erumuḍio phọ kụ keru; rẹ́ḍua ghan ephunom mụghumo esoorom.

⁷ Ẹnaan kụ oogboom ịiruen dị rapume ghan buniin kụ kaghelemi buniin.

⁸ Ọmoogh-we phọ ạpam ọphaal ḍịghaagh ọdi, dị amuzeḍiom mụgbagara amiim ophin-ologhi phọ ọdi. Ọdi rạmeleghi ghan, kụ oomo ạbuo ạsipioghom mọ rọpughol ghan; tụtu ọokpanion ọman.

⁹ Kụ ọlo mị kásophe ọghaaph ghan ịlo Ẹnaan phọ ạJekob; mị kạmoor ghan sụor aboomiom nyọdi.

¹⁰ Ọdi kaḅonyon ịikpo ạbuo ạsipioghom mọ, kụ ạḅile ạkparami ịikpo awe aruukuan phọ.