Ạsuor 74 - Ạḍinya Iigbia

Ịiḅereghi ọtagharan eelhe

¹ Uḍighi ika kụ nạ ụḅitonaan bọ iyoor awe phọ ạna ịduon, Ẹnaan? Nạ kạkagham ologhi weye phọ ạna kꞌagee-pọ ḍụghum?

² Tụutughian bụphe nạ ạsaḅar bọ aseerian kꞌaḍiodiidi phọ, bụphe nạ amitiom bọ dọl ạrebene oḍighi awe phọ ạna. Tụutughian Eegum mọ ạZayon, esi phọ nạ mạrol ghan bọ ni mem.

³ Kịa ạmiin ịdi ạbumulogh-ḍien phọ ayira moogulemi Otu Ịiḅereghi phọ ạna ophiemi oomo ạraraar.

⁴ Ạbumulogh-ḍien phọ ạna mọlo ḍịolho ọkpar opu ologhi Otu Ịiḅereghi phọ ạna; bịdi mogimi sịlagba ạbidi sịphe.

⁵ Bịdi ụghigh we oḍighi ireeny dị roogboom ghan ireeny sikubu ạbidi.

⁶ Rꞌasikubu rꞌigbogh ịkanam ạbidi, bịdi mọgurogh obunughi oomo ạraraar dị ọkaam ireeny,

⁷ oogulemi Otu Ịiḅereghi phọ ạna kụ ọsu nịan. Bịdi mọopu esi phọ rooseeny ghan bọ nyịna.

⁸ Bịdi ụwa ni bịn oogulemi ayoor; bịdi mọsuughi nịan oomo ariisi iigbia sịphe ade phọ.

⁹ Oomo ạraraar elegh ạdol iigbia phọ ayoor mọsighiogh, ariil Ẹnaan phọ úsugha mun, kụ oye ólhegheri ọdo amem dị ịphen phọ kẹtol bọ.

¹⁰ Kꞌạpur amem, Ẹnaan, kụ ẹdi ạbumulogh-ḍien phọ ayoor kọtol ghan ọmilogh ạna? Bịdi kọopu ghan ni ḍien phọ ạna bịn kꞌagee-pọ ḍụghum?

¹¹ Eeghe kụ nạ ómeera mun bọ ọloghonaan ayoor ḍịghaagh phọ? Eeghe kụ nạ ạgbagha bọ rạghaagh phọ ạna ọman?

¹² Kụ ạri nạ maḍighi ọdaam mọ ayoor kꞌemiighom, Ẹnaan; nạ mụphel li iyoor ịbadi amem.

¹³ Ịnyaam ạna kụ ịdi nạ ạsighe bọ kụ adiom bọ mụum ọphiiny phọ aatughuḍi kụ ạgurogh rụmhu asinonom mọ ẹrol bọ ọphiiny phọ ạze.

¹⁴ Nạ ạgurogh rụmhu anonom mọ oghol bọ mọ ạLeviatan kụ ạngo iphulupul phọ ọdi mọ ịnam ẹdala phọ ạany.

¹⁵ Nạ aḍighi ịdi ạruunu adir rꞌebaraph ạmuum ekilogh; nạ aḍighi ịdi igbogh ạriphiiny emoopha yogh.

¹⁶ Nạ kụ ụlhem bọ ootaany rꞌaḍughul phọ; nạ kụ usereghi bọ erumuḍio phọ rꞌụnwanyu phọ sịdol phọ ạbidi.

¹⁷ Nạ kụ ụlhoghoḍi bọ rụuku ade phọ; nạ kụ umitiom bọ ghozogh rꞌunu.

¹⁸ Kịom ologhi, Ọmoogh-we, mọ ạbumulogh-ḍien phọ ạna rọmilogh ghan ni nyịna, mọ bịdi úlegheri Ẹnaan kụ momutonaan nyịna.

¹⁹ Kạ́ḅitonaan we phọ ạna ẹlhoghonaan ụmoogh bọ ạngo bụmulogh-ḍien phọ ạbidi; kábula we phọ ạna rọgbiphoghom bọ.

²⁰ Tụutughian ịyo phọ nạ aghiran bọ rꞌayoor. Ọwa-asighiton odi ni tọrobo ẹkul ade phọ lọ ufiri odi.

²¹ Kámeera mọ umugholoor asiph bụphe rọgbiphoghom bọ; ḍighi ịdi arukulom mọ rꞌawe ẹkparam mọ kooseeny ghan nyịna.

²² Zạamian ghan ni loor, Ẹnaan, kụ ạghaaph ịpe ạna. Legheri mọ awe dị Ẹnaan úlegheri rọmilogh ghan nyịna oomo aḍio.

²³ Úbula ghan ḍịaḅa oomo amem mọ ạbumulogh-ḍien phọ ạna, úbula ghan ḍịaḅa ạbumulogh-ḍien phọ ạna mem résoph bọ.