Ạsuor 72 - Ạḍinya Iigbia

Ịdi kọoḅereghinaan ghan ọdaam mọ

¹ Tụghemi ọdaam mọ oogbo ghan ịiruen phọ rꞌaruukuan; dian iiḅi ịiruen phọ ạna,

² pịdi ọdi ạdaam we phọ rꞌiiḅi ịiruen ạḅile apoghom bụphe awe rọgbiphoghom bọ rꞌaruukuan.

³ Ade phọ ẹmoogh ẹeḍiom, awe phọ ọrol dọl aruukuan!

⁴ Eḍighi ni ịdi ọdaam mọ kaagbo igey ịiruen ạngo rukulom mọ; eḍighi ni ịdi ọdi kạloghonaan ḍịghaagh bụphe ẹkparam bọ, ạḅile ạkpar apu bụphe rọgbiphoghom bọ bịdi.

⁵ Awe phọ ạna ooseeny ni nyịna oomo amem lọ ogogo phọ rạmu, oomo amem lọ ụnwanyu phọ rạngo ḍịḅaal phọ ọdi kꞌagee-pọ!

⁶ Ọdaam mọ ạrol mụdi ọlophia dị rạlophom iizo, mụdi oyiririph dị rạḅore ghan de phọ!

⁷ Ạdol aruukuan eganana mem aghuḍum mọ ọdi, ḅịle ẹeḍiom ẹrol ebia tụtu ụnwanyu phọ rạ́ngo mun ḍịḅaal phọ ọdi!

⁸ Eelhe phọ ọdi kẹḍua ni ọphiiny ẹteeny ọphiiny, emiigh Yufratis kụ esi ruukuna ade phọ.

⁹ Bụo areelhe ade ịisaar phọ kozumeri rụmhu risigh ọdi; ạbumulogh-ḍien ọdi kokpuḍughian kụ ooseeny nyọdi.

¹⁰ Ạbudaam mọ aSpen rꞌạbuphe odi bọ iigbom ạriphiiny phọ kọngo nyọdi ruunmo; ạbudaam mọ Arebia rꞌaSeba kọsighe rạraar otuomaan nyọdi.

¹¹ Oomo ạbudaam mọ kokpuḍughian risigh ọdi; kụ bụo oomo areelhe phọ okumu ghan nyọdi.

¹² Ọdi rạtagharan ghan rukulom lọ oru esi ọdi, rꞌạbuphe ẹkparam bọ kụ oghinom bọ.

¹³ Ọdi rạnma ghan ighirigiir bụphe odugh bọ rꞌarukulom mọ; ọdi rạpel ghan sighuḍum ạbuphe ẹkparam bọ.

¹⁴ Ọdi rạtagharan ghan bịdi esi ọgbiphoghom rꞌesi ọwa asighiton; asighuḍum ạbidi ẹman ni mạar esi ọdi.

¹⁵ Ọdaam mọ ạrol li ebia! Eḍighi ịdi kọngo nyọdi gol dị ọsighe ẹpe Arebia kụ oru. Eḍighi ịdi kọoḅereghi ghan nyọdi Ẹnaan oomo amem; kụ ạḍiseph Ẹnaan ẹteeny ghan nyọdi oomo amem.

¹⁶ Ịbiakpa emuza sịphe ade phọ ịdipho ịpe ạLebanon; awe oḍiza sịphe ạramha phọ, ịdipho ạroogho sịphe ade phọ!

¹⁷ Eḍighi ịdi ḍien ọdaam mọ kóbula, kụ aḍien phọ ọdi eeleghaan ịdipho erumuḍio phọ edi ghan bọ! Bụo oomo areelhe ọoḅereghi mọ Ẹnaan ẹseph aani bụno, ịdipho ọdi mạseph bọ ọdaam mọ!

¹⁸ Iboom Ọmoogh-we Ẹnaan phọ Ịzirel. Ọdi bịn kụ raḍighi yogh ghan rạraar ịiḍaany phọ ịphen.

¹⁹ Iboom ḍien oghur phọ ọdi kꞌagee-pọ. Oghur phọ ọdi amuza oomo aḅirini phọ. Ẹrol li ịdipho! Ẹrol li ịdipho!

²⁰ Ịphen kụ ekureriom ịiḅereghi phọ aDevid ọony phọ ạJesi.