Ạsuor 66 - Ạḍinya Iigbia

Ạḍuor oboomiom rꞌọsephom Ẹnaan

¹ Itu eeseeny Ẹnaan rꞌạḍiolo iboh, oomo aweye.

² Ịmoor eghueniom ḍien phọ ọdi; ẹngo nyọdi ḍịseph oghueniom.

³ Ịḅeni Ẹnaan: “Pọ eeghe oḍighi ịiḍaany dị nạ aḍighi. Ịikpo phọ ạna ẹbugh ni iboom dị ạbumulogh-ḍien ozumeri rụmhu egbodo ạna esi oghiilaan.

⁴ Tọrobo oye sịen ade phọ raaseeny ni nyịna; bịdi rọmoor sụor oboomiom ạna, bịdi rọmoor sụor oboomiom aḍien phọ ạna.”

⁵ Itu ẹmiin ịdi Ẹnaan meḍighi; ẹmiin ịiḍaany phọ ọdi igbo awe.

⁶ Ọdi akiton ọphiiny atene ḍịgharaghar ade; ạburude ạburude ayoor ụḅeeny ọphiiny phọ owol ade. Sịphe kụ ẹdi yoor ọmoogh iboh esi ịpe ọdi aḍighi bọ.

⁷ Ọdi ạda kꞌagee-pọ rꞌigbogh ọdi kụ anaan riḍien ọdi reelhe phọ. Ọḅaar ẹmhu kụ́tol ophoghom ọdi.

⁸ Iboom Ẹnaan ayira, oomo areelhe; iḍighi ịdi kọnaghan ḍịseph phọ anyina.

⁹ Ọdi kụ ạpham ghuḍum ayira kőmeera yira omeel.

¹⁰ Nạ muphogh ni iyoor ạmiin ạḅile ụuḅeghion iyoor, Ẹnaan; ịdipho ropoghom ghan bọ silva nịan, ịdipho kụ ẹdi nạ muphogh iyoor.

¹¹ Nạ ameera dị yoor omeel ḍiphil kụ ạḅam ḍigbogh adool rạman ayoor.

¹² Nạ ameera dị ạbumulogh-ḍien kụ ọkpar upu iyoor; yoor urelhe ghan ologhi ạnian rꞌaḍigho, kụ nyịidipho nạ mụsighe iyoor asiemi esi ạdol ẹereegh.

¹³ Mị kạpam ịinua ẹkia oguom ạnian kụ atumom pạ otu phọ ạna; mị kạngo ni nyịna ịlo mị aguanaan.

¹⁴ Mị kạngo ni nyịna ịlo mị ạḅem mem mọ mị ạrol bọ esi ịiḅaghami.

¹⁵ Mị kạngo iyool-ịga ịlo ọsu ịsiphe enmeny phọ; mị kạpighironom ẹkia ilephiri ạsinam rꞌạrutu-ịga, kụ ạmughi phọ kạki ẹpe okuaḍio.

¹⁶ Itu ẹnaghan, oomo ạbuphe oghueni bọ Ẹnaan, mị kịḅeni inyina ịpe ọdi muḍighinaan bọ ịmi.

¹⁷ Mị amoghiom nyọdi ọloghonaan ạḍighaagh; mị ạmoor sụor ạsephom nyọdi.

¹⁸ Mụghumo ịkaraph kụ ịdi mị ạatughian ghan bọ pạ ologhi phọ ạmi, Ọmoogh-we phọ ịmi mụ́naghanan.

¹⁹ Kụ ọlo Ẹnaan ẹkar ri ịnaghanan ịmi; ọdi mạnaghanan ịiḅereghi phọ ạmi.

²⁰ Mị ạseph Ẹnaan loor esi dị ọdi óghel ịiḅereghi ạmi, ḅịle kẹn ókikima ẹphomoghian phọ ọdi esi ạmi.