Ạsuor 63 - Ạḍinya Iigbia

Ọwa ghan Ẹnaan

¹ Ẹnaan, nạ kụ Ẹnaan ạmi, kụ mị rạwa ghan nyịna. Oomo eye phọ ạmi rẹwa ghan nyịna; ịdipho ade dị emoopha, ẹgharaghar kụ ạmuum úlho, uwaloor ạmi rạwa nyịna ịdipho ạmuum ọphughol.

² Ḍighi ịdi mị kạmiin nyịna sịphe otu eegu phọ ạna, mị ụmiin ịdi nạ ạbugh ạḅile ạmoogh eghuan.

³ Ẹphomoghian phọ ạna rémuneen ghan bọ kụ ịnighe epu ghuḍum, kụ iḍighi kụ mị kạseph ni nyịna.

⁴ Ịduon kụ ịdi mị kạseph ghan nyịna sịen mị ọdi bọ eye; mị kapoophe rạghaagh ạmi ạkiom ạnyu.

⁵ Uwaloor ạmi kale kụ ẹper ḅịle mị kạmoor sụor ọḅaal ologhi ooseenyom ạna.

⁶ Mị ạmina ẹmina mị rạatughian ghan nyịna; oomo aḍughul phọ mị rạatughian ghan ịlo ạna,

⁷ loor esi dị oomo amem nạ kụ rụlhoghonaan ghan ịmi ḍịghaagh, Sịphe uba araphaaph phọ ạna kụ ẹdi mị ạrol ạmoor sụor iboh.

⁸ Mị anyoronom nyịna kụ ạḍighaagh elhiom mọ ạna kụ ịpham ịmi.

⁹ Bụphe rọwa ghan bọ reten oghiigh ạmi komuughu okeel ọmar iḍim.

¹⁰ Kọze ni bịdi ghisigh ẹgham kụ ruzu ạbidi ilhom ịnam kụ kẹba.

¹¹ Loor esi dị Ẹnaan ẹngo nyọdi ọkpar opu, ọdaam mọ kabo ni. Bụphe oghunyaam bọ ḍien phọ Ẹnaan kooseeny nyọdi, kụ ịnhu ạbugbaam ọkpe kokpomori ni.