Ạsuor 62 - Ạḍinya Iigbia

Ọokpara omeeraam esi ạpeleeny Ẹnaan

¹ Rꞌọkparam kụ mị akori Ẹnaan ọphel ạmi; mị aḍuom ologhi nyọdi bịn.

² Ọdi bịn kụ uukpereghi ạḅile ụphel ịmi; ọdi kụ ọsuaram ạmi, kụ oye ịmi kụ́kpar úpu.

³ Kꞌapuraḍio kụ ẹdi oomo anyina kezuom ghan oye dị ụ́moogh ịnyaam úpu ọgbenegbene oghoony dị molhereghi?

⁴ Ịdi nyina rẹwa, ogboton ọdi dọl eghuan phọ ọdi; ọgba ọkpe kụ ịḅeeraan inyina. Nyina rẹḅa ghan ikpo ọnhu ạḍiseph, kụ ạri sịphe ologhi phọ anyina nyina retonyon ni nyọdi.

⁵ Mị aḍuom ologhi Ẹnaan bịn; mị ạkpasi oḍuom-ologhi phọ ạmi esi ọdi.

⁶ Ọdi bịn kụ uukpereghi ịmi ạḅile ụphel ịmi; ọdi kụ ọsuaram ạmi kụ oye kátue ạkpar upu ịmi.

⁷ Ọphel otene ạmi rꞌeghuan edi esi Ẹnaan; ọdi kụ ọpelia ạmi dị ạkpar; ọdi kụ aḍibuo ạmi.

⁸ Ịkpasi oḍuom-ologhi anyina esi Ẹnaan oomo amem, we ạmi. Ịḅeni nyọdi oomo ịiḅaghami phọ anyina, loor esi dị ọdi kụ esi-ịbooghian ayira.

⁹ Oomo awe ọkigh eniin amem aḍiphooghu; abugbogh rꞌạbubam iniin phọ ni, ụ́moogh ịyaar oḍighinom. Ḅạm bịdi ạnyu ọtoom ẹemor, bịdi ịyaar ụ́man; bịdi oophoogh opu ḍiphooghu.

¹⁰ Káseere ologhi ạna loor ọwa-asighiton; kágbi mọ ạsuo kạrolonaan ni nyịna esi ozirion ạraraar awe; ghạlamo ẹelha phọ ịḅile kụ ẹbugh, káḍuom ologhi ịpe phọ.

¹¹ Ịbadi amem mị mạnaghan ni ịdi Ẹnaan ẹḅem mọ ịikpo ịlo ọno bịn

¹² ḅịle mọ ẹphomoghian ọno edi ghan ni bịn. Nạ rꞌaloor, Ọmoogh-we, raanmo ghan ni ruunmo tọrotoro oye ịdi ẹkasian iiḍighi phọ ọdi.