Ạsuor 59 - Ạḍinya Iigbia

Ịiḅereghi ịlo oghoph

¹ Ụphel ịmi ạsighe esi ạbumulogh-ḍien ạmi, Ẹnaan ạmi; ụaaghi ịmi esi ạbuphe ruzuom bọ ịmi.

² Ụphel ịmi ḍịghaagh ịkaraph awe; ụphel ịmi esi ạbuphe rọwa bọ oghiigh ạmi.

³ Mịin. Bịdi ọḅona rokori ghan oghiigh ạmi. Ịkaraph awe rookpomoghan ozuom ạmi. Ụ́tuan ọpioman ạmi ḅịle mꞌịkaraph lọ mị aḍighi.

⁴ Mị mạar ụ́piom, Ọmoogh-we, kụ bịdi oogborion bọ ọmeregha ariisi phọ ạbidi.

⁵ Mẹera, Ọmoogh-we Ẹnaan Oomo Ịikpo, aru uḅegh ịmi; mịin rꞌaloor ạna, Ẹnaan Ịzirel. Ḅetenu ạliom bụphe Ẹnaan úmeeraam bọ. Kásugheeny rꞌoniin ọnyo ạbuo areekeleghian phọ.

⁶ Bịdi rorigheleghu dulhe bịn rogbophoghu ịdipho asuogh, kokitonom ẹmha phọ.

⁷ Nạghan ịḅenian ạbidi rꞌịpaaraghan phọ. Asinem ạbidi ẹkigh isiko ologhi ịnhu ạbidi, kụ bịdi rogbiom ghan mọ oye ịlo ạbuno rạ́naghan ghan.

⁸ Kụ ọlo nạ ạmilogh bịdi, Ọmoogh-we; nạ ạnmoghoghoom bụphe Ẹnaan úmeeraam bọ.

⁹ Mị ạmoogh oḍuom-ologhi esi ịnyaam ạna; nạ kụ esi ịbooghian ạmi, Ẹnaan.

¹⁰ Ẹnaan ạmi ịphomoghian ni ịmi kụ katu ni ụteeny ịmi; ọdi kaḍighi ịdi mị kạmiin mem dị ạbumulogh-ḍien ạmi momeleghu.

¹¹ Kạ́ze bịdi, Ẹnaan, ọbo awe phọ ạmi kobula ghan bọ. Wạawalamiom bịdi ịnyaam mọ ạna kụ ạkpar apu bịdi, Ọmoogh-we, ọsuaram ayoor.

¹² Ịkaraph edi ịidoronhu ạbidi; oomo ikpo ọnhu ạbidi eḍighi ịkaraph. Ḍighi ịdi kosiph bịdi esi ophoophe aloor phọ ạbidi. Loor iitunyian phọ rꞌọkpe phọ ạbidi,

¹³ piemi bịdi rꞌọghagh ologhi, piemi bịdi, bịdi kụ́tol mun. Kụ tọrobo oye alegheri mọ Ẹnaan phọ kụ ịda ẹpe Ịzirel, mọ ọda phọ ọdi aleeny ni oomo aḅirini phọ.

¹⁴ Ạbumulogh-ḍien ạmi rorigheleghu dulhe, bịn rọyughogh ịdipho asuogh kokitonom ẹmha phọ,

¹⁵ ịdipho asuogh lọ reyeela oghiraan ọwa eḍien kụ rẹkughian eḍighi ịyaar lọ eḍien phọ ị́per.

¹⁶ Kụ ọlo mị kạmoorom ni ịlo ịnyaam mọ ạna; ḍịroor ḍịroor mị kạmoor akoom ịlo ẹphomoghian phọ ạna rémuneen ghan bọ. Nạ maḍighi ni eekpereghian ạmi, uba dị mị aḍigh mem ịiḅaghami.

¹⁷ Mị kạmooraan nyịna sụor, ọsuaram ạmi. Eekpereghian ạmi Ẹnaan, Ẹnaan phọ ẹpe ịphomoghian bọ ịmi.