Ạsuor 57 - Ạḍinya Iigbia

Ịiḅereghi ịlo ọloghonaan ạḍighaagh

¹ Ẹnaan, ụnma ịmi ighirigiir. Ụnma ịmi ighirigiir loor esi dị mị atu esi ạna ọmoogh eekpereghian. Sịphe uba araphaaph phọ ạna kụ ẹdi mị ạaghian tụtu oboom oghim mọ ạgber.

² Mị ạmagh Ọkaraghi Egbogh Ẹnaan phọ, Ẹnaan phọ ọpo rạngo ghan bọ tọrobo ịlo mị ạwa.

³ Ọdi kamegheron kꞌẹpe ạke kụ ụphel ịmi. Ọdi kabinighiom bụphe rụgbiphoghom bọ ịmi. Ẹnaan kiḍeenaan ịmi ẹphomoghian phọ ọdi rémuneen ghan bọ rꞌamabi-ólho phọ ọdi.

⁴ Ạbumulogh-ḍien ukoom ịmi, dị ọghigh riitiir lọ rẹba ghan we. Ạralaal ạbidi ẹkigh ịsoph rꞌịkpina. Asinem ạbidi ẹkigh isoko lọ eroph.

⁵ Ḍeenaan igbogh phọ ạna ẹpe okuaḍio phọ, Ẹnaan, ḅịle eegu phọ ạna eleeny oomo ade phọ.

⁶ Ạbumulogh-ḍien ạmi mulherenaan ịmi ọseki osiphom ạmi; ẹ́ḅaal ologhi miikpereghiom ịmi. Bịdi uguph ghẹle pạ eten phọ ạmi kụ bịdi rꞌaloor kụ ụḅile osumughu.

⁷ Mị ạmoogh oḍuom-ologhi dị amunughan, Ẹnaan. Mị kạmoor aaseeny nyịna.

⁸ Sụma, uwaloor ạmi! Sụma! Mị kạsighe ọne rꞌogumogum, kụ ạsumenom ḍịroor phọ.

⁹ Mị kạseph ni nyịna, Ọmoogh-we, sịphe areelhe kịrokiro phọ. Mị kạseph ni nyịna ogbo oomo areelhe phọ.

¹⁰ Ẹphomoghian phọ ạna rémuneen ghan bọ esi ni ẹpe ạsike phọ; amabi-ólho phọ ạna ạḅogh ni okuaḍio phọ.

¹¹ Ḍeenaan igbogh phọ ạna ẹpe okuaḍio phọ, Ẹnaan, ḅịle eegu phọ ạna eleeny oomo ade phọ.