Ạsuor 55 - Ạḍinya Iigbia

Ịiḅereghi oye dị ọyaghiri aakeleghi

¹ Nạghan ịiḅereghi ạmi, Ẹnaan; kạ́ḅitonaan ịlom mọ ạmi.

² Ler rụru ạnaghan kụ ụphagharanaan ịmi; mị maminenom loor ịiḅaghami phọ ạmi.

³ Mị rakiilaan ni loor ịgbiphoghom ạbukaraph awe. Bịdi ọsighe ịiḅaghami uruom ịmi; bịdi ụghagham ịmi ologhi kụ mị akia bịdi.

⁴ Mị rakiilaan ni, ḅịle ịka aḍuugh misoroghuom ịmi.

⁵ Aruugu rꞌokpereghaan muzuom ịmi, kụ oḅio ạmi ọ́pho.

⁶ Edi esi ạmi ọbo mị ạmoogh raphaaph ịdipho ọkurughozo. Mị mụpeeph ni ạḍua ạwa ekpisi ophooghian

⁷ Mị mụpeeph ni ạḍua ạwa esi orugh ẹpe ẹdala phọ.

⁸ Mị mụmoogh esi ạaghian okpetenaan ogbogh oghim rꞌookuugh.

⁹ Gbạragbarami rạghaaph ạbumulogh-ḍien ạmi, Ọmoogh-we. Oomo ịdi mị ạmiin sịphe ẹmha phọ, ịpaaghian rꞌẹwalalaany elephiri bịn.

¹⁰ Tọrotoro esi, asighiton rꞌịiḅaghami bịn kụ edi ghan ootaany rꞌaḍughul.

¹¹ Ọgbiphoghom rꞌimi rꞌoogulemi ạraraar kụ imuza pạ aroḅodo phọ.

¹² Eḍighi ịyaar dị ạmulogh-ḍien kụ ụnmoghoghoom ịmi, mị mutue ni ạkparam. Eḍighi ịyaar dị oye iipikian kụ aabaga mọ ọno ạkpar upu ịmi, mị mụbooghi ni loor ạmi esi lọ ọdi odi.

¹³ Kụ ẹḅile eḍighi nyịna phọ rꞌạmi ooleeny bọ ni, ọnyo ogbo ạmi rꞌọyaghiri ạmi, kụ ụnmoghoghoom ịmi.

¹⁴ Yira ụḅoph ghan ni ọnhu ọghaaph, orelhian ghan ọghi Otu Ịiḅereghi phọ.

¹⁵ Ạbumulogh-ḍien ạmi omugh ẹpuuny! Bịdi ogheel ọmar iḍim imoom! Ịkaraph kụ edi ghan ruutu ạbidi rꞌiloghi ạbidi.

¹⁶ Kụ ọlo mị ạlom Ọmoogh-we Ẹnaan phọ ọloghonaan ạḍighaagh kụ ọdi kụphel li ịmi.

¹⁷ Ḍịroor, ogbo ootaany rꞌaḍughul, ạsiagba rꞌịkuph ạmi ẹki ạnyu ẹteeny nyọdi, kụ ọdi kạnaghan ni ẹḍogh ạmi.

¹⁸ Ọdi kụḅulemi ịmi rꞌẹwoor ẹpe ạraagham mọ mị eenom bọ rꞌịbadi ạbumulogh-ḍien phọ.

¹⁹ Ẹnaan, ọpo ạda bọ kꞌageedi, kịnaghanan ni ịmi kụ ạkpar apu bịdi; loor esi dị bịdi úmeera ukiton, ḅịle bịdi nyọdi úkiilaan.

²⁰ Ogbaany ạmatuan ạmi azuom rịghiri phọ ọdi; ọdi abi ruguanan phọ ọdi.

²¹ Ikpo ọnhu ọdi ẹkorom epu elho kụ ạri sịphe ekpom mọ ọdi aḍikia kụ edi. Ikpo ọnhu ọdi ịipholion ghan mụdi ạmunum, kụ ạri rẹmeeghan ịdipho isiko dị eroph.

²² Ngọ dool phọ ạna Ọmoogh-we phọ, bịn ọdi kạphel li nyịna. Ọdi rámeera ghan ạbunon kụ ọkpar opu bugey awe phọ.

²³ Kụ ọlo, Ẹnaan, nạ kạsighe ni rọkoom-enu phọ rꞌạbugbaam ọkpe phọ asiemi oḍi ạbidi, tụtu bịdi ọrol egbem ạsia ạbidi. Ạmi ạmi, mị kaḍuom ni nyịna ologhi.