Ạsuor 5 - Ạḍinya Iigbia

Ịiḅereghi ịlo ookpereghian

¹ Ọmoogh-we, ler rụru ạnaghan ikpo ọnhu phọ ạmi kụ ạatughian ịḅiphighu phọ ạmi.

² Zuumaam ạnaghan emoghi phọ ạmi. Nạ kụ Ẹnaan ạmi, Ọdaam ạmi! Nạ kụ ọdi mị rạaḅereghian, Ọmoogh-we;

³ ḍịroor nạ ạnaghanan ghan ni ẹḍogh ạmi; omite erumuḍio mị asomoriom nyịna ịiḅereghi phọ ạmi kụ akoriom ọphagharanaan phọ ạna.

⁴ Nạ kụ Ẹnaan dị ạsipioghom ị́ḅeeraan; nạ rꞌịkaraph rétughan ghan.

⁵ Ạbuo iituma phọ rọ́meera ghan egbodo ạna; oomo abuḍighinom ịkaraph okia yogh ni nyịna.

⁶ Nạ kapiemi ni oomo ạbugbaam ọkpe phọ. Ọmoogh-we phọ kamutonaan ni we lọ rozu ghan ịḅaal rꞌạbuo iigbegheḍiom.

⁷ Loor eboom ẹphomoghian phọ ạna rébi ghan bọ, mị kaḍigh ni sịphe otu phọ ạna rꞌeepuph kụ ạaḅereghi pạ Otu Iigbia phọ ạna kụ azumeri ghisigh ạngo nyịna esi arughuenian.

⁸ Ọmoogh-we, mị ạmoogh ni ịbadibadi ạbumulogh-ḍien. Uromoghiom ịmi oḍighi ghan ịlo kẹnighenaan nyịna. Gananami eten phọ ạna uḍeenaan ịmi.

⁹ Ịpe ạbumulogh-ḍien phọ ạmi ọḅem bọ kótue oḍuom ologhi; ịitughian phọ ạbidi amuphe amuphe bịn. Arokpooko phọ ạbidi ephoghogho yogh, ịdipho iiḍi lọ ịyaar ologhi ílho kụ rọgba ghan ịyaar lọ keḍigh ọnhu bịn.

¹⁰ Ẹnaan, pume bịdi erugh bịdi omeel oḍighanaan ịkaraph aruuzue phọ ạbidi. Porogh bịdi amitiom loor ạsipioghom mọ ạbidi, ịdi eḍighi bọ oḅom ẹmhu phọ ạbidi ạpughan.

¹¹ Oomo ạbuphe omeeraam bọ nyịna ọmoogh iboh, ọmoor ghan sụor rꞌọḅaal ologhi. Kpeekpereghi bịdi pịdi oomo ạbuphe ọphomoghian bọ ḍien phọ ạna ọmoogh iboh.

¹² Nạ Ọmoogh-we kụ kạngo ḍịseph ạna bụo aruukuan, ịdipho ẹphomoghian phọ ạna eghoonyom bọ bịdi ịdipho ọsuaram.