Ạsuor 48 - Ạḍinya Iigbia

ẠZayon ẹmha Ẹnaan

¹ Ọmoogh-we phọ ạbugh ni. Ạman ni lọ yira kooseeny ghan sịphe ẹmha Ẹnaan phọ ayira, eegbolom iigbia phọ ọdi.

² ẠZayon kụ eegum mọ Ẹnaan, epoph kụ ẹnighe; ẹmha ogbogh Ọdaam mọ rẹngo ghan iboh oomo aḅirini phọ.

³ Ẹnaan miḍeenaan iyira mọ ọno kụ aḍibuo ayira sịphe aruutu-ịikpo ẹmha phọ.

⁴ Ạraalha phọ uukpomoghan esi kụ oru ozuom Eegum ạZayon.

⁵ Kụ ọlo mem dị bịdi ọmiin bọ, bịdi umaghagha ni; aruugu asiph bịdi kụ oghiil ọḍua.

⁶ Aruugu rꞌamukum ologhi asiph ni bịdi ịdipho ạnir dị oghunughun rakun,

⁷ ịdipho ạrunwunyaru dị oologh rạpiphoghom.

⁸ Ịpe yoor ọnaghan bọ mẹḅile emiteghu. Yoor mọmiin aani sịen ẹmha Ẹnaan phọ ayoor, Ẹnaan Oomo Ịikpo phọ. Ọdi kạpam ni ẹmha phọ kꞌagee-pọ.

⁹ Sịphe Otu Ịiḅereghi phọ ạna, Ẹnaan, yoor rọotughian ghan ni ẹphomoghian phọ ạna rémuneen ghan bọ.

¹⁰ Awe roboom ghan ni nyịna oomo arikpisi; kụ ọdu ạna aleeny eleeny oomo aḅirini phọ, kụ aruukuan edi ḍịghaagh elhiom mọ ạna.

¹¹ Awe phọ ạZayon oboh iboh, Nạ raagbo ghan iiḅi ịiruen; ạnmanyaan aJuda ọmoogh ọḅaal ologhi loor ịiruen phọ ạna!

¹² Itelhe ekitonom Zạyon kụ ạal iiphopha aruutu phọ edi bọ.

¹³ Ịmaar ẹlhogh elegh iikpe phọ ọdi, kụ ẹetughian ghan ruutu-ịikpo phọ ọdi, ọbo nyina ẹḅeni oḍiman oghiil mọ,

¹⁴ “Ẹnaan phọ ẹphen phọ kụ Ẹnaan ayira kꞌagee-pọ kꞌagee-pọ. Ọdi kụ kuḍiemiom iyira tụtu ẹteeny kꞌagee-pọ.”