Ạsuor 44 - Ạḍinya Iigbia

Ịiḅereghi ịlo oghoph

¹ Ẹnaan, yoor mọsighe ni reḅeri ayoor ạnaghanam — ạburude phọ ayoor mọghaaph ni ụḅeni iyoor — ịlo igbogh ạraraar phọ nạ aḍighi yogh bọ ḍiodiidi phọ mem mọ ạbidi,

² ịpe nạ rꞌaloor kụ aphorogh bọ amitiom bụo aruru phọ, kụ arughemi we phọ ạna sịphe ade phọ ạbidi; ịpe nạ ạlhiom bọ bụeri phọ areelhe phọ kụ aḍighi bọ ịdi bụo ạna oḍum ọrara.

³ Awe phọ ạna ụ́sighe elhool ẹgham kụ ọmooghom bọ de phọ; ḅịle kẹn, ịnyaam ạbidi kụ bịdi ị́pel bọ; ạḍighaagh elhiom mọ ạna rꞌịnyaam mọ ạna kụ ịphel bọ bịdi ịdi eḍighi bọ bịdi ọḅeeraan nyịna.

⁴ Nạ kụ ọdaam ạmi rꞌẸnaan ạmi. Nạ kụ ụngo bọ we phọ ạna ọkpar opu.

⁵ Loor ịnyaam mọ ạna yoor konyuughi ni bụmulogh-ḍien phọ ayoor olereghi; yoor kọozeghiom ni bịdi ruwol — bụphe oḅetenu bọ rọwa phọ ozuom ayoor.

⁶ Mị úḍuom ologhi kụmugh ạmi rꞌelhool ẹgham ạmi, dị kịphel ịmi.

⁷ Nạ kụ ụphel bọ iyoor ạsighe esi ạbumulogh-ḍien phọ ayoor, kụ nạ mạgbaragbarami bụphe ụlhogh bọ iyoor ḍien phọ.

⁸ Yoor rootumaam ghan ni Ẹnaan phọ oomo aḍio, ḅịle yoor koboom ghan ḍien phọ ọdi kꞌagee-pọ.

⁹ Kụ nyịidipho nạ mughel iyoor. Nạ rạ́daph ghan mun we ẹgham mọ ayoor kạghi aani ẹgham.

¹⁰ Nạ maḍighi ịdi yoor rokiilaan bụmulogh-ḍien phọ ayoor, kụ ạbumulogh-ḍien phọ ayoor mowum rạraar ayoor.

¹¹ Nạ mụḅogh iyoor ạngo mọze ịdipho iyool-ịga, ạḅile ụwalalami iyoor oomo areelhe phọ.

¹² Nạ maal we phọ ạna ẹnum ikpoki dịadi yoor mạar ụ́man.

¹³ Nạ maḍighi ịdi yoor moḍigh ạagia esi amatuman ayoor; yoor moḍigh rẹer rꞌạrigilaam esi ạbuphe orugh bọ ukoom iyoor.

¹⁴ Yoor moḍighi ọghoogh ạbidi esi oomo areelhe phọ; ḅịle bụphe Ẹnaan úlegheri bọ rụnmoghoghoom ghan iyoor.

¹⁵ Oomo amem mọ ạmi mị odimom ghan rꞌaroofola, ḅịle umugholoor muukpereghiom ịmi,

¹⁶ loor ịinaghan rꞌiitunyian rꞌịḅenian ạbumulogh-ḍien phọ ạmi rꞌạbuphe mị akia bọ.

¹⁷ Oomo ịphen phọ mimiteghunaan iyoor, ghạlamo ịduon yoor nyịna úbula bọ ni, ḅilẹ kẹn ụ́ka bọ ịyo phọ ạna.

¹⁸ Iloghi ayoor ínmia; kẹn, ịgbaranuom aruwol phọ ayoor ị́piom eten phọ ạna.

¹⁹ Nạ mughin iyoor ạbilenaan ilhom ịnam, kụ oogho aḍuugh muukpereghiom iyoor.

²⁰ Eru mạar dị yoor mowula ḍien Ẹnaan phọ ayoor ọḅile onme eeruen ẹmugh kụ rọoḅereghi,

²¹ Ẹnaan kétue ẹwa ịphen phọ emitiom ḍụghum? Ọdi alegheri bọ ni rạraar ịbooghian phọ edi bọ ologhi oye.

²² Ii, ụtuan ẹmhu ạna kụ rụze bọ iyoor ḍio ḍio ḍio, mugbiom iyoor dịadi iyool-ịga dị kọkanyan.

²³ Ọmoogh-we, sụma. Nạ rạnaani ghan ịduon phọ ika? Ḅetenu. Kúghinom iyoor kꞌagee-pọ.

²⁴ Nạ ụtuan ika kụ ạaghian bọ, kụ nạ abula bọ ịminimiin phọ ayoor rꞌịiḅaghami phọ ayoor?

²⁵ Yoor momeleghu ude ọogughuḍian, yoor moḅololo yogh esi ọposo.

²⁶ Ḅetenu aru ụlhoghonaan iyoor ḍịghaagh. Esi ẹphomoghian phọ ạna rémuneen ghan bọ, tue ụlhoghonaan iyoor ḍịghaagh.