Ạsuor 41 - Ạḍinya Iigbia

Ịiḅereghi oye ẹzegh

¹ Ạḍiseph edianaan ghan bụphe rọotughian ghan bọ rukulom mọ. Ọmoogh-we phọ rạpel ghan bịdi kạsighe esi ịiḅaghami.

² Ọmoogh-we phọ kụ raako ghan bịdi kạpham ghuḍum ạbidi, kụ bịdi ọmoogh ḍịseph sịen aḅirini phọ. Ọdi kámeera mọ bịdi omeel oḍighanaan ịpe ạbumulogh-ḍien phọ rọotughianam bọ bịdi.

³ Ọmoogh-we phọ kạloghonaan ni bịdi ḍịghaagh mem lọ bịdi rọorurughian, kụ aakonom bịdi aḍume.

⁴ Mị phọ, mị ạḅem mọ, “Mị maḍighi ni ịkaraph risigh ạna, kụ ụnma ịmi ighirigiir uukonom ịmi.”

⁵ Ịdi ạbumulogh-ḍien phọ ạmi rụghaaphanaan ịmi ị́nighe: rọwa ghan mọ mị umugh aḍien ạmi ephe.

⁶ Kụ oye lọ aru ophogh ạmi kapogh ni ịyaar yạar bịn ạkaaph, kụ ạri ẹpe ologhi phọ odi igey kụ ílho, kụ romite rakeel kụ ạgba bịn akirinom.

⁷ Oomo phọ ạbuphe ụlogh bọ ịmi ḍien roophola ghan oniin kạḅeni nyoniin ịlo ạmi, kụ rọotughian ghan ọkaraghi ịpe eeph bọ ịlo ạmi.

⁸ Kụ rọḅem ghan mọ, “Ẹdi ẹpham bọ nyọdi egi phọ káḍum mun.”

⁹ Rꞌọkaraghi ọyaghiri phọ ạmi ọpo mị aḍuom bọ ologhi, rꞌạmi rolian ghan bọ riiḍien, makitonaan bịn uzuom ịmi.

¹⁰ Ọmoogh-we, ụnma ịmi ighirigiir, ụtophoron ịmi aphune mị uḍum, mị uḅulemian bụmulogh-ḍien phọ ạmi.

¹¹ Ạbumulogh-ḍien phọ ạmi kụ́kpar upu ịmi: ịphen phọ miḍeenaan ịmi mọ eḍighinom mọ ạmi mẹḅeeraan ni nyịna.

¹² Kụ mị phọ, mị raḍighi ghan ịpe eru bọ ịne. Kụ iḍighi kụ nạ rụlhoghonaan ghan bọ ịmi ḍịghaagh, ḅịle nạ kuseere ni ịmi sịphe egbodo phọ ạna kꞌagee-pọ.

¹³ Iboom Ọmoogh-we Ẹnaan phọ Ịzirel, Iboom nyọdi kꞌagee-pọ kꞌagee-pọ. Ẹrol li ịdipho. Ẹrol li ịdipho.