Ạsuor 38 - Ạḍinya Iigbia

Ịiḅereghi oye dị rạmiinom

¹ Ọmoogh-we, kụ́ḅaam ịmi rꞌọghagh ologhi kạ́sighe ophin ologhi ạphurom rụru ạmi.

² Ịkpina phọ ạna mịrabal ịmi ekpurion; ạraghaagh phọ ạna kẹn miwiririom ịmi.

³ Aloor phọ ạmi mẹghola eminonom emuneen, loor ọghagh ologhi phọ ạna; loor ịkaraph ạmi, omoon aloor ịmi úlhoonaan mun.

⁴ Ạsipioghom mọ ạmi mẹsiiny ẹmhu ạmi; ẹemor adool phọ ạḍien mipel ịmi orool.

⁵ Ạreebephenu phọ ạmi memiteghu yogh ẹweleghian repur, loor elologhi phọ ạmi.

⁶ Mị maguul aḍigh ạagia, kụ mị odimom ghan rꞌọto oomo aḍio phọ.

⁷ Oomo ịgolom ọman phọ ạmi megbonyonu, kụ mị rạarurughian.

⁸ Mị maphe aminonom aguul, mị odimom ghan rꞌamukum ologhi rꞌịkum oomo aḍio phọ.

⁹ Ọmoogh-we, oomo ạruuphua phọ ạmi nạ alegheri ni; ịkuph phọ ạmi ị́booghian esi ạna.

¹⁰ Ologhi ịmi úlho mun, rꞌẹnum ịnyaam ịmi ílho mun, ariḍien phọ ạmi mẹphu.

¹¹ Bụphe rꞌạmi ọphomoghian bọ rꞌạrighiri phọ ạmi mughel ịmi loor esi ạroko phọ ạmi ghạlamo asiya ạmi ịmi úḍighom mun.

¹² Bụphe ruusophoghian bọ ịmi ịlo oghiigh muḍianaan ịmi ịka, bụphe rọwa bọ oḍighi ạmi ịyaar ọpaar oogulemi ạmi rꞌamem úsoph ogbiighiom ạmi ịkaraph.

¹³ Kụ mị phọ ịdipho ọḅaaghaph ḅạaghaph lọ ḍụghum rạ́naghan ghan. Mị ịdipho ekpom ọka, ọnhu mị rạ́tagharan ghan.

¹⁴ Ii, mị ạkigh oye dị ḍụghum rạ́naghan ghan, ḅịle ọnhu ạmi okpom, mị rạ́ḅa ghan.

¹⁵ Ọmoogh-we, igbiighi phọ ạmi edi esi ạna; nạ kụ kụphagharanaan ịmi, Ọmoogh-we Ẹnaan ạmi.

¹⁶ Ọmoogh-we, kámeera ạbumulogh-ḍien phọ ạmi ọtuan ịminimiin phọ ạmi oboh; kámeera bịdi ootuma ghan kụ ọḅem mọ ape nụun ni.

¹⁷ Mị mạḅile rạwa ghan okpeku, kụ ịirurughian phọ ịmi ị́wile.

¹⁸ Mị aatuma ịkaraph phọ ạmi; mị rạto ni esi ịkaraph phọ ạmi.

¹⁹ Ạbumulogh-ḍien phọ ạmi kụ umoon loor ọmoogh ịnyaam, ḅịle bụphe ụlogh bọ ịmi ḍien kụ rụgbaanaan ghan bọ ịmi ọkpe aḍita ni.

²⁰ Bụphe rụkpiom ghan bọ ịmi ịkaraph iiḅi lọ mị aḍighi rꞌạmi ụfian, ịdi eḍighi bọ mị rạdaph ghan ịpe eru bọ ịne.

²¹ Ọmoogh-we, ịmi kúghel; Ẹnaan ạmi, kạ́kel loor ạmi.

²² Ọmoogh-we, gboogborion aru ụphel ịmi. Nạ kụ ọpelia ạmi.