Ạsuor 37 - Ạḍinya Iigbia

Ịpe kẹtolom bọ ọkaraph phọ rꞌogey phọ

¹ Kạ́aḅaghamian ologhi loor ẹmhu ạbuo ạsipioghom. Kágbeghe bụo igborion phọ,

² ịdi eḍighi bọ ị́kel mun dị kọsam bịdi ịdipho ạroogho olereghi, kụ bịdi ọkaraghar yogh kụ omuughu ịdipho ạroogho.

³ Ḍuom ologhi Ọmoogh-we phọ bịn, aḍighi ghan igeny, ọbo ạrol sịen aḅirini phọ abia, kụ agey ni kọngo ghan ni nyịna eḍien olhe.

⁴ Mọogh ḍịḅeeraan esi Ọmoogh-we phọ. Ọdi kạngo ni nyịna ịpe nạ rạatughian bọ.

⁵ Ḍighom Ọmoogh-we phọ, aḍuom nyọdi ologhi, bịn ọdi kạloghonaan ni nyịna ḍịghaagh.

⁶ Ọdi kagananami ni ruukuan phọ ạna kụ ẹmhu ịdipho erumuḍio; ḅịle ariliom mọ ạna ẹmhu ịdipho ootaany.

⁷ Tọlan rꞌỌmoogh-we phọ, ạmoogh ọkparam, akori ghan nyọdi. Kạ́aḅaghamian ologhi esi oye phọ ọpo ẹnighenom bọ, oye phọ ọpo ạaghian bọ kụ raḍighi yogh bọ ọdo kịrokiro.

⁸ Bịle ọghagh ologhi rꞌologhi ẹḍim. Ịphen phọ retorori ghan oye kẹlogh esi ịkaraph.

⁹ Bụphe oḍuom bọ ologhi Ọmoogh-we phọ kụ kọmoogh de phọ, kụ opiemi bụo ạsipioghom mọ.

¹⁰ Esugha ọony ẹnum amem bịn kopiemi ni bụo ạsipioghom mọ; kụ mem lọ nạ ạatughian marugh oye ạsipioghom, keḍighi ni iikia rꞌaruugu esi ạna.

¹¹ Bụphe osooromi bọ loor kụ kọtol sịen ade phọ, kụ ọmoogh ẹepho rꞌedughom.

¹² Oye ạsipioghom mọ mamitenom ẹkaraph ezue ogeny oye phọ, ạḅile rạkirigha rạlhaal kaphoghomi ghan ogeny oye phọ.

¹³ Kụ Ọmoogh-we phọ rạmilogh ghan oye ạsipioghom mọ bịn, ịdi eḍighi bọ ariiḍio ọdi ị́kel mun.

¹⁴ Awe ạsipioghom mọ momitiom rolhool ẹgham, ọkpami sịkumugh ạbidi roosophoghian ophiemi arukulom rꞌạbuphe ekuom bọ, ọḅile ọze ạbuo aruukuan phọ.

¹⁵ Arolhool ẹgham mọ ạbidi kẹze ni bịdi, kụ ạsikumugh phọ ạbidi ebunughian.

¹⁶ Ịyal-ikpo ịpe oye aruukuan phọ ạmoogh bọ ẹnighe epu ẹelha oye ạsipioghom.

¹⁷ Sikpe awe ạsipioghom mọ kobunughi ni kụ ọlo Ọmoogh-we phọ raako ghan we aruukuan phọ.

¹⁸ Ọmoogh-we phọ alegheri ni suḍughul-otu ạbuphe oseleman bọ, kụ erua ạbidi kẹtol li kꞌagee-pọ.

¹⁹ Umugholoor bịdi rásiph ghan mem ịminimiin; ịgbakuro bịdi résoorom ghan.

²⁰ Bụo ạsipioghom mọ koguul li, kụ bụphe ọlogh bọ ḍien Ọmoogh-we phọ kope ni ịdipho ipoola ạroogho, bịdi kope ịdipho ạmughi.

²¹ Bụo igborion phọ olhe ọmugh rọ́kpe ghan, kụ ọlo ogeny oye phọ ạmoogh ghụsan kụ rạngo ghan.

²² Bụphe Ọmoogh-we phọ ạseph bọ kụ kọmoogh de phọ, kụ ọlo bụphe ọdi aruule bọ koporogh ni omitiom opiemi.

²³ Ọmoogh-we phọ kụ rạma ghan eten kaḍeenaan oye kụ raako ghan bụphe ọḅeeraan bọ nyọdi.

²⁴ Ghạlamo bịdi umeel li, bịdi kọ́tol pạ ude phọ, ịdi eḍighi bọ Ọmoogh-we phọ kạpam ni bịdi aḅerion ạmeremi.

²⁵ Mị uḍighi ni ọbumoony kụ nyịidipho mị okumoor oye. Mị mạrol li sịen aḅirini phọ abia, kụ mị kꞌekulha kọ̋miin ghan dị Ọmoogh-we phọ aghel bụo aruukuan phọ, ọbo ọbo ạnmuny ạbidi ọlom eḍien kụ olhe.

²⁶ Esi oomo amem bịdi rọngo ghan oopho kụ kạale bụnon, kụ ạnmuny ạbidi oḍighi ḍịseph.

²⁷ Kel igborion aḍighi ghan iiḅi, ọbo ọto ạna ạrol sịen aḅirini phọ kꞌagee-pọ.

²⁸ Ọmoogh-we phọ ạpomoghian ịpe eḍighi bọ elhiom, ọdi óghel we oḍuom-ologhi phọ ọdi. Kaako ghan bịdi kꞌagee-pọ, kụ ọlo nmụny ạbuo ạsipioghom mọ kopiemi ni.

²⁹ Bụo aruukuan phọ kụ kọmoogh de phọ; ḅịle bịdi kụ kotugh sịen ade phọ kꞌagee-pọ.

³⁰ Ogeny oye phọ rạkaaph ghan ọghaaph olegheri ịyaar, ḅịle ọdi raalemi ghan ni ịiruen.

³¹ Iilogh phọ Ẹnaan edi ghan ologhi ọdi oomo amem, ịgbaranuom aruwol phọ ọdi kẹ́piom.

³² Oye ạsipioghom mọ raasophoghian ghan oye aruukuan phọ ịlo oghiigh.

³³ Ọmoogh-we phọ kạ́bile nyọdi aḍigh esi ạraghaagh ạbumulogh-ḍien phọ ọdi, mụghumo omeera lọ kosoph ọoruen opume nyọdi.

³⁴ Ḍuom ologhi Ọmoogh-we phọ kụ aako ghan iilogh phọ ọdi. Ọdi kaghueni ni nyịna kụ ạngaani nyịna de phọ, kụ nạ ạmiin dị mophorogh oye ạsipioghom mọ.

³⁵ Mị mạmiin ghan ni oye ạsipioghom dị rạadaraghu rꞌiboom ịikpo, kụ apoph ịdipho ọsaga ạLebanon.

³⁶ Kụ ruukuna phọ mị aten sịphe kꞌọdi, rꞌạḍigum ílho mun; mị ạwa nyọdi, mị ụ́miin.

³⁷ Lọgh elegh ogeny oye kụ akiririom oye aruukuan phọ aphogh, oye ẹepho rạmoogh ghan ni ẹemara ẹemara.

³⁸ Kụ ọlo koogulemi ni we ogborion phọ bịn opiemi. Aruukuna phọ ạbidi amuphe bịn.

³⁹ Ọmoogh-we phọ kụ ọpelia ạbuo aruukuan phọ. Ọdi kụ ịnyaam ạbidi mem ịiḅaghami.

⁴⁰ Ọmoogh-we phọ rạloghonaan ghan ḍịghaagh bụo aruukuan phọ kạphel, rạpel ghan bịdi kạsighe rạghaagh ạbuo ạsipioghom mọ, ịdi eḍighi bọ bịdi rọbooghian ghan esi ọdi.