Ạsuor 35 - Ạḍinya Iigbia

Ịiḅereghi ịlo ọloghonaan ạḍighaagh

¹ Ọmoogh-we, zuom elephiri bụphe rotu bọ ozuom ạmi elephiri; aruphiom ẹgham bụphe rotu bọ oruphiom ạmi ẹgham mọ.

² Sịghe ọsuaram ikpo rꞌokuughaam ịinya ẹgham kụ ạmeera ụlhoghonaan ịmi ḍịghaagh.

³ Sịghe ọsoph rꞌakubu ạmeera asophoghom bụphe ruusophoghian bọ ịmi, kụ ạḅeni uwaloor ạmi mọ, “Mị kụ ọpelia ạna.”

⁴ Guugulemi bụphe roosophoghian bọ uwaloor phọ ạmi, umugholoor asiph bịdi. Gbạragbarami bụphe rọwa bọ ophiemi ạmi, bịdi oḅulolom rꞌẹgum ọman.

⁵ Bịdi ọghigh ịdipho ịpherepher, ookuugh aghughom bịdi, ịdipho Ọokpaany Ọmoogh-we phọ raporogh bọ bịdi.

⁶ Areten ạbidi eḍuan eḍighi ufiri ẹḅaram rẹghorom, ọokpaany Ọmoogh-we phọ ạgur bịdi alher ude.

⁷ Mị mạar bịdi ụ́piom kụ bịdi ọbooghian ulherenaan ịmi ọseki. Mị mạar bịdi úḍighi kụ bịdi oguphanaan uwaloor ạmi ghẹle.

⁸ Amuphe azuom bịdi ekperenom, bịdi omeleghu ịseki phọ bịdi ulherenaan bọ ịmi, omeel oḍighanaan muphe phọ bịdi ugbiighiom bọ ịmi.

⁹ Loor ẹmhu Ọmoogh-we phọ, uwaloor ạmi kabo ni; ologhi uwaloor ạmi kạḅaal li ịdi eḍighi bọ Ọmoogh-we phọ mụphel ịmi.

¹⁰ Oomo ịḅarara ạmi kepuru ghan mọ, “Ọmoogh-we, ạnhian rꞌạna kụ iileeny, ọpo ạphel bọ uwekulom ạsighe rạghaagh ạbuphe ọmoogh bọ ịikpo opu nyọdi, uwekulom mọ rꞌọpo ekuom bọ esi ạbuphe rọgbiphoghom bọ nyọdi?”

¹¹ Ạbugbaam ọkpe phọ moḅerenu rupuru ghan ịmi ịlo ạraraar dị mị ulegheri aani.

¹² Bịdi ụkpe ịmi ịkaraph esi iiḅi; kụ uwaloor phọ ạmi maakurughan.

¹³ Mem dị bịdi úmoon, mị umuuna ghan kpụru; mị aghine loor ạmi eḍien, akul orum ạmi ạlogh akururu kụ ạaḅereghi.

¹⁴ Mị akururu kụ ạtol dọl oye dị ẹrol dịadi ọyaghiri mụghumo umor ọdi kụ amugh, kụ mị akururu odimom rꞌọto dịadi oye lọ onhiin ọdi amugh.

¹⁵ Kụ mem lọ ịiḅaghami isoorom ịmi bịn bịdi mookpomoghan robo; ḅịle bụo ạreer phọ ughol ịmi ookpomoghan, kụ mị úlegheri ghan, kụ ụpham ịmi rọkalaghian.

¹⁶ Ịdipho awe lọ kọmilogh ẹkugha, kụ rọkirigha yogh rạlhaal ạbidi kuphoghomiom ịmi.

¹⁷ Ọmoogh-we, nạ rapogh ghan ịduon phọ bịn kꞌạpur amem? Tọphoron uwaloor phọ ạmi ạsighe esi amuphe, ạphel ghuḍum mọ ạmi ạsighe rạghaagh ạnam-dịka phọ.

¹⁸ Mị kạngo nyịna ḍịseph sịphe ogbo ookpomoghan phọ, kụ mị aboom ghan nyịna esi aḍita awe.

¹⁹ Kámeera mọ ạbumulogh-ḍien phọ ạmi oghol ẹmhu ạmi oboh, bụphe kẹn mị mạar ụ́piom bọ ụmepheghi ghan ịmi.

²⁰ Bịdi rọ́kaaphom ghan rꞌoodugha ọnhu bịn, kụ rọwa ghan sighiton kọghi esi ạbuo ẹepho phọ orugh bọ sịen ade phọ.

²¹ Opoghoghomi yogh ịnhu ạbidi ọyaghaghami ruphoghomiom ghan ịmi kụ rọḅem ghan mọ, “Yoor mọmiin ịpe nạ raḍighi yogh bọ.”

²² Ọmoogh-we, nạ rạmiin aani bọ ni ịphen phọ. Káḅoorian, Ọmoogh-we. Kạ́kel loor ạmi.

²³ Ọmoogh-we, nmaanmanam aḅetenu ụphel ịmi. Ḅetenu usophonaan ịmi ọoruen. Ọmoogh-we, nạ kụ Ẹnaan ạmi.

²⁴ Sịghe ruukuan phọ ạna kụ asophom ọoruen phọ ạmi, Ọmoogh-we, Kámeera bịdi ụmilogh ịmi.

²⁵ Kámeera bịdi ọḅem pạ iloghi phọ ạbidi mọ, “Yoor mọkpar opu nyọdi. Ịduon kụ ịdi yoor ọwa bọ. Kị́duon kụ.”

²⁶ Umugholoor asiph bịdi! Ọgbaragbara asoor pạ ogbo phọ ạbidi! Bụphe robo ghan bọ mem lọ mị odi esi ịminimiin. Bịdi omuuna umugholoor rꞌaroofola, bụphe ụtu bọ ịmi kụ ophoophe yogh loor ạbidi.

²⁷ Bụphe mị ạnighe bọ iloghi ạbidi ọmiin ghan ọmoogh iboh rꞌọḅaal ologhi kụ ọḅem ghan mọ, “Ọmoogh-we phọ ạbugh ni. Ọpo edughom otelhedom mọ ọdi ẹḅeeraan bọ ni nyọdi.”

²⁸ Anem mọ ạmi kẹkaaph ghan ịlo aruukuan Ọmoogh-we phọ, kụ mị kaboom ghan nyọdi oomo aḍio phọ.