Ạsuor 33 - Ạḍinya Iigbia

Ạḍuor oboomiom

¹ Oomo anyina ạbuo aruukuan phọ, ịmoogh iboh esi oomo ịpe Ọmoogh-we phọ aḍighi bọ. Oomo anyina ạbuphe rẹnaghanan ghan bọ nyọdi, iboom nyọdi,

² Ịsighe rẹne kụ eboomiom Ọmoogh-we phọ, ẹsighe ogumogum aḍioph ịkala kụ ẹmooraan nyọdi sụor.

³ Ịmooraan nyọdi ḍimoom ạḍuor, ẹmaar eti ogumogum mọ kụ epheghom rꞌoghur.

⁴ Ọghaaph Ọmoogh-we phọ aseleman ni; oomo iiḍighi phọ ọdi ịlo oḍuom-ologhi ni.

⁵ Ọmoogh-we phọ ạpomoghian ruukuan rꞌelhiom ịiruen; ẹphomoghian phọ ọdi rémuneen bọ kụ imuza sịen aḅirini phọ.

⁶ Ikpo ọnhu Ọmoogh-we phọ kụ ịlhem bọ kẹ phọ, kụ ookuugh ọnhu ọdi kụ amiteghom bọ oomo ạraraar phọ edi bọ kꞌạke.

⁷ Ọdi aakpomoghi oomo ạrumuum ọphiiny phọ aseere egina esi, kụ asighele phọ eḍiku yogh ruutu aruphua.

⁸ Oomo aḅirini phọ ọngo rughuenian Ọmoogh-we phọ! Oomo anyina ạbuphe erugh bọ sịen aḅirini phọ, igona loor anyina esi ọdi.

⁹ Ịlo ọdi ạḅem, kụ rẹtuugh ghan kemite; ịlo ọdi ạto, kụ remite ghan.

¹⁰ Ọmoogh-we phọ mạawalami ookpomoghan ạbuphe nyọdi úlegheri bọ, ạḅile ạgbaragbarami ịitughian oomo awe phọ.

¹¹ Igbiighi Ọmoogh-we phọ rẹtol ghan kꞌagee-pọ; ịitughian ologhi phọ ọdi edianaan ghan oghiil atum oghiil.

¹² Ạḍiseph rẹtolonaan ghan eelhe lọ Ọmoogh-we phọ kụ aru Ẹnaan ạbidi; ạḍiseph rẹtolonaan ghan bụphe ọdi ạsaḅar bọ ạmoogh.

¹³ Ọmoogh-we phọ ạrol ẹpe ạnyu ạke phọ kụ aphogh kụ ạmiin oomo ạnmuny awe phọ.

¹⁴ Ạrol ẹpe amarugh phọ ọdi kụ aphogh oomo ạbuen orugh bọ sịen aḅirini phọ.

¹⁵ Ọdi mạḅophoghi oomo iloghi phọ ạbidi aḍighi nyoniin, kụ ọdi alegheri ni oomo iiḍighi phọ ạbidi.

¹⁶ Ọdaam ólho ghan dị aḍita awe ẹgham ọdi kụ kọpel nyọdi; ophelegbe ólho ghan dị ogina ọdi bịn kụ kamitiom ḍien iphelegbe ọdi.

¹⁷ Ạsu pọ oopho ịyaar bịn, kátue ạpel oye atene, kátue kẹn ạsighe iboom ịnyaam mọ ọdi ạtophoron oye ạsighe.

¹⁸ Ọmoogh-we phọ agbi riḍien ọdi esi oomo ạbuphe rokueni ghan bọ nyọdi, rꞌạbuphe oḍuom bọ ologhi ẹphomoghian phọ ọdi rémuneen ghan bọ.

¹⁹ Ọmoogh-we phọ rạpel ghan uwaloor ạbidi kạsighe esi aḍuugh, ạḅile raako ghan ghuḍum ạbidi, bịdi rómughanaan ghan ịgbakuro.

²⁰ Aruwaloor ayoor rekori ghan Ọmoogh-we phọ. Ọdi kụ kụlhoghonaan iyoor ḍịghaagh. Ọdi kụ ọsuaram ikpo ayoor.

²¹ Loor ẹmhu ọdi yoor ọmoogh ni ọḅaal ologhi, ịdi eḍighi bọ yoor oḍuom ḍien iigbia phọ ọdi ologhi.

²² Ọmoogh-we, ẹphomoghian phọ ạna rémuneen ghan bọ ịrolonaan iyoor, ịdipho yoor oḍuom bọ nyịna ologhi.