Ạsuor 32 - Ạḍinya Iigbia

Ootuma ịkaraph rꞌọsar ọwile

¹ Ạḍiseph rẹtolonaan ghan nyọpo mọwilenaan bọ ịkaraph phọ ọdi, nyọpo ookpereghi bọ ịkaraph phọ ọdi.

² Ạḍiseph rẹtolonaan ghan oye phọ ọpo Ọmoogh-we phọ rágbianaan bọ ịkaraph, nyọpo ologhi iigbegheḍiom uwaloor ọdi úlho bọ.

³ Tọro amem lọ mị ịkaraph ạmi ụ́gba umitiom, bịn aloor ạmi reminonom, loor esi ịkuph phọ ạmi oomo aḍio.

⁴ Ḍughul rꞌootaany ạḍighaagh phọ ạna riwiririom ghan ịmi; ịnyaam ạmi memuneen ịdipho ịizupha lọ ẹghologhol aghozogh esoorom.

⁵ Mị aloghoma ni ịkaraph phọ ạmi esi ạna. Mị ụ́booghi ịkaraph phọ ạmi risigh ạna. Mị ạḅem mọ mị kaatuma ni ọpioman phọ ạmi aḍeenaan Ọmoogh-we phọ kụ ọdi agbi ọsar ịkaraph phọ ạmi ọwilenaan ạmi.

⁶ Loor ịphen phọ, mem ịiḅaghami, mem lọ ekuom bịdi, bụphe osooromi bọ loor ọoḅereghi ghan nyọdi ọbo ooḍigha ạmuum ịiḅaghami kạtophoron ghan bọ bịdi.

⁷ Nạ kụ oghoph ịbooghian ạmi. Nạ kụphel li ịmi ạsighe esi ịiḅaghami; kụ mị ạmoor sụor ịlo ạpeleeny phọ ạna ịdi eḍighi bọ nạ muuko ịmi.

⁸ Ọmoogh-we phọ ạḅem mọ, “Mị karomoghiom nyịna, ạḅile ạtughemi reten phọ ịpe nạ kạdaph bọ. Mị karelhiom nyịna; ariḍien ạmi kẹ́ḍua esi ạna.

⁹ Kạ́kigh ghan ạsu mꞌẹnam adool dị rẹ́naghan ghan ḍụghum kụ ịnhu phọ ạbidi ọkasaghiom izime ọbo bịdi ọnaghanan.”

¹⁰ Bụo ạsipioghom mọ kọmiinom ni iboom, kụ ọlo bụphe oḍuom bọ ologhi Ọmoogh-we phọ ẹphomoghian phọ ọdi rémuneen ghan bọ kẹtolonaan ni bịdi.

¹¹ Nyina ạbuo aruukuan phọ, ịḅaalami iloghi anyina kụ eboh loor esi ịpe Ọmoogh-we phọ maḍighi bọ. Nyina ạbuphe iloghi phọ eseleman bọ, ịḅaalami iloghi anyina kụ eboh.