Ạsuor 30 - Ạḍinya Iigbia

Ịiḅereghi ọngoom ạḍiseph

¹ Mị aboom ni nyịna Ọmoogh-we phọ ịdi eḍighi bọ nạ mụphel ịmi ạsighe. Nạ ómeera mọ ạbumulogh-ḍien phọ ạmi oboh.

² Ẹnaan ạmi Ọmoogh-we phọ, mị umoghi aphoghomiom nyịna kụ nạ muukonom ịmi.

³ Ọmoogh-we, nạ mạtophoron uwaloor phọ ạmi sịphe oḍi phọ apune. Nạ maḍighi ịdi mị makpetenaan ḍuugh.

⁴ Ịmooraan Ọmoogh-we phọ sụor, nyina awe ạghusan phọ ọdi, ẹḅile ẹngo ghan nyọdi ḍịseph ẹetughianam ghan rạraar iigbia phọ ọdi,

⁵ ịdi eḍighi bọ ọghagh ologhi ọdi rábia ghan, ọnma ighirigiir phọ ọdi rámuneen ghan, eekuna ílho. Emoghi ketue ni ẹtol ḍughul, kụ ọlo iboh retu ghan ni ḍịroor.

⁶ Kụ mị, mị ạḅem mọ, “Dọl ẹelha phọ ạmi ạḍien ịmi kúgboton.”

⁷ Ọmoogh-we, loor ọnma ighirigiir phọ ạna, nạ mụkparami ịmi ịdipho ẹeḅaraph lọ ẹkpar. Nạ ụaaghinaan ni ịmi ghisigh phọ ạna kụ ịiḅaghami ni ịmi.

⁸ Ọmoogh-we, mị ramoghiom nyịna, ḅịle kẹn mị rạaḅereghi ghan nyịna,

⁹ “Ọghen ạsuo kụ ẹdi ịḅaal phọ ạmi kẹmoogh mem dị muḍi ịmi? Ọposo phọ kaboom ni nyịna ḍụghum? Kạgba ni iiḅi phọ ạna amitiom?

¹⁰ Nạghan, Ọmoogh-we, ụnma ịmi ighirigiir. Nạ kụ kụloghonaan ịmi ḍịghaagh.”

¹¹ Nạ manme ọto phọ ạmi atene iboh. Nạ mạkarion rukpe-ọto phọ ạmi, umunemi ịmi ọḅaal ologhi.

¹² Esi ịduon phọ mị káḅoorian, mị kạmoor ghan sụor aboom ghan nyịna. Ọmoogh-we, nạ kụ Ẹnaan ạmi. Mị kạmoor ghan sụor ạsephom nyịna kꞌagee-pọ.