Ạsuor 27 - Ạḍinya Iigbia

Ịiḅereghi oboomiom

¹ Ọmoogh-we phọ kụ ạḍiḅaal ạmi, rꞌỌpelia ạmi. Mị rákiilaan oye. Ọmoogh-we phọ kụ ruuko ghan ịmi esi oomo ịiḅaghami. Mị rákiil ghan ruugu.

² Mem dị bụo ạsipioghom mọ uzuom ịmi ịlo oghiigh, bịdi ghụn ni kụ ukperenom yogh omeleghu.

³ Ghạlamo aḍita ạbuo ẹgham kụ uko ịmi okitonom, aruugu ịmi kúsiph. Ghạlamo ạbumulogh-ḍien kụ uzuom ịmi, mị aḍuom ni ologhi Ẹnaan.

⁴ Mị rạlom ghan Ọmoogh-we phọ eniin ịyaar bịn; kụ ịyaar phọ ẹpe phọ kụ ẹdi mị rạwa: ọrol ịpa otu Ọmoogh-we phọ oomo asuḍughul-otu aghuḍum mọ ạmi, ophoghoghom ghan ẹnighe phọ ọdi rꞌookia ghan iiḍighi aruugu phọ ọdi rꞌọlhom ghan ọdi mọ uuko ịmi.

⁵ Ọdi kughoph ni ịmi mem ịiḅaghami. Ọdi kuuko ni ịmi sịphe Otu phọ ọdi. Ọdi kụmeremi ịmi ạnyu aḍighiigh, kụ aḍighi ịdi ịyaar ịmi kíḍighi.

⁶ Mị kạkpar apu oomo ạbumulogh-ḍien phọ ạmi ukoom bọ ịmi. Rꞌọḅaal ologhi kụ mị ạphighironom ẹkia sịphe Otu phọ ọdi, kụ mị ạmoor ghan aboom Ọmoogh-we phọ.

⁷ Ụnaghanan ghan ịmi, Ọmoogh-we, mem lọ mị ạmagh nyịna, ụnma ịmi ighirigiir ạḅile ụphagharanaan ịmi.

⁸ Mem lọ nạ ạḅem mọ, “Tue ụuḅereghi ịmi,” mị rạpagharanaan ghan mọ, “Mị ratu ni.

⁹ Kạ́booghian esi ạmi.” Kụ́ghagham ịmi ologhi. Kámutonaan otelhedom mọ ạna. Nạ kụ rụlhoghonaan ghan ịmi ḍịghaagh. Kụ́wile, kútoka ịmi, Ẹnaan Ọpelia phọ ạmi.

¹⁰ Ghạlamo ọde ạmi rꞌonhiin ạmi kumutonaan ịmi, Ọmoogh-we phọ kuphogh ghan ni ịmi.

¹¹ Ọmoogh-we, ụtughemi ịmi ịpe nạ rạwa bọ mọ mị uḍighi. Nạ kurorori ni ịmi eten dị ịyaar ịmi kíḍighi ịdi eḍighi bọ mị ạmoogh ḍita ạmulogh-ḍien.

¹² Ịmi kạ́ḅogh ạngo bụmulogh-ḍien phọ ạmi, bụphe rụgbaaghiom ghan bọ ịmi ọkpe rꞌịpaaraghan.

¹³ Mị alegheri ni mọ mị kạtol li ạmiin ẹnighe Ọmoogh-we phọ sịen aghuḍum mọ ạkuen.

¹⁴ Ḍuom ologhi Ọmoogh-we phọ. Mọogh omeeraam. Kátoph ologhi ạna. Ḍuom ologhi esi Ọmoogh-we phọ.