Ạsuor 25 - Ạḍinya Iigbia

Ịiḅereghi ịlo oḍiemiom rꞌoghoph

¹ Ọmoogh-we, nạ kụ ọdi mị rạaḅereghi.

² Mị aḍuom nyịna Ẹnaan phọ ạmi ologhi. Ụphel ịmi ạsighe esi umugholoor apum. Kámeera ạbumulogh-ḍien phọ ạmi oboh.

³ Erugh répum ghan bụphe oḍuom bọ nyịna ologhi; kụ ọlo apum rạtolonaan ghan bụphe nyịna úlegheri bọ.

⁴ Ọmoogh-we, ụtughemi ịmi reten phọ ạna, aḍighi ịdi mị kalegheri.

⁵ Ụtughemi ịmi ọrolan igey phọ ạna, ịdi eḍighi bọ nạ kụ Ẹnaan phọ ạmi rịphel ghan bọ ịmi. Mị aḍuom ghan nyịna ologhi oomo amem.

⁶ Ọmoogh-we, tụutughian ọnma ighirigiir rꞌẹphomoghian phọ ạna rémuneen ghan bọ, ẹpe nạ ụphomoghian bọ ịmi kꞌaḍiodiidi.

⁷ Ọmoogh-we, sạr ịkaraph rꞌọpioman ẹghoroghor phọ ạmi ụwilenaan ịmi; loor iiḅi rꞌẹphomoghian phọ ạna rémuneen ghan bọ, Sey Ọmoogh-we.

⁸ Loor esi dị Ọmoogh-we phọ aseleman bọ kụ ạnighe, ọdi rạtughemi ghan buḍighinom ịkaraph eten dị bịdi kọdaph.

⁹ Ọdi raḍiemiom ghan bụphe osooromi bọ loor igeny areten, ạḅile rạtughemi ghan bịdi reten phọ ọdi.

¹⁰ Oomo areten phọ ọdi ẹphomoghian rꞌọgba ghan igeny kụ ẹdi ọdi odimom esi ạbuphe rooko ghan bọ ịyo rꞌiilogh phọ ọdi.

¹¹ Ọmoogh-we, pạmanam ni oguan phọ ạna kụ ạsar ịkaraph ạmi ụwilenaan, ịdi eḍighi bọ ịkaraph phọ ạmi ẹpughan.

¹² Bụphe rọnaghanam bọ Ọmoogh-we phọ kọtuugha ni esi ọdi reten dị bịdi kọdaph ghan.

¹³ Edughom kẹtolonaan ni bịdi oomo amem, ḅịle ạnmuny ạbidi kụ kọmoogh de phọ.

¹⁴ Ọmoogh-we phọ ọyaghiri ạbuphe rọnaghanam bọ nyọdi, ḅịle ọdi kạkparami ni ịyo phọ ọdi rꞌạbidi.

¹⁵ Mị rapogh ghan Ọmoogh-we phọ oomo amem ịlo ọloghonaan ạmi ḍịghaagh, kụ ọdi kụtophoron ni ịmi ạsighe esi ịiḅaghami.

¹⁶ Ọmoogh-we, kiton usoman ạḅile ụnma ịmi ighirigiir ịdi eḍighi bọ mị ogini, ịnyaam ịmi ílho.

¹⁷ Ụutoghion ịmi ạsighe esi oomo ịpe rịiḅaghami bọ ịmi, ạḅile ụphel ịmi ạsighe esi ịiḅaghami.

¹⁸ Tụutughian mukum ologhi phọ ạmi rꞌịminimiin phọ ạmi kụ ạsar oomo ịkaraph phọ ạmi ụwilenaan ịmi.

¹⁹ Mịin ḍita ạmulogh-ḍien dị mị ạmoogh, ịdi bịdi ụlhogh bọ ịmi ḍien.

²⁰ Uuko ịmi ụphel ịmi, ạsighe esi apum. Mị aḍigh ḍibuo ạna.

²¹ Oseleman rꞌọmaar ạdol phọ ạmi iiko ghan ịmi, ịdi eḍighi bọ mị aḍuom nyịna ologhi.

²² Esi oomo ịiḅaghami phọ ạbidi, Ẹnaan, pẹl Ịzirel we phọ ạna.