Ạsuor 22 - Ạḍinya Iigbia

Emoghi amukum ologhi rꞌạḍuor oboomiom

¹ Ẹnaan ạmi, Ẹnaan ạmi, uḍighi ika kụ nạ ughinom bọ ịmi? Mị ramoghiom ghan nyịna rꞌịkuph. Uḍighi ika kụ nạ ạkel bọ kꞌẹpe?

² Ẹnaan ạmi, mị amoghi rạmagh ghan nyịna ootaany, kụ nạ ịmi ụ́phagharanaan; kụ ḍughul kẹn mị ụ́naani, úḅoorian.

³ Nạ Oye Iigbia. Nạ ạtolom oobagaam mọ Ịzirel dịadi ạgada ạraalha.

⁴ Ạburude ayoor uḍuom nyịna ologhi; uḍuom nyịna ologhi kụ nạ ạphel bịdi.

⁵ Bịdi umoghi osomoriom nyịna kụ nạ ạphel bịdi; bịdi uḍuom nyịna ologhi, kụ nạ bịdi óbi.

⁶ Mị ạḍileegbem, mị kóye mun. Mị maḍigh rẹer aafola esi awe.

⁷ Oomo ạbulo ụmiin ịmi rụmilogh ghan ịmi, rụnmoghoghoom yogh ghan ịmi, kooḅoghomi rụmhu ạbidi,

⁸ Bịdi ọḅem mọ, “Nạ uḍuom ologhi esi Ọmoogh-we phọ. Uḍighi ika kụ ọdi nyịna ọ́phel bọ? Eḍighi mạar dị nạ ạḅeeraan Ọmoogh-we phọ, uḍighi ika kụ ọdi nyịna ọ́lhoghonaan bọ ḍịghaagh?”

⁹ Nạ kụ ụsighe ịmi amitiom rꞌẹwoor sịphe otu-ọony phọ; mị aḍuom nyịna ologhi kꞌịpa ekpologhi onhiin phọ ạmi.

¹⁰ Ughinanaan ịmi nyịna kꞌamem mọ mị odi bọ pạ otu-ọony phọ. Nạ kụ Ẹnaan ạmi kꞌọkuruḅaka onhiin ạmi.

¹¹ Kạ́kel loor ạmi. Ịiḅaghami mẹebeeph, kụ oye ọloghonaan ạmi ḍịghaagh ólho.

¹² Aḍita ạbumulogh-ḍien phọ ạmi muko ịmi okitonom ịdipho ilephiri ạsinam; ạsinam dị ẹmoogh ịikpo mẹḍua ẹpe ade phọ ạBasan ikoom ịmi.

¹³ Opoghoghomi ịnhu ạbidi ruphoghomiom ghan ịmi, kụ rọlayaghuan ịdipho ilhom ịnam.

¹⁴ Ịnyaam ịmi ílho mun, memoopha ịdipho ạmuum lọ ozu ude; oomo ịḅarara ạmi megboronu ẹḍuaghu sịphe asimatul phọ ạbidi, ologhi ạmi makelele.

¹⁵ Ẹḍogh ạmi mẹgharaghar ịdipho ophugh, anem ạmi mẹḅaraghan rukpo ạmi. Nạ mụmuneeny ịmi pạ ọposo aḍuugh phọ.

¹⁶ Asuogh miko ịmi ekitonom; aḍita awe ạsipioghom mughoonyom ịmi bịdi mogimi rạghaagh ạmi rꞌaruwol ạmi okpurion.

¹⁷ Mị katue ni ạbal oomo ịḅarara phọ ạmi amuneni. Ạbumulogh-ḍien phọ ạmi ọnmagharan riḍien ạbidi kụ ruphoghom ịmi.

¹⁸ Bịdi modianagh rụsuoma phọ ạmi, ọḅile ọsa ẹlhel oye lọ kạmoogh rukpe phọ ạmi.

¹⁹ Ọmoogh-we, kạ́kel esi ạmi. Nạ kụ ịnyaam ạmi; nụun aru ụphel ịmi.

²⁰ Pẹl uwaloor phọ ạmi ạsighe esi elhool ẹgham, ạphel ghuḍum mọ ạmi ạsighe esi ịnyaam asuogh.

²¹ Ụutoghion ịmi ạsighe ọnhu ạnam-dịka phọ, ạphel ghuḍum ạmi ạsighe ịbaay ạraphaal ilhom ạsinam.

²² Mị kạgbaam ni ḍien phọ ạna aleenyemi ạḅeni siya phọ ạmi. Mị kaboom ghan nyịna sịphe ogbo ookpomoghan phọ ạbidi.

²³ Nyina abutelhedom Ọmoogh-we phọ iboom ghan nyọdi; nyina ạnmuny ạJekob, ikueni ghan nyọdi; ịiḅereghi ghan nyọdi, nyina awe Ịzirel.

²⁴ Ọdi rạ́ḅitonaan ghan, ḅịle rạ́kel ghan we lọ odi esi ịminimiin; ạ́aghi risigh ọdi, tọro amem lọ ọmagh nyọdi ọdi rạnaghanan ghan ni.

²⁵ Mị kaboom ghan nyịna sịphe ogbo ookpomoghan phọ, esi ịpe nạ uḍighi bọ ịmi; ogbo aḍita ạbuphe rọoḅereghi bọ nyịna kụ ẹdi mị kạkpe ịpe mị aguanaan bọ.

²⁶ Arukulom mọ kole ni ẹper. Bụphe oru bọ esi Ọmoogh-we phọ koboom ghan nyọdi. Edughom ẹrolonaan bịdi kꞌagee-pọ!

²⁷ Oomo areelhe phọ kọotughian ni Ọmoogh-we phọ, kụ oḅula oḍighom nyọdi, ḅịle oomo arughunughun phọ kọoḅereghi ghan nyọdi.

²⁸ Ọmoogh-we phọ ọdaam ḅịle ọdi kụ ạda reelhe phọ.

²⁹ Oomo abu-iḅo igbogh phọ kokpuḍian ni ọoḅereghi nyọdi; oomo awe dị kọḅor ri kokpuḍian risigh ọdi.

³⁰ Oghiil phọ ọphon kakumu ghan Ọmoogh-we phọ; awe kọkaaph ghan ni ịlo Ọmoogh-we phọ ọḅeni oghiil phọ ọpo ratu bọ.

³¹ Kọkaaph ni ọḅeni bụlo kọmar, ịpe Ọmoogh-we phọ ạphel bọ we phọ ọdi.