Ạsuor 2 - Ạḍinya Iigbia

Ọdaam dị Ẹnaan kụ ẹma

¹ Uḍighi ika nụun kụ oomo areelhe phọ ọḅoph bọ ọnhu omite ẹkaraph ezue, kụ awe ịsien aḅirini phọ roopuruan ghan bọ ruupuruan dị ẹmhu ílho?

² Ạbudaam mọ ạbidi mọḅaar rụmhu ọḍua ịtooghi, ạbuo ịtooghi ạbidi mookpomoghan oruphiom Ọmoogh-we phọ elephiri rꞌọpo ọdi ạsaḅar bọ amitiom mọ ạda bụno kụ rọḅem ghan mọ,

³ “Orunyi izime phọ ụghoroghiom bọ iyira oroph.”

⁴ Ọmoogh-we phọ odi bọ kꞌạke phọ rạmilogh ghan rẹer kạnmoghoghoom bịdi.

⁵ Rꞌọghagh ologhi kụ rasiphe bịdi ruugu kụ kạḅaam bịdi mọ,

⁶ “Ẹpe Zạyon, eegbolom iigbia phọ ạmi,” ọdi ạḅem, “mị mạrolomi ọdaam mọ ạmi loor ạgada ọdaam ẹmha phọ.”

⁷ Kụ ọdaam mọ ạḅem mọ, “Mị kạgba amitiom ịpe Ọmoogh-we phọ uḍeenaan bọ ịmi mọ, ‘Nạ Ọony phọ ạmi. Rodon mị mạgba aḍeenaan loor ạmi mọ mị Ọde phọ ạna.

⁸ Lọm bịn mị kạngo nyịna oomo areelhe phọ, kụ oomo aḅirini phọ kaḍighi ọlo ạna.

⁹ Nạ kạpam ni ịkpara okuron kụ abunughiom bịdi; nạ kaḅomoghi ni bịdi ịpherepe ịdipho ọnyoki.’”

¹⁰ Ịmaar ẹnaghanan, nyina ạbudaam-ẹmha phọ. Iler rụru oroma phọ ọphon, nyina ạbuo ịtooghi ịsien aḅirini phọ:

¹¹ Ịiḅereghiom Ọmoogh-we phọ rꞌoghiilaan.

¹² Ipiigha kụ ekpuḍughian ghisigh Ọony phọ, ọbo ọdi kịliom ghan bọ inyina ghẹlhe phọ ekperenom bịn nyina eegborion emugh. Iboh edianaan bụphe oḍigh bọ ḍibuo ọdi.