Ạsuor 19 - Ạḍinya Iigbia

Eegu Ẹnaan esi ọlem

¹ Ạnyu ạke phọ rẹkaaph ghan rughuenian phọ Ẹnaan; okuaḍio phọ raḍeenaan ghan iiḍighi ạraghaagh phọ ọdi.

² Aḍio etum ḍio ẹkaaph ghan ọghaaph; aḍughul etum ḍughul eḍeenaan ghan olegheri ịyaar phọ ọdi.

³ Ikpo ọnhu ílho, ọnhu ólho dị ẹḍogh phọ ạbidi ụ́naghan.

⁴ Adom mọ ạbidi eleeny ni eleeny oomo aḅirini phọ. Ẹkul ísugha sịen ade phọ dị rọ́naghan. Ẹnaan eḍighi esi ạdol ẹpe okuaḍio phọ ẹlo erumuḍio phọ.

⁵ Ọdi ramite ghan ḍịroor ịdipho olhom dị ologhi ạḅaal, rꞌịdipho oye-ephegh dị eghiil rẹpu.

⁶ Ọdi ramite ghan eniin eekuna okuaḍio phọ kụ ạki ạḅeeny asi ḍịeri phọ ạga phọ; kụ ịyaar ílho dị kẹbooghian esi ẹghologhol phọ ọdi.

Ologh Ọmoogh-we phọ

⁷ Ologh Ọmoogh-we phọ aaleeny ni, rạngo ghan imoom ịnyaam we. Ịtooghi Ọmoogh-we phọ ịlo oḍuom-ologhi ni, rẹngo ghan olegheri ịyaar bụphe ụ́moogh bọ.

⁸ Iilogh Ọmoogh-we phọ eḍighi ni elhiom; bụphe rooko bọ ọmoogh ọḅaal ologhi; ịtooghi Ọmoogh-we phọ eseleman ni, rẹngo ghan oye ọnaghan ạḍughum.

⁹ Ooseeny Ọmoogh-we phọ ẹnighe ni, kẹtol li kꞌagee-pọ; ịiruen Ọmoogh-we phọ esel li, bịdi oomo amem ẹnighe ni.

¹⁰ Ẹḅeeraan tọrobo tọrobo oye epu gol; edugh epu ẹnuum aḍiowo.

¹¹ Rịngo ghan ịmi otelhedom mọ ạna olegheri ịyaar, kụ ịikpia dị ụkpe ghan ịmi esi ooko ạbidi ẹbugh ni.

¹² Oye ólho dị kạmiin sịpioghom ọdi. Ọmoogh-we, ụphel ịmi ạsighe esi ạsipioman dị ạaghian.

¹³ Ụsighe ịmi ạgbole esi ịkaraph dị olegheri ni kụ oḍighi; kámeera bịdi ẹtooghi ịngo ịmi. Pọ kụ amem dị mị kạmaar ạserere, kụ akpetenaan esi ịkaraph.

¹⁴ Ịdi mị rạwa ịduon: mọ ikpo ọnhu phọ ạmi rꞌịitughian ologhi phọ ạmi ẹḅeeraan ni nyịna Ọmoogh-we, esi ịbooghian ạmi rꞌỌpelia ạmi!