Ạsuor 18 - Ạḍinya Iigbia

Ạḍuor ọkpar-opu aDevid

¹ Mị ạphomoghian ni nyịna, Ọmoogh-we. Nạ kụ ịnyaam ạmi.

² Ọmoogh-we phọ kụ aḍighiigh ạmi rꞌotu-ịikpo ạmi rꞌỌpelia ạmi, Ẹnaan ạmi rꞌaḍighiigh ạmi dị ruuko ghan ịmi. Ọdi kụ aḍighi ọsuaram ikpo dị mị kaḍuom ghan ologhi, ọphaal ạpeleeny ạmi rꞌotu ạnyu ạmi.

³ Mị ạmagh Ọmoogh-we phọ, kụ ọdi ụphel ịmi ḍịghaagh ẹpomoghian phọ ạmi. Iboom Ọmoogh-we phọ!

⁴ Areeghe aḍuugh ikoom ni ịmi mikitonom, kụ oologh ịiḅaghami oogulemi uzuom ni ịmi.

⁵ Ịiḅaghami aḍuugh ikoom ni ịmi, ḅịle oḍi phọ ụkpaminaan ịmi ḍiphil.

⁶ Igbo ịiḅaghami phọ ạmi mị ạmagh Ọmoogh-we phọ; Mị ạlom Ẹnaan phọ ạmi ọlhoghonaan ạḍighaagh; Sịphe otu iigbia phọ ọdi, ọdi ạnaghan ẹḍogh ạmi; Ọdi ạnaghan emoghi ịlom ọlhoghonaan ạḍighaagh phọ ạmi.

⁷ Ẹpe kụ esi dị ade phọ ephiigha ariphighiom ạraaḅaraph phọ ephiigha yogh, loor esi dị Ẹnaan rẹkagh ologhi.

⁸ Ạmughi amiteghu izon ọdi, anem ạnian rꞌiiḅu dị rẹda emiteghu ọnhu ọdi.

⁹ Ọdi ạphanyi okuaḍio phọ aru asoor, rꞌoḍiil ọotu eeḍian aruwol phọ ọdi.

¹⁰ Ọdi ạpheeph egina amem ạnyu ọokpaany aghuḍuul phọ ọdi ẹmoogh bọ raphaaph phọ; ọdi aḍigh ạnyu araphaaph ookuugh.

¹¹ Ọdi aakpereghian loor ọdi ufiri; ogbigiri ọotu, dị ạmuum amuza, akoom nyọdi.

¹² Ạḍiḅaal phọ ẹḍua bọ emite rẹmepheghian sịphe egbodo phọ ọdi pạ ọkikiph ọotu phọ iboom iiḅoghoḍi ibikpo rꞌiiḅu ạnian ạay emite.

¹³ Kụ Ọmoogh-we phọ amoogha ẹpe okuaḍio phọ; kụ ẹḍogh Ọkaraghi Egbogh Ẹnaan phọ emite.

¹⁴ Kụ ọdi ạraḅal ịkpina phọ ọdi ạwalalami ẹpomoghian phọ ọdi; kụ rạmepheghian kụ bịdi oghilighu osumughu.

¹⁵ Ude otu-ḅualhe phọ aganana, kụ ịpe ophighi bọ de phọ emite ạnyu mem mọ ọpo nạ ạḅaam bọ ẹpomoghian phọ ạna, Ọmoogh-we, kụ amooghaam bịdi rꞌọghagh ologhi.

¹⁶ Ọmoogh-we phọ ạḍua kꞌạke aru kụ ụpham ịmi; ọdi uḍur ịmi amitiom esi aḍigher.

¹⁷ Ọdi ụtagharan ịmi ḍịghaagh egbogh ẹpomoghian phọ ạmi rꞌoomo ạbuphe ụlhogh bọ ịmi ḍien phọ — bịdi ụkpar ri ọphughan esi ạmi.

¹⁸ Mem dị mị ạrol esi ịiḅaghami, bịdi uzuom ịmi ẹgham; kụ ọlo Ọmoogh-we phọ uuko ni ịmi.

¹⁹ Ọdi uphune ịmi esi ịiḅaghami; ọdi ụphel ịmi loor esi dị mị ụḅeeraan ni nyọdi.

²⁰ Ọmoogh-we phọ uunmo ịmi ruunmo loor esi dị mị raḍighi ghan ịpe eḍighi bọ elhiom; ọdi rụseph ghan ịmi loor esi dị mị ụ́piom.

²¹ Mị aako ni ologh Ọmoogh-we phọ; mị ụ́ḅitonaan Ẹnaan phọ ạmi.

²² Mị maako ni oomo iilogh phọ ọdi; mị ụ́ḅaar ẹmhu esi ịtooghi phọ ọdi.

²³ Ọdi alegheri ni mọ mị ụ́piom, mọ mị ạpamaghan ni loor phọ ạmi esi oḍighi ịkaraph.

²⁴ Kụ iḍighi kụ ọdi rụngo ghan bọ ruunmo loor esi dị mị raḍighi ghan ịpe eḍighi bọ elhiom, loor esi dị ọdi alegheri ni mọ mị ụ́piom.

²⁵ Ọmoogh-we, nạ rábi ghan weye lọ omeeraam nyịna agey, nạ ạkar ạnighe esi ạbuphe oseleman bọ.

²⁶ Nạ aseleman ni esi ạbuphe oseleman bọ, kụ ọlo bụkaraph awe nạ ráḍigh ghan rịghiri.

²⁷ Nạ rạpel ghan bụlo osooromi loor, kụ ọlo nạ rasooromi ghan ni bụlo ophophe loor.

²⁸ Ọmoogh-we, ụngo ịmi ḍịḅaal; nạ maphorogh ufiri ạmi.

²⁹ Esi ạna kụ ẹdi mị aphorogh bọ bụmulogh-ḍien phọ ạmi. Nạ kụ katue aḍighi ịdi mị kapel iikpe aten.

³⁰ Ẹnaan phọ ẹphen, areten phọ ọdi eseleman ni. Ikpo ọnhu Ọmoogh-we phọ ịlo oḍuom-ologhi. Ọdi kụ ọsuaram ikpo esi oomo ạbuphe oḍuom bọ nyọdi ologhi.

³¹ Ạnhian kụ Ẹnaan, omuton Ọmoogh-we phọ? Ạnhian kụ aḍighiigh, omuton Ẹnaan phọ ayira?

³² Ọdi kụ Ẹnaan phọ ẹsighe bọ ịnyaam ịghoroghiom ịmi, kụ eselemi bọ reten phọ ạmi.

³³ Ọdi ạkparami ruwol phọ ạmi ịdipho ịlo ọnuen, kụ ụrolomi ịmi ẹpe ạnyu ạraaḅaraph.

³⁴ Ạtughemi rạghaagh ạmi ịlo eeghiom ẹgham, kụ mị kạpam ni kụmugh arukuron bịn ạkule.

³⁵ Ọmoogh-we, nạ muuko ịmi ụphel ịmi, ḅịle ạḍighaagh elhiom mọ ạna mịpham ịmi epoophe. Ẹphamam mọ nạ rụpham ghan bọ ịmi miḍighi ịmi ogbogh.

³⁶ Nạ mạreghe ịgbaranuom aruwol phọ ạmi pạ ude phọ, kụ mị rạ́korom ghan.

³⁷ Mị maphorogh bụmulogh-ḍien phọ ạmi ạkpaariom, mị kạ́ngo mun bịdi eepoogh tụtu bịdi omuneen.

³⁸ Mị maadoghoḍi bịdi rụukunya dị kótue mun oḅerenu. Momeleghu sịen aruwol phọ ạmi.

³⁹ Nạ mụngo ịmi ịnyaam eenom ẹgham. Nạ mạguulom bụphe oḅetenu bọ ozuom ạmi ẹgham.

⁴⁰ Nạ aḍighi ịdi bụphe ụlhogh bọ ịmi ḍien kokiil kụ ọḍua esi ạmi; kụ bụphe mị akia bọ mị mạze.

⁴¹ Bịdi omoghi yogh ọwa ọlhoghonaan ạḍighaagh, kụ oye bịdi ọ́phel; omoghi osomoriom Ọmoogh-we phọ kụ ọdi ạḅitonaan bịdi.

⁴² Mị makuphogh bịdi ạazighidi ịdipho ophugh lọ ookuugh aghughom ạsighiogh. Mị mạazeghi bịdi ịdipho ọposo lọ odi eten.

⁴³ Nạ kụ ụphel ịmi ạsighe esi ạbuphe oru bọ okuphogh ạmi. Nạ mụdaami ịmi ophogh oomo areelhe phọ. Awe dị mị úlegheri kụ rukumu ghan ịmi.

⁴⁴ Aruuruen kụ rokpuḍughian ghan risigh ạmi; mị ạḅem bịn bịdi rọnaghanan ghan ni.

⁴⁵ Ịikpo phọ ạbidi ílho mun, kụ rokpereghaan yogh ghan sịphe asimarugh phọ ạbidi.

⁴⁶ Ọmoogh-we phọ odi ni. Ạḍiseph ẹrolonaan ḍighiigh phọ ạmi, Ọmoogh-we phọ, Ọpelia phọ ạmi odi bọ kꞌạke phọ.

⁴⁷ Ẹnaan phọ kụ rilianaan ghan ịmi ghẹlhe, ẹḅile esooromi reelhe phọ ịngo ịmi.

⁴⁸ Nạ mụphel ịmi ạsighe esi ạbumulogh-ḍien phọ ạmi. Ọmoogh-we, nạ muphoophe ịmi ạnyu mị apu bụphe oru bọ uzuom ịmi elephiri. Nạ rụphel ghan ịmi kạsighe ḍịghaagh oye ekpom mọ.

⁴⁹ Kụ iḍighi, kụ mị kạseph ghan nyịna ogbo areelhe phọ. Mị kạmoor ghan sụor aboom ḍien phọ ạna.

⁵⁰ Ạpeleeny dị ọdi rạpel ghan ọdaam mọ ọdi, rꞌọnma ighirigiir dị ọdi rạnma ghan Devid ọpo ọdi agbul bọ elho phọ rꞌạnmuny ọdi kꞌagee-pọ ạpughan.