Ạsuor 148 - Ạḍinya Iigbia

Ạḍimagh mọ aḅirini phọ oboom Ẹnaan.

¹ Iboom Ọmoogh-we phọ! Iboom Ọmoogh-we phọ ẹpe kꞌạke, nyina ạbuphe odi bọ ẹpe ạnyu phọ.

² Iboom nyọdi, oomo ạruukpaany phọ ọdi, oomo ạbuo ẹgham mọ ọdi kꞌạke.

³ Iboom nyọdi, erumuḍio rꞌụnwanyu; iboom nyọdi, ạraanaan phọ rẹmuanan bọ.

⁴ Iboom nyọdi, rẹekela ariisi okuaḍio rꞌạrumuum mọ edi bọ ạnyu ạke phọ.

⁵ Oomo ạbidi oboom ḍien Ọmoogh-we phọ! Ọdi bọ ạto, kụ ọlemogh bọ bịdi;

⁶ esi ịto ọdi kụ osereghi bọ bịdi riisi kịrokiro phọ kꞌagee-pọ, kụ bịdi kọ̋ḅaar ẹmhu.

⁷ Iboom Ọmoogh-we phọ kꞌịsien ade phọ, igbogh ịnam ạmuum rꞌoomo aḍigher otu-ḅualhe;

⁸ ọmepheghian aḍio rꞌookuugh, ibikpo rꞌọotu, ọokpara oghim dị rạnaghanan ghan ịto ọdi.

⁹ Iboom nyọdi, roogbolom rꞌạraaḅaraph, ịghol rꞌạrasaga ẹekpua;

¹⁰ oomo ịnam, ịlo ookonom rꞌịlo edi eḍum, ạraraar lọ rẹkogha rꞌịnun lọ rẹpeeph.

¹¹ Iboom nyọdi, rạalha rꞌareelhe, ịkpana ạraalha rꞌoomo ạbunon lọ ọdaaghi;

¹² nmạnyaan rꞌugheel ạnmuny, ikumoor awe rꞌịbam ạnmuny.

¹³ Oomo ạbidi oboom ḍien Ọmoogh-we phọ! Aḍien ọdi kụ ipu oomo ịnon asiḍien; eegu ọdi epeleghom de rꞌạke phọ.

¹⁴ Ọdi ạkparami ni eelhe phọ ọdi. Pọ kụ ịyaar phọ oomo awe phọ ọdi roboom bọ nyọdi, awe Ịzirel oḍighi bọ ẹekaany esi ọdi. Iboom Ọmoogh-we phọ!