Ạsuor 145 - Ạḍinya Iigbia

Ạḍuor oboomiom

¹ Mị kagbeelom ni igbogh phọ ạna, Ẹnaan rꞌọdaam ạmi; mị kạseph nyịna kꞌagee-pọ kꞌagee-pọ.

² Tọrobo aḍio mị kạseph ghan nyịna; mị kạseph nyịna kꞌagee-pọ kꞌagee-pọ.

³ Ọmoogh-we phọ ạbugh ni kụ ạkpe oboom agey; igbogh phọ ọdi ẹpughan ọnaghan.

⁴ Koboom ni ịpe nạ maḍighi bọ ẹḍua oniin oghiil esi ọnon; bịdi kogbeelom ni iboom iiḍighi phọ ạna.

⁵ Bịdi kọkaaph ni ịlo eegu rꞌigbogh phọ ạna; kụ mị agim ẹmhu ịlo iiḍighi ịiḍaany phọ ạna.

⁶ Awe kọkaaph ni ịlo iboom iiḍighi phọ ạna, kụ mị agbeelom igbogh phọ ạna.

⁷ Bịdi kọḅeni we oomo ịlo ẹnighe phọ ạna kụ ọmoorom ịlo ạdol aruukuan phọ ạna.

⁸ Ọmoogh-we phọ oye ẹphomoghian rꞌọnma ighirigiir; ịyaar ị́nuun ophin ologhi ọdi kụ ẹphomoghian ọdi rémunughan.

⁹ Ẹnighe ọdi ẹteeny ni tọrobo oye kụ ọdi ạnma ighirigiir oomo ọlem mọ ọdi.

¹⁰ Oomo ọlem mọ ạna, Ọmoogh-we, koboom ni nyịna ḅịle oomo awe ạna kọngo nyịna ḍịseph.

¹¹ Bịdi kọkaaph ịlo eegu ạgada ịikpo phọ ạna kụ ogbeelom ịlo igbogh phọ ạna oleenyemi,

¹² ẹrol dị tọrobo oye alegheri ịlo iboom iiḍighi phọ ạna rꞌegbogh eegu ọmar phọ ạna.

¹³ Ịtooghi ạna edi ghan bịn, ḅịle nạ ọdaam kꞌagee-pọ. Ọmoogh-we phọ rábi ghan ịpe ọdi aguanaan bọ ḅịle ọnma ighirigiir odimom ni oomo ịpe ọdi aḍighi bọ.

¹⁴ Ọdi rạpel ghan ni bụlo odi esi ịiḅaghami; ọdi rapoophe ghan bụlo omeel.

¹⁵ Oomo ạraraar lọ repooghu rephoghom nyịna oḍuom-ologhi, kụ nạ ạngo bịdi eḍien mem dị bịdi ọwa.

¹⁶ Nạ ạngo bịdi ịdi ẹmanam kụ ạperemi rụuphua oomo ạbidi.

¹⁷ Ọmoogh-we phọ raḍighinom ghan ruukuan oomo ịlo ọdi aḍighi, rạnma ghan ighirigiir esi oomo eḍighinom ọdi.

¹⁸ Ọdi atuman bụphe rọmagh bọ nyọdi, bụphe rọmagham bọ nyọdi rꞌoomo ologhi ạbidi.

¹⁹ Ọdi rạngo ghan ịlo ọwa bụphe ọlogh bọ nyọdi eghuan; ọdi rạnaghanan ghan emoghi ạbidi kụ kạphel bịdi.

²⁰ Ọdi raakpereghi ghan ni tọrobo oye lọ ạphomoghian nyọdi, kụ ọlo, ọdi kaagulemi ni bụo ạsipioghom mọ.

²¹ Mị kaboom Ọmoogh-we phọ oomo amem. Oomo ọlem mọ ọdi oboom ni ḍien iigbia phọ ọdi kꞌagee-pọ!